Иеремия 49 - Ыдыктыг Библия

Аммон чон дугайында медеглел

¹ Аммон чон дугайында Дээрги-Чаяакчы мынча дээн: «Израильдиң ажы-төлү чок чүве бе? Ооң салгакчызы чок чүве бе? А Милхом бурган чүге Гадтың черин эжелеп алды, ооң чону чүге Гадтың хоорайларында чурттап турарыл?

² Ынчалза-даа үе кээрге, аммон чоннуң Равва хоорайынга дайын-чааның алгы-кышкызы дыңналыр кылып каар мен! – деп, Дээрги-Чаяакчы медеглээн. – Ол хоорай бузундулар оваазы апаар, ооң чанында хоорай-суурлар отка өрттенир, Израиль бодун чагырган улусту боду чагырып эгелээр – деп, Дээрги-Чаяакчы медеглээн. –

³ Эсевон хоорай, ыглап-сыкта, чүге дээрге Гай хоорайны хоозурадыр-дыр! Равва чанында суурларның чурттакчылары, ишкирнигип ыглаңар, качыгдалдың самдар хевин кедиңер, херимнер кыдыы-биле улчуп чоруңар, чүге дээрге Милхом бурганны дайзын ооң бараалгакчылары болгаш нояннары-биле кады тудуп алгаш баар.

⁴ Чүге шынааларың-биле мактанып тур сен? Сээң шынааң кургап каар-дыр! Өскерликчи кыс! Сен эртине-байлааңга идегеп: „Кым менче халдаарыл?“ – деп турдуң.

⁵ Мен силерже бүгү чоок-кавы черлерден коргуушкунну ыдар мен – деп, Аг-шериглиг Дээрги-Бурган-Чаяакчы медеглээн. – Силерни үндүр сывырып, тоо быдарадыптар, улчуп чоруур улусту кым-даа дедир эккеп, чыгбас.

⁶ Ынчалза-даа ооң соонда аммон чонга эки чолду эгидер мен». Дээрги-Чаяакчының медеглээн чүвези ол-дур.

Эдом дугайында медеглел

⁷ Эдом чон дугайында Аг-шериглиг Дээрги-Чаяакчы мынча дээн: «Таанда-ла Теманда мерген угаан артпаан бе, сарыылдыг улус арга-сүме берип шыдавастаан бе, оларның мерген угааны бойлап калган бе?

⁸ Деданның чурттакчылары, хая көрүнмейн, дезип маңнаңар, ханы куйларга чаштына бериңер, чүге дээрге Исавтың үре-салгалынга онаашкан айыыл-халапты ам ыдар мен, ону кезедир үем келген-дир!

⁹ Бир эвес сеңээ кат-чимис чыыкчылары чедип келген болза, олар элээн катты арттырып кагбас бе? Дүне када оорлар кээп чораан болза, олар чүгле бодунга чеже херегил, ынчаны оорлап албас бе?

¹⁰ А Мен Эдомну куругладыр үптээр мен, ооң чүве чажырар черлерин ажыдар мен, ооң чону чаштып шыдавас! Ол чок апаар, ооң үре-салгалы, ха-дуңмазы база кожалары узуткаттырар.

¹¹ Эдом бодунуң өскүстерин Меңээ арттырып кагзын, оларның амы-тынын кадагалаар мен, ооң дулгуяк херээженнери Меңээ идегеп болур!»

¹² Дээрги-Чаяакчы мынча дээн: «Кеземчеге таварышпас ужурлуг улус безин бо дашканы төндүр ижер! Кай, сен кеземчеден чайлаар сен бе? Чок, оон чайлавас сен, бо дашканы төндүр ижер сен!

¹³ Бодум-биле даңгыраглап тур мен! – деп, Дээрги-Чаяакчы медеглээн, – Восора хоорай коргунчуг байдалга, бак атка киреринге, хоозуралга болгаш каргышка чыгаттырган, аңаа чагырткан бүгү хоорайлар кезээ мөңгеде бузундулар бооп хуулар».

¹⁴ Дээрги-Чаяакчыдан келген медээни дыңнаан мен. «Шерииңер чыып, Эдомга удур чаалажып үнүңер!» – деп медээ чедирзин дээш айбычы кижини чорудупкан болган.

¹⁵ «Мен сени чоннар аразынга чөгенчиг чон кылып каар мен, улус аразынга аажок бак көрдүрер сен.

¹⁶ Чалымнарда чурттаан, даглар баштарын ээлээн чон, бодуңнуң түрлүүңге, турамык чорууңга дуурайладып алдың. Эзир куш дег, бедик черге уя тудуп алдың, ынчалза-даа Мен сени оортан дүжүр октаптар мен – деп, Дээрги-Чаяакчы медеглээн. –

¹⁷ Эдом хоозуралга чыгаттырар! Чаны-биле эрткен кижи бүрүзү ооң бузундуларын көргеш, элдепсинер база кочулап сыгырар.

¹⁸ Үреп бузуп каан Содом биле Гоморрага дег, олар-биле кожаланчак хоорайларга дег, Эдомга база чаңгыс-даа кижи чурттавас, ол черге кижи амытан турумчувас – деп, Дээрги-Чаяакчы чугаалаан. –

¹⁹ Иордан хемниң эриинден чечектелген одар-белчиирже үнүп келген арзылаң дег, Мен база эдом чонну далаштырып сывыртап, ону чагырар кижини шилип, томуйлаар мен. Меңээ дөмей кым барыл, Менден кым харыы негээрил? Меңээ удурланып шыдаар кадарчы бар бе?»

²⁰ Ынчангаш Дээрги-Чаяакчының Эдом дугайында шиитпирин, Теманның чурттакчыларынга удур Ооң бодап алган чүвезин дыңнаңар. Дайзын сүрүг малдың хураганнарын алгаш баар, ооң кадында Бурган одар-белчиирлерни хоозурадып каар.

²¹ Эдом буступ дүжерге, дааш-шимээнден чер сирилээр, ыы-сыы Кызыл далайга чедир дыңналыр.

²² Эзир бедидир ужуп үнгеш, олчазын шүүргедеп, Восораның кырынга чалгыннарын хере сунар! Ол хүн Эдомнуң дайынчылары кортканындан, божаан кадайлар дег, сириңейни бээр.

Дамаск дугайында медеглел

²³ Дамаск дугайында медеглел бо-дур. Хамат биле Арпад хоорайлар багай медээ дыңнааш, мөгүдээр. Олар, чалгып-хөлзээн далай дег, кортканындан кыймыңайнып, оожургап чадажыр.

²⁴ Дамаск харыксырап каар, дезип ыңай боор, ол коргуп-сирилей бээр, божаан херээжен дег, аарышкы, хилинчекке бүргедир.

²⁵ Алдарлыг база өөрүнчүг турган хоорайдан улус дезе бээр.

²⁶ «Ол хүн Дамаскының кудумчуларынга аныяк оолдар кырлып каар, ооң дайынчылары шупту өлүп каар – деп, Аг-шериглиг Дээрги-Чаяакчы медеглээн. –

²⁷ Мен Дамаскының ханаларынче отту ыдар мен, ол от Венадад хаанның шивээлерин чиптер».

Араб аймактар дугайында медеглел

²⁸ Вавилоннуң хааны Навуходоносорнуң чылча шаап кааны Кедар биле Асор деп күрүнелер дугайында Дээрги-Чаяакчы мынча дээн: «Кедарга удур дайылдажып үнүңер, чөөн чүктүң аймак-чоннарын узуткаңар!

²⁹ Оларның чадырларын, сүрүг малын хунаап алыңар, шывыг пөстерин, эт-херекселин, тевелерин ап алыңар, оларже: „Долгандыр – коргуш!“ – деп алгырыңар.

³⁰ Асорнуң чурттакчылары, дезип маңнаңар, улчуп-тояаңар, ханы куйларга чаштыныңар! – деп, Дээрги-Чаяакчы медеглээн. – Вавилоннуң хааны Навуходоносор силерге хамаарыштыр шиитпир үндүрген, силерге удур бодал бодап алган.

³¹ Амыр-шөлээн, сагыш амыр чурттап орар чонга удур дайылдажып үнүңер – деп, Дээрги-Чаяакчы медеглээн. – Ооң эжик-хаалгазы, дээктери чок-тур, ооң кожазы чок-тур.

³² Оларның тевелерин өске улус олчалап аар, эңдерик сүрүг малын дайзыннар үптеп аар. Кастыын чүлүүр бо аймактарны хаттар-биле тарадыр шавар мен, оларже бүгү чүктерден айыыл-халап ыдар мен – деп, Дээрги-Чаяакчы медеглээн. –

³³ Асор шөө-бөрүлер чурттаар чер апарып, кезээ мөңгеде ээнзирээр, аңаа чаңгыс-даа кижи чурттавас, ол черге кижи амытан турумчувас».

Элам дугайында медеглел

³⁴ Иудеяны Седекия хаан чагырып эгелээнде, Дээрги-Чаяакчының Иеремия медээчиге Элам күрүне дугайында ажыдып чугаалаан сөзү бо-дур.

³⁵ Аг-шериглиг Дээрги-Чаяакчы мынча дээн: «Мен Эламның ча-согунун, ооң кол күжүн, сыяр мен!

³⁶ Мен Эламче чер-делегейниң дөрт ужу-кыдыындан дөрт хатты ыткаш, Эламны ол хаттар-биле тарадыр шавар мен. Чуртунга Эламдан үндүр сывыртаткан улус келбээн чон чок болур.

³⁷ Эламны дайзыннарының мурнунга, ооң өлүмүн күзээн улустуң мурнунга сириледир мен. Эламче айыыл-халап биле Бодумнуң кыптыккан килеңимни ыдар мен – деп, Дээрги-Чаяакчы медеглээн, – ону хылыш-биле истеп-сүрер мен, бүрүнү-биле узуткаар мен!

³⁸ Бодумнуң дүжүлгемни Эламга тургузар мен, ында бар хаанны, нояннарны кыргып-хыдыыр мен – деп, Дээрги-Чаяакчы медеглээн. –

³⁹ Ынчалза-даа келир үеде Эламның чонунга эки чолду эгидер мен». Дээрги-Чаяакчының медеглээн чүвези ол-дур.