Иеремия 46 - Ыдыктыг Библия

Египет дугайында медеглел

¹ Дээрги-Чаяакчының Иеремия медээчиге өске чоннар дугайында ажыдып чугаалаан сөзү бо-дур.

² Египет дугайында база Египеттиң фараону Нехаонуң Евфрат хемниң эриинде Кархемис хоорайга турган аг-шерииниң дугайында медеглел бо-дур. Ол аг-шеригни Вавилоннуң хааны Навуходоносор Иосияның оглу, Иудеяның хааны Иоакимниң чагыргазының дөрткү чылында чылча шапкан чүве-дир.

³ «Дозуг-камгалалдарыңар, чыдаларыңар белеткеңер, дайынче далажыңар,

⁴ аъттарыңар эзертээш, халдып үнүңер, аъттыг кижилер! Куяк бөргүңер кеткеш, чыскаалыңар, чыдаларыңар баштарын чидидиңер, куяк хептен кедиңер!

⁵ Көрүп тур мен. Олар коргуп-сүртээш, дезипти, күштүг дайынчылары кырдырып алды. Хая көрүнмейн дезип-ле турлар, долгандыр коргуш бар-дыр – деп, Дээрги-Чаяакчы медеглээн. –

⁶ Дүрген маңнаар-даа кижи дезип шыдавас, күштүг-даа кижи камгаланып шыдавас. Соңгу чүкте чуртка, Евфрат хемниң эриинге тептигип кээп дүшкеш, олар кырлып калды.

⁷ Бо кым, Нил хем ышкаш, диргелип келди? Ооң суу, шапкын агым дег, дажып тур.

⁸ Египет, Нил хем ышкаш, көдүрлүп келген, шапкын агым дег дажып тур. Ол: „Диргелгеш, чер-делегейни хөме аптар мен, хоорайларны, чурттакчы чонну чок кылыр мен!“ – дээн.

⁹ Халдыңар-ла, аъттар! Маңнадыңар-ла, дайынчы тергелер! Күштүг дайынчылар: дозуг-камгалалдыг эфиоптар, ливийлер, чаларын хере тырткан лидийлер – тулчуп үнзүн!

¹⁰ Ол хүн болза Аг-шериглиг Дээрги-Бурган-Чаяакчының шииткелиниң хүнү-дүр, Ооң дайзыннардан өжээн негээр хүнү-дүр! Хылыш кыргып-хыдып, тодар, оларның ханын пөктүр ижип аар – ол дээрге Аг-шериглиг Дээрги-Бурган-Чаяакчыга соңгу чүкте чуртка, Евфрат хемниң чанынга кылган өргүл-дүр.

¹¹ Галаадче баргаш, эм бальзамдан ап ал, күжүр Египет-кыс! Ынчалза-даа эм-таңны хей черге чыыр сен. Экирип шыдавас сен.

¹² Сээң адың баксыраанын өске чоннар дыңнап каан, сээң алгы-кышкың бүгү чер-делегейде дыңналып тур. Чүге дээрге күштүг дайынчылар бот-боттарынга тептиккеш, чаңгыс угда кээп дүшкен».

¹³ Вавилоннуң хааны Навуходоносор келгеш, Египетти чылча шавар дугайында Дээрги-Чаяакчының Иеремия медээчиге ажыдып чугаалаан сөзү бо-дур:

¹⁴ «Египетке медээлеңер, Мигдол, Мемфис биле Тафнис хоорайларга мону чарлаңар: „Чыскаалыңар, белен болуңар, чүге дээрге долгандыр турар бүгү чүвени хылыш кыргып-хыдып тур!“

¹⁵ Чүге сээң күштүг бугаң ойта кээп дүшкенил, чүге ол шыдашпааныл? Ону Дээрги-Чаяакчы ойтур октапкан.

¹⁶ Хөй улус бот-боттарынга тептиккеш, кээп дүжүп, бот-боттарынга: „Тураалыңар, төрел чонувус, төрээн черивисче дедир чанаалы, кызагдакчының хылыжындан камгаланыыл!“ – деп тур.

¹⁷ Египеттиң фараонунга „Үезин эрттирип алган шуугакчы“ деп шоладан тыпсыңар.

¹⁸ Дириг Бодумнуң адым-биле даңгыраглап тур мен: даглар аразында Фавор даг дег, далай чанында Кармил даг дег улуг-шыырак дайзын силерге чедип кээр – деп, Аг-шериглиг Дээрги-Чаяакчы деп аттыг Хаан медеглээн. –

¹⁹ Египеттиң чурттакчылары, эт-севиңер чыып, өскээр көжеринге белеткенип алыңар! Чүге дээрге Мемфис хоозураар, ону үреп бузар, аңаа чурттакчы артпас.

²⁰ Египет – чараш инек-тир, олче соңгу чүктен шаашкак ужуп кээп-ле, ужуп кээп-ле турар.

²¹ Египетте хөлезилеттинген шериглер – семис бызаалар – база дезиптер, шупту маңнажып ыңай боор, чайгылыш чок туржуп шыдавас, чүге дээрге оларга айыыл-халап хүнү, кеземче көөр үе чедип кээр.

²² Египет чылан ышкаш шиигейнип, ыңай союп бар чыдар, дайзыннар олче дайылдажыр дээш кел чыдар, ыяш кезикчилери дег, балдыларлыг чоокшулап орар.

²³ Олар ооң эрттинмес арга-арыын кезип кааптар – деп, Дээрги-Чаяакчы медеглээн, – чүге дээрге дайзыннар шартылаадан хөй, эмге-тикчок.

²⁴ Египет-кыс ады баксырап, соңгу чүктүң чонунуң холунче кирер».

²⁵ Аг-шериглиг Дээрги-Чаяакчы, Израильдиң Бурганы мынча дээн: «Фивы хоорайда Амон бурганны, фараонну болгаш бүгү Египетти кезедир мен, фараонну болгаш аңаа идегээр бүгү улусту, ол чурттуң бурганнарын, хааннарын кезедир мен!

²⁶ Мен оларны шуптузун оларның амы-тынын үзүксээн улустуң холунга: Вавилоннуң хааны Навуходоносорнуң, ооң дүжүметтериниң холунга хүлээдир мен. Ынчалза-даа ооң соонда Египетти, эрткен үеде ышкаш, улус ээлеп чурттаар – деп, Дээрги-Чаяакчы медеглээн. –

²⁷ А сен, Мээң чалчам Иаков, кортпа, Израиль, сүрээдеве! Мен сени камгалаар мен, ырак чурттан дедир эккээр мен, сээң үре-салгалыңны туттуруушкунда турары чурттан дедир чандырар мен. Иаков ээп келгеш, амыр-тайбың, хостуг-шөлээн чурттаар, ону кым-даа коргудуп-дүвүретпес.

²⁸ Мээң чалчам Иаков, кортпа – деп, Дээрги-Чаяакчы медеглээн, – чүге дээрге сээң-биле кады мен! Оларның аразынче сени үндүр сывырыпканым бүгү чоннарның когун үзер мен, а сени узуткавас мен. Ындыг-даа болза, сени чөптүү-биле кезедир мен, кеземче чок арттырбас мен!»