Иеремия 51 - Ыдыктыг Библия

¹ Дээрги-Чаяакчы мынча дээн: «Мен Вавилонга, Лэв-Камайның чурттакчыларынга удур өлүмнүг шуурган көдүрер мен!

² Мен Вавилонче ону тараа дег челбиир хары улусту чорудуптарымга, олар айыыл-халап хүнүнде ону бүгү чүктен бүзээлеп алгаш, ооң черин хоозурадыр.

³ Ча адыгжызы Вавилонче чазы-биле кезензин, куяк хевин кедип алзын. Ооң аныяк оолдарын, бүгү дайынчыларын хайыра чок кыргып-хыдыңар!

⁴ Халдей черге өлүрткен улус чытсын, Вавилоннуң кудумчуларынга өттүр шаштырткан улус чытсын.

⁵ Чүге дээрге Израиль биле Иудеяның черин Аг-шериглиг Дээрги-Чаяакчыга удур үүлгеткен бачыттары долган-даа болза, ыдыктыг Бурган оларны каапкаш барбаан-дыр.

⁶ Вавилондан дезиңер, ооң кем-буруузунуң хайында өлбес дээш, амы-тыныңар камгалаңар, чүге дээрге Дээрги-Чаяакчының өжээн негээр үези келген-дир. Вавилонну Ол үүлгедиглери дээш кезедир.

⁷ Вавилон – Дээрги-Чаяакчының холунда алдын дашка турган. Бүгү чер-делегейни ол эзиртип турган, чоннар ооң арагазын ишкеш, угаанын ышкыныпкан.

⁸ Ынчалза-даа Вавилон хенертен кээп дүшкеш, буступ каар! Ол дээш ыглап-сыктаңар, ооң балыгларынга чаар эмден эккелиңер – экирий бээр чадавас».

⁹ «Вавилонну эмнеп турган бис, а ол экирбеди. Ону кааптаалыңар, кайывыс-даа бодувустуң черивисче чоруй бараалыңар, чүге дээрге Вавилонга удур үндүрген шииткел дээрге чедип, булуттарга үзүп турар-дыр.

¹⁰ Дээрги-Чаяакчы бистиң чаргывыстың шынныын чарлады. Барып, Сионга Дээрги-Чаяакчы Бурганывыстың ажыл-херээн медээлээли».

¹¹ Согуннарыңар чидидиңер, саадааңар долдуруңар! Дээрги-Чаяакчы Мидияның хааннарын хөделдирип, көдүрер. Ооң бодалы Вавилонга удур: ону Ол узуткаар деп турар, чүге дээрге Дээрги-Чаяакчы Бодунуң өргээзи дээш өжээн негээр.

¹² Вавилоннуң ханазын дескиндир туктан көдүрүңер, хайгаарал шериин күштелдириңер, таңныылдарны таарыштыр тургузуңар, кедегден белеткеңер. Дээрги-Чаяакчы бодап алганы-биле кылыр – Вавилоннуң чурттакчыларынга аазаан бүгү чүвезин күүседир.

¹³ Өндүр улуг хемнер чанында чурттап турар сен, Вавилон, эртине-байлааң эгээртинмес-тир, ынчалза-даа сээң өлүмүң келген-дир, үптээшкиннериң төнчүзү чоокшулаан-дыр.

¹⁴ Аг-шериглиг Дээрги-Чаяакчы Бодунуң амы-тыны-биле: «Шартылаа-биле дег, сени хары улус-биле долдурар мен, оларның тиилелгелиг алгы-кышкызы сээң кырыңга чаңгыланыр» – деп даңгыраглаан.

¹⁵ Дээрги-Чаяакчы Бодунуң күчү-күжү-биле черни чаяап каан, Бодунуң мерген угааны-биле өртемчейни тудуп тургускан, Бодунуң угааны-биле дээрни хере азып каан.

¹⁶ Ол үнүн дыңзыдарга, дээрде суглар шимээргей бээр; Ол булуттарны черниң ужу-кыдыындан бөлүп эккеп, чаъс чаап турда, чаңныктарны чаяап, Бодунуң шыгжамырындан хатты үндүр хадыдып турар.

¹⁷ Билиг чок кижи бүрүзү сээдең; шевер-даа эзилдирикчиниң шуткуп алган дүрзү-бурганы ооң адын баксырадыр, чүге дээрге ооң шуткаан чүүлдери – меге-дир, оларда тын чок.

¹⁸ Олар хоозун куруг, кочуланчыг кылыглар-дыр, кеземче үези кээрге, олар чиде бээр.

¹⁹ А Иаковтуң Үлүү болур Бурган ындыг эвес: бүгү чүвени Ол чаяаган, Израиль – Ооң өнчү болур аймаа база ээлээн чери, Ооң ады – Аг-шериглиг Дээрги-Чаяакчы!

²⁰ «Сен – Мээң маскам, дайынчы чепсээм сен; Мен сени ажыглап, чоннарны чылча шаап, күрүнелерни узуткап турган мен.

²¹ Мен сени ажыглап, аътты мунукчузу-биле кады, дайынчы тергени башкарыкчызы-биле кады узуткап турган мен.

²² Мен сени ажыглап, эр-даа, херээжен-даа кижини, кырган-даа, чаш-даа кижини, аныяк оолду-даа, кысты-даа узуткап турган мен.

²³ Мен сени ажыглап, кадарчыны сүрүг малы-биле-даа, тараачын кижини шарылары-биле-даа, даргаларны-даа, чагырыкчыларны-даа узуткап турган мен.

²⁴ Ынчалза-даа Вавилонну, Халдеяның шупту чурттакчыларын, оларның Сионга үүлгеткен бүгү бузуду дээш, силер көрүп туруңарда, кезедир мен – деп, Дээрги-Чаяакчы медеглээн. –

²⁵ О, бедик даг ышкаш узуткакчы Вавилон, Мен сеңээ удур мен – деп, Дээрги-Чаяакчы медеглээн. – Сен бүгү чер-делегейни хоозурадып турдуң, Мен ам сенче холум көдүрер мен, сени хаялардан дүжүр октаар мен, өртең даг кылып каар мен.

²⁶ Улус сээң даштарыңны хана база бажың таваа кылыр дээш албас, сен кезээ мөңгеде бузундулар бооп артар сен – деп, Дээрги-Чаяакчы медеглээн. –

²⁷ Чер кырынга туктардан көдүрүңер, өске чоннар аразынга трубадан этсиңер, Вавилонга удур дайынче чоннарны белеткеңер, аңаа удур Арарат, Минни, Ашкеназ деп күрүнелерни ыдалаңар. Аңаа удур шериг баштыңын чорудуңар, мөөң шартылаа дег аъттардан чыңар!

²⁸ Вавилонга удур дайынче чоннарны белеткеңер – Мидияның хааннарын, ооң даргаларын, чагырыкчыларын, оларга чагырткан бүгү күрүнелерни көдүрүңер.

²⁹ Чер сирилеп, шимчей бээр, чүге дээрге Дээрги-Чаяакчының Вавилонга хамаарыштыр бодалы бүдер – вавилон чер чурттакчы чок апаар.

³⁰ Вавилон дайынчылар чаалашпастаар, олар шивээлерге хоруп олуруптар, күжү төнүп, харыксырааш, херээженнер дег апаар. Вавилоннуң бажыңнары өрттенир, хаалга дээктерин адыра шаап кааптар.

³¹ Шапкынчыга уткуштур шапкынчы, айбычыга уткуштур айбычы маңназын, олар Вавилоннуң хаанынга ооң хоорайы бүрүнү-биле эжелеттиргенин дыңнатсын;

³² кежиглерниң эжелеттиргенин, шивээлерниң өрттеттиргенин, дайынчыларның коргушка алысканын дыңнатсын».

³³ Аг-шериглиг Дээрги-Чаяакчы, Израильдиң Бурганы: «Ам бичии болгаш, дайзыннар Вавилоннуң чонун тарааны ажаап алгаш, шаңга бастырары дег аажылаар» – дээн.

^34-35 Сионнуң чурттакчылары: «Вавилоннуң хааны Навуходоносор бисти сыырып, аймаарадыпкан, ол бисти, сава ышкаш, куругладып каан. Амырга-моос дег, ол бисти сыырыпкаш, амданнанып таалап турган; хырнын долдур дыгып алган, а оон үндүр бүлгүрүпкен. Вавилон бистиң мага-бодувусту үзе-чаза тыртып кааны дээш буруу чүктезин!» – деп чугаалап тур. Иерусалим: «Халдейлер мээң ханымны төккени дээш харыылазын!» – деп чугаалап тур.

³⁶ Ынчангаш Дээрги-Чаяакчы мынча дээн: «Мен сеңээ болчур мен, сээң өжээниң негээр мен, оларның далайы база сугларының баштары соглу бээр кылып каар мен!

³⁷ Вавилон бузундулар оваазы, шөө-бөрүлер чурттаар чер апаар, хоозурал биле кочулалга чыгадыр, аңаа чурттаар кижи тывылбас.

³⁸ Бүгү халдейлер арзылаңнар дег ырланып тур, аныяк арзылаңнар дег алгыржып тур.

³⁹ Олар изиргени бээрге, оларга дой кылыр мен база хөглезиннер дээш эзиртир ижиртир мен, олар оон мөңге уйгузу-биле удуй бергеш, черле одунмас – деп, Дээрги-Чаяакчы медеглээн. –

⁴⁰ Мен оларны хойлар дег, кошкарлар биле хуналар дег, дөгерер дээш сүрүп аппаар мен!

⁴¹ Сесах эжелеттирер-дир, бүгү чер-делегейниң алдаржыткан хоорайы чаалаттырар-дыр! Вавилон чоннар аразынга коргунчуг үлегер-чижек апаар-дыр.

⁴² Вавилоннуң кырынга далай чаттылар, дааш-шимээнниг чалгыглар ону хөме алыр.

⁴³ Ооң хоорайлары хоозурап, кургап калган ээн хову, кым-даа чурттавас чер апаар, кижи амытан ону таварып эртпес.

⁴⁴ Мен Вавилонда Вил бурганны кезедир мен, ооң ажырыпкан чүвезин аксындан ушта тыртар мен, чоннар моон соңгаар олче чыглып келбес. Вавилоннуң ханазы кээп дүжер!

⁴⁵ Мээң чонум, Вавилондан үнүп чор! Дээрги-Чаяакчының кыптыккан килеңинден амы-тыныңар камгалаңар!

⁴⁶ Чүрээңер корткаш, сокпайн барбазын, чер кырында нептерээн медээлерден кортпаңар. Бир чылын медээ дыңналыр, өске чылын – катап база дыңналыр: „Чер кырында – күчүлел, бир чагырыкчы өске чагырыкчы-биле дайылдажыр!“

⁴⁷ Вавилоннуң дүрзү-бурганнарын кезедир үем чоокшулап келди! Ооң бүгү чери дорамчыладыр, бүгү өлүрткен улус аңаа чыдар.

⁴⁸ Чер биле дээр, оларда бар бүгү чүве Вавилоннуң буурааны дээш өөрүп-байырлаар, чүге дээрге Вавилонче соңгу чүктен узуткакчылар чедип кээр – деп, Дээрги-Чаяакчы медеглээн. –

⁴⁹ Вавилоннуң өлүрген улузу бүгү чер-делегей кырынга кээп дүжүп турган, ынчангаш Вавилон, израильчилерни өлүрүп турганы дээш, боду кээп дүжер.

⁵⁰ Хылыштан чайлап шыдаан улус! Чоруй барыңар, турбаңар, ырак чуртка Дээрги-Чаяакчыны сактыңар, Иерусалим чүрээңерге кадагалаттынып артсын!»

⁵¹ «Адывыс баксыраан-дыр, дорамчылал сөстери дыңнап тур бис, ыядып-човааш, арнывыс кыза берди, чүге дээрге даштыкы кижилер Дээрги-Чаяакчының ыдыктыг өргээзинче кирип келген-дир».

⁵² «Вавилоннуң дүрзү-бурганнарын кезедир үем чоокшулап келди – деп, Дээрги-Чаяакчы медеглээн, – ооң бүгү черинге балыглаттырган улус човууртаар.

⁵³ Вавилон өрү дээрге чедир көдүрүлген-даа болза, бодунуң шивээзин бедикке быжыглап алган-даа болза, Мээң ытканым узуткакчылар аңаа чеде бээр». Дээрги-Чаяакчының медеглээн чүвези ол-дур.

⁵⁴ Вавилонда – ыы-сыы, халдей черде – коргунчуг үрегдээшкин!

⁵⁵ Дээрги-Чаяакчының Вавилонну узуткап турары ол-дур. Ол Вавилоннуң дааш-шимээнин соксадып каар. Дайзыннарның чалгыглары хайнып-мөөрээн суг дег шимээргеп, оларның даашкыр үнү дыңналып турар.

⁵⁶ Вавилонче узуткакчы кел чыдар, Вавилоннуң дайынчылары туттуруп аар, оларның чаларын сыйып каар, чүге дээрге Дээрги-Чаяакчы – кезедикчи Бурган Вавилонга чогуур кеземчени көргүзер.

⁵⁷ «Мен Вавилоннуң нояннарын, мерген угаанныгларын, даргаларын, чагырыкчыларын эзиртир ижиртир мен, олар мөңге уйгу-биле удуп калгаш, одунмас» – деп, Аг-шериглиг Дээрги-Чаяакчы деп аттыг Хаан медеглээн.

⁵⁸ Аг-шериглиг Дээрги-Чаяакчы: «Вавилоннуң кылын ханаларын таваанга чедир үреп бузуп каар, ооң бедик хаалгалары өрттенип каар. Чоннар хей-ле ажылдаан-дыр, аймактар хей-ле шаан төдүп турган-дыр. Бүгү чүвени от чиптер» – дээн.

Иеремияның Вавилонче сөс чорутканы

⁵⁹ Иеремия медээчиниң Маасеяның оглунуң оглу, Нирияның оглу Серайяга, кажан ол Иудеяның хааны Седекияның чагыргазының дөрткү чылында хаан-биле кады Вавилонче чорупканда, дамчыткан сөзү ол-дур. Серайя дээрге хаанның чыргал-дыжын харыылаар дүжүмет турган чүве-дир.

⁶⁰ Иеремия Вавилонга таваржыр бүгү айыыл-халапты аңгы дүрүг-номга бижип каан – мында Вавилон дугайында бижээн бүгү чүве ол-дур.

⁶¹ Иеремия Серайяга мынча дээн: «Вавилонга чеде бергеш, дүрүг-номче көргеш, бо сөстерниң шуптузун дыңналдыр номчуур сен.

⁶² Оон: „Дээрги-Чаяакчы, Сен бо черни узуткап каарын, маңаа чурттап турар кижи-даа, дириг амытан-даа артпазын, ол чер кезээ мөңгеде ээнзирээрин шиитпирледиң!“ – деп чугаала.

⁶³ Бо дүрүг-номну номчуп дооскан дораан-на, аңаа даштан чыпшыр баглааш, Евфрат хемче октавыт.

⁶⁴ Оон: „Вавилон база ынчаар ис чок чидер! Мээң олче ыдарым айыыл-халап соонда ол туруп шыдавас, шуут харыксырап каар“ – деп чугаала». Иеремияның сөстери маңаа четкеш, төнген.