Иеремия 8 - Ыдыктыг Библия

¹ Ол үе кээрге, Иудеяның хааннарының, нояннарының сөөктерин, Бурганның бараалгакчылары биле медээчилериниң сөөктерин, Иерусалимниң чурттакчыларының сөөктерин бужартадып, чевеглерден үндүр октаптар – деп, Дээрги-Чаяакчы медеглээн. –

² Ол сөөктерни хүн биле айның адаанга, ол улустуң ынак чорааны, бараан болуп чорааны сылдыстарның бүгү аг-шерииниң мурнунга тарадыр октаптар. Олар ук чырымалдарга мөгейип, олардан айтыртынып, оларның мурнунга доңгая кээп дүжүп турган болгай! Ол сөөктерни кым-даа чыгбас, орнукшутпас – черге өдек ышкаш артып каар.

³ Шак ол бузуттуг аймактың дириг арткан улузунга өлүм амыдыралдан күзенчиг апаар! Мээң оларны үндүр сывырыпканым чер бүрүзүнге, каяа-ла олар дириг артар болдур, ындыг болур» – деп, Аг-шериглиг Дээрги-Чаяакчы медеглээн.

Мерген угаан чок чон

⁴ «Бо улус-чонга мону чугаала. Дээрги-Чаяакчының чугаалаан чүвези бо-дур. Кээп ушкан кижи көдүрлүрүн оралдашпас деп бе? Аза берген кижи дедир эглип келбес деп бе?

⁵ А Иерусалимниң бо чону чүге үргүлчү соора баарыл? Ол мегеден так туттунгаш, Бурганче эглиринден ойталаар-дыр.

⁶ Мен кичээнгейлиг, топтап дыңнап турдум, ынчалза-даа шынын чугаалавайн бардылар. Кым-даа бузут дээш буруузун билинмеди, „Чүнү үүлгедип алганым ол?“ диведи. Кижи бүрүзү бодунуң оруу-биле, чаа-дайын шөлүнче кушталган аът ышкаш, маңнаар-дыр.

⁷ Дээрде шилен безин ужуп чанып кээр үезин билир, көге-буга, хараачыгай, дуруяа-даа үезинде ужуп кээр. А Мээң чонум Дээрги-Чаяакчының дүрүмнерин билбес-тир.

⁸ „Бис мерген угаанныг бис, Дээрги-Чаяакчының хоойлузу бисте бар“ деп канчап чугаалаар силер? Ном-хоойлу тайылбырлакчыларының мегечи демир-үжүү меге чүүл бижип турар.

⁹ Мерген угаанныглар бак атка кирер, олар коргуушкунга алзып, какпа-дузакка туттурар. Дээрги-Чаяакчының сөзүн хүлээп көрбээн улус-тур, оларның мерген угааны кайыл ынчаш?

¹⁰ Ынчангаш Мен оларның кадайларын өске кижилерге, оларның шөлдерин – өске ээлерге бериптер мен. Олар шупту, улуу-даа, бичези-даа, чүгле ажык-кончаа сүрүп, Бурганның медээчизинден эгелээш, Ооң бараалгакчызынга чедир меге чүүл кылып чоруур-дур.

¹¹ Олар „Амыр-тайбың, амыр-тайбың!“ деп хоозун чүве чугаалап, Мээң күжүр чонумнуң балыгларын чиик көрүп, экиртир бодап турар, а амыр-тайбың чок-тур!

¹² Олар чүдек-бужар чүүлдер кылып турар, ыядыр ужурлуг улус-тур, ынчалза-даа ыядыр арын, эгенир сагыш оларда чок-тур. Ынчангаш олар аштырганнар аразынга кырлып каар, Мээң кеземче көргүзүп кээр хүнүмде олар кээп дүжер» – деп, Дээрги-Чаяакчы чугаалаан.

¹³ «Оларның дүжүдүн узуткаар мен – деп, Дээрги-Чаяакчы медеглээн. – Виноград сывынга кат артпас, фига ыяжынга чимис турбас, бүрүлер база кадып каар. Оларга берген бүгү чүвем куруглап каар».

¹⁴ Саадап турган херээвис чүл? Барып, быжыглаттынган хоорайларга чыылгаш, аңаа өлүмден манаалы! Дээрги-Чаяакчы Бурганывыс бисти өлзүн дээн-дир, биске хораннап каан суг ижирткен-дир, бис Ооң мурнунга бачыт үүлгеткен болгай бис.

¹⁵ Амыр-тайбың кээр боор деп идегеп турдувус, ынчалза-даа ачылыг чүү-даа чок-тур, экирииривисти манап турдувус, ынчалза-даа коргунчуг хай-халаптар чедип келди.

¹⁶ Дан хоорайдан аскырларның хөрээ киргирээни дыңналды, дайзынның аъттарының киштээринден чер сириңейни берди! Дайзыннар кел чыдыр, олар черни, ында бар бүгү чүвени, хоорайларны, ында чурттаан улус-чонну сыырыптар.

¹⁷ «Мен силерже хоранныг чыланнарны чорудуп тур мен. Оларны чагырар илбилиг сөстер чок, олар силерни шагар эвеспе» – деп, Дээрги-Чаяакчы медеглээн.

Иеремияның бодунуң чону дээш кажыыдааны

¹⁸ Ажыг-шүжүүм аргалаттынмас, чүлдү-чүрээм саргып аарып турар.

¹⁹ Чурттуң бүгү булуңнарындан мээң күжүр чонумнуң: «Таанда-ла Сионда Дээрги-Чаяакчы чок бе, таанда-ла ооң Хааны чок бе?» – дээн кыйгызы дыңналып тур. «Олар Мени чүге хары, чөгенчиг дүрзү-бурганнары-биле килеңнедип алганыл?»

²⁰ Дүжүт ажаалдазы доозулган, чай эрткен, а биске камгалал келбеди.

²¹ Мээң күжүр чонумнуң балыглары дээш хинчектенип чор мен! Дүмбей мени бүргеп алган, коргуушкун хөме апкан.

²² Таанда-ла Галаадта эм чок чүве бе? Таанда-ла ында эмчи кижи чок чүве бе? Ынчаарга мээң күжүр чонум чүге экирбейн турарыл?