Иеремия 48 - Ыдыктыг Библия

Моав дугайында медеглел

¹ Аг-шериглиг Дээрги-Чаяакчы, Израильдиң Бурганы Моав дугайында мынча дээн: «О, Нево хоорай! Ол ат болуп, хоозураар-дыр. Кириатаим хоорай бак атка кирип, эжелеттирер-дир; бедик шивээ бак атка кирип, бустурар-дыр.

² Моавтың ат-алдары ам чок. Дайзыннар Эсевон хоорайга удур бак чүве бодап: „Барып, ол аймакты узуткаалы!“ – деп турар-дыр. Мадмена хоорай, сен база өлүр сен, хылыш сени сүрүп чедер.

³ Хоронаимде: „Буурадып, үреп бузуп тур!“ – дээн ыы-сыы дыңналыр.

⁴ Моав чылча шаптыртыр, ооң ажы-төлүнүң ыы-сыызы дыңналыр.

⁵ Лухитче үнүп бар чыдар улус соксаал чок ыглажыр, Хоронаимче бадар орукта ажыг-шүжүгнүң, хилинчектиң уё-човууру дыңналыр.

⁶ Дезип, амы-тыныңар камгалаңар! Ээн кургаг ховуда чадаң үнүш дег болуңар.

⁷ Ажыл-херектериңерге, эртине-байлааңарга идегээн болгаш, силер база туттуруп аар силер. Хамос бурганны, ооң бараалгакчыларын, нояннарын дайзын база тудуп алгаш баар.

⁸ Узуткакчы кайы-даа хоорайны оюп эртпес, кандыг-даа хоорай камгалал албас, шынаа чурттакчы чок артар, оргулааш ээнзирээр». Дээрги-Чаяакчы ынча дээн-дир.

⁹ «Моавка чалгындан бериңер, ол ужуп чоруй барзын. Ооң хоорайлары хоозураар, чурттакчы чок артар.

¹⁰ Дээрги-Чаяакчының ажыл-херээ дээш кыспас кижи каргаттырар, бодунуң хылыжын хан шылба кылбас кижи каргаттырар!

¹¹ Моав, турнуккан арага дег, аныяандан-на амыр-шөлээн чораан. Ону бир савадан өске саваже солуй кутпаан, тудуп аппарбаан – ооң амданы биеэги хевээр арткан, чаагай чыды өскерилбээн.

¹² Ынчангаш кажан Мен дайзыннар чорудуптарымга, олар ону төптер, саваларны куругладыр, доңгаларны чуура шавар үе чедип кээр – деп, Дээрги-Чаяакчы медеглээн. –

¹³ Бодунуң идегели боор Вефил дээш Израильдиң бак атка киргени дег, Хамос бурган дээш Моавтың ады баксыраар.

¹⁴ Силер хей черге: „Бис дидим бис! Дайын-чаага күчүлүг дайынчылар бис!“ – деп тур силер.

¹⁵ Моав хоозураар, ооң хоорайлары эжелеттирер, эки дээн аныяк оолдарны өлүрер дээш аппаар – деп, Аг-шериглиг Дээрги-Чаяакчы деп аттыг Хаан медеглээн. –

¹⁶ Моавтың буураар үези чоокшулаан, ооң айыыл-халавы кончуг дүрген чоокшулап орар.

¹⁷ Бүгү кожа чоннар, ооң адын билир бүгү улус, ол дээш ыглап-сыктап: „Аа халак! Күчү-күштүг, алдарлыг аймакты чылча шаап кагды!“ – деп халактаңар.

¹⁸ Дивоннуң чурттакчылары, алдар-хүндүлүг черден дүшкеш, када берген черже олуруп алыңар – Моавтың хоозурадыкчызы силерже кел чыдыр, ол шивээлериңерни үреп бузуп каар.

¹⁹ Ароерниң чурттакчылары, орук кыйыынга туруп алгаш, көрүңер, дириг арткаш, дезип үнген улустан: „Чүү болду?“ – деп айтырыңар.

²⁰ Моавтың ады баксыраар, ону узуткап каар. Ишкирнигип ыглап-сыктаңар, Арнон хем эриинге Моавтың хоозураанын чарлаңар.

^21-24 Оргулаашта хоорайларны – Халон, Иааца болгаш Мефаатты, Дивон, Нево болгаш Бет-Дивлатаимни, Кириатаим, Бет-Гамул болгаш Бет-Меонну, Кериот болгаш Восораны база моав черде ыракта-даа, чоокта-даа бүгү хоорайларны шиидер-дир.

²⁵ Моавтың күчү-күжүн чок кылып каар, ооң эрге-чагыргазын дүжүрүп каар – деп, Дээрги-Чаяакчы медеглээн. –

²⁶ Моавты эзиртир ижиртип калыңар, чүге дээрге ол Дээрги-Чаяакчыга удур бодун өрү көрдүнүп турган-дыр! Моав кускузунга боражып чытсын, улуска кочулатсын.

²⁷ Сен Израиль дугайында кочуланып, бажыңны дорамчылалдыг чайып турдуң, а ол туттургаш, бак атка кирген ооржу эвес-тир.

²⁸ Моавтың чурттакчылары, хоорайларыңар кааптыңар, хаялар аразынга чурттаңар! Хая чарыктарынга уя тудар черлик көге-бугалар дег болуңар».

²⁹ Моавтың улуургааның дугайында, аажок турамыының дугайында, ооң туразының улуунуң, улуургааның, идээргээниң дугайында, ооң хөңнүнүң улуунуң дугайында дыңнаан бис.

³⁰ «Мен ооң бардамын билир мен – деп, Дээрги-Чаяакчы медеглээн. – Ооң көөргеттинер чоруу хоозун меге-дир, ооң ажыл-херээ – меге-дир».

³¹ Ынчангаш Моавтың бүгү чону дээш ишкирнигип ыгладым; Кир-Харешеттиң улузу дээш кажыыдап тур мен.

³² Сивмада виноград шөлү, сен дээш ыглааным Иазер дээш ыглаанымдан качыгдалдыг-дыр. Сээң виноградың сыптары далай ындынче, Иазерге чедир чаттылып турган болгай. Сээң чайгы чимизиңни, бышкан салбактарыңны узуткакчы үзе тыртып тур.

³³ «Дүжүткүр моав чер өөрүшкү, хөглел чок артар. Виноград арагазы бүдүрерин соксадыр мен. Кым-даа ыр-шоор-биле виноградын таптай баспас – олар өөрүшкүден эвес, а өске чылдагаан-биле алгыржыр.

³⁴ Эсевондан Элеалеге чедир ыы-сыы дыңналып тур, ында чурттаан улустуң алгы-кышкызы шуут-ла Иаацага чедир, Сигордан Хоронаимге чедир, Эглат-Шелишияга чедир дыңналып тур, чүге дээрге Нимримниң суу соглуп каар-дыр.

³⁵ Мен Моавта бедик черлерге өргүлдер салган, дүрзү-бурганнарынга айдызаашкын кылган бүгү улусту узуткаар мен!» – деп, Дээрги-Чаяакчы медеглээн.

³⁶ Ынчангаш мээң чүрээм Моав дээш шоор ышкаш ыглап тур! Кир-Харешеттиң чурттакчылары дээш мээң чүрээм шоор ышкаш ыглап тур, чүге дээрге оларның бүгү өнчү-хөреңгизи чок апарган-дыр.

³⁷ Олар шупту муңгаралдан бажын дөңгүрертир таартып, салын чүлүп алган, холунга кезиглер кылып алган, оларның белинде качыгдалдың самдар хеви орааттынган.

³⁸ «Моавта бажың бүрүзүнде, кудумчу санында ыы-сыы дыңналыр. Чүге дээрге Мен Моавты херекчок сава дег чуура шаап каар мен – деп, Дээрги-Чаяакчы медеглээн. –

³⁹ Ол дээш улус ыглажып: „Моав чылча шаптырган-дыр! Аа халак! Моав бак атка кирип, дезипкен-дир!“ – деп чугаалаар. Моав кочу-шоот бооп хуула бээр, бодунуң бүгү кожа чоннарынга коргунчуг үлегер апаар».

⁴⁰ Дээрги-Чаяакчы мынча дээн: «Эзир шүүргедеп ужуп үнер, ол Моавтың кырынга чалгыннарын хере сунар!

⁴¹ Моавтың хоорайлары эжелеттирер, ооң шивээлерин дайзын чаалап аар. Ол хүн Моавтың дайынчылары кортканындан, божаан кадайлар дег, сириңейни бээр.

⁴² Моав чон бүрүнү-биле узуткаттырар, чүге дээрге ол Дээрги-Чаяакчының мурнунга бодун өрү көрдүнген-дир.

⁴³ Моавтар, коргунчуг байдал, оңгар болгаш какпа-дузак – силерни манап турар үлүг ол-дур – деп, Дээрги-Чаяакчы медеглээн. –

⁴⁴ Коргунчуг байдалдан дескен кижи оңгарже кээп дүжер, оңгардан үне берген кижи какпа-дузакка туттурар, чүге дээрге Мен Моавка удур кеземче үези доктаадыр мен – деп, Дээрги-Чаяакчы медеглээн. –

⁴⁵ Дескен улус Эсевоннуң ханазының адаанга, чилчии үстүп, доктаай бээр. А Эсевондан от, Сигоннуң хоорайындан чалбыыш өөскүп үнгеш, Моавтың кастыын, шуугакчыларның тейин өрттедир.

⁴⁶ Моав, ат болур сен! Хамос бурганның чону узуткаттырар. Сээң оглу-кызыңны дайзын тудуп алгаш баар.

⁴⁷ Ынчалза-даа келир үеде Мен Моавтың чонунга эки чолду эгидер мен». Дээрги-Чаяакчының медеглээн чүвези ол-дур. Моавка үндүрген шииткел мооң-биле төнген.