Иеремия 30 - Ыдыктыг Библия

Дээрги-Чаяакчының идегелди аазааны

¹ Дээрги-Чаяакчының Иеремияга ажыдып каан сөзү бо-дур.

² Дээрги-Чаяакчы, Израильдиң Бурганы мынча дээн: «Мээң сеңээ чугаалаан бүгү чүвемни дүрүг-номга бижип каг.

³ Чүге дээрге үези кээрге, Мээң чонумга, Израиль биле Иудеяга, эки чолду эгидер мен – деп, Дээрги-Чаяакчы медеглээн, – оларның ада-өгбезинге берген черимче оларны дедир чандырар мен, олар ынчан черин ээлеп чурттаар».

⁴ Дээрги-Чаяакчының Израиль биле Иудея дугайында чугаалаан сөстери бо-дур.

⁵ Дээрги-Чаяакчы мынча дээн: «Коргуушкун биле девидээшкин кышкызы дыңналып тур – амыр-тайбың чок-тур!

⁶ Айтырып, боданып көрүңер! Эр кижи божуп шыдаар бе? А чүге Мен көөрүмге, эр улус, божаан кадайлар дег, белинден туттунуп алганыл? Чүге оларның арыннары ак тос апарганыл?

⁷ Аа халак! Ол өндүр улуг хүн-дүр, аңаа дөмейлежир хүн чок. Израильге айыыл-халап үези кээри ол-дур, ынчалза-даа ол тын-менди үнер.

⁸ Ол хүн кээрге, Мен сээң мойнуңда хомутту чуура шаап, моожаңны үзе тыртар мен – деп, Аг-шериглиг Дээрги-Чаяакчы медеглээн. – Ынчан Мээң улузум даштыкы улуска бараан болбайн баар,

⁹ а боттарының Бурганы, Дээрги-Чаяакчыга база оларның бажынга Мээң салып каарым боттарының хааны – Давидтиң салгакчызынга бараан болуп эгелээр.

¹⁰ А сен, Мээң чалчам Иаков, кортпа – деп, Дээрги-Чаяакчы медеглээн, – Израиль, сүрээдеве! Мен сени камгалап, ырак чурттан дедир эккээр мен, үре-салгалыңны – туттуруушкунда турары чурттан дедир чандырар мен. Иаков ээп келгеш, хостуг-шөлээн, амыр-тайбың чурттаар, ону кым-даа коргудуп-дүвүретпес.

¹¹ Чүге дээрге Мен сээң-биле кады мен – деп, Дээрги-Чаяакчы медеглээн, – Мен сени камгалаар мен! Оларның аразынга сени тоо быдаратканым бүгү чоннарның когун үзер мен, а сени узуткавас мен. Ындыг-даа болза, сени чөптүү-биле кезедир мен, кеземче чок арттырбас мен!»

¹² Дээрги-Чаяакчы мынча дээн: «Балыгларың эмнеттинмес-тир, кемдээшкиниң аар-дыр!

¹³ Сээң херээң дээш кым-даа сагыш салбас-тыр, балыгларыңга эм-таң чок-тур, экиртир эмнеттинмес-тир сен.

¹⁴ Хандыкшааннарың шупту сени уттупкан, сеңээ келиксевес апарган. Дайзыннарың согугларын сенче угландырдым, каржы-дошкуну-биле кезеттим, чүге дээрге кем-бурууң улуг-дур, бачыттарың эңдерик-тир.

¹⁵ Балыгларың дээш, аар кемдээшкиниң дээш чүге човууртап алгырар сен? Кем-бурууң улуг-дур, бачыттарың эңдерик-тир, ынчангаш Мен сени ынчаар аажыладым.

¹⁶ Ындыг-даа болза, сени сыырып турганнарның боттарын сыырар, сени кызып-кыйып турган улусту тудуп алгаш баар! Сени үптеп турганнар боттары үптеттирер, сенден олча-тывыш ап турган улус боттары олча-тывыш боор кылып каар мен!

¹⁷ Сени улус кагдырган деп санап: „Сион бо-дур, ол ам кымга-даа херекчок апарды!“ – деп турза-даа, Мен сени экиртип, балыгларыңны эмнээр мен». Дээрги-Чаяакчының медеглээн чүвези ол-дур.

¹⁸ Дээрги-Чаяакчы мынча дээн: «Мен Израильдиң чадырларын катап тигер мен, ооң бажың-балгадын кээргээр мен! Бузундулар шыпкан тейлер кырынга хоорайлар туттунар, ордулар биеэги туружунга туттунуп туруптар.

¹⁹ Улус-чон мактал тудуп мөргүүр, өөрүп алгыржыр. Мен оларны өстүрүп-көвүдедир мен – олар моон соңгаар эвээжевес; оларны алдаржыдар мен – олар куду көрдүрбес.

²⁰ Оларның оолдары шаандагы үеде дег чурттаар, оларның ниитилели Мээң мурнумга быжыгар, оларны кызып-кыйган улусту кезедир мен!

²¹ Оларның баштыңы – боттарының бирээзи болур, чагырыкчызы – боттарының аразындан үнер. Мен ону чоокшуладып аар мен, ол Меңээ чоок апаар. Кижи боду Менче чоокшулап диттикпес болгай – деп, Дээрги-Чаяакчы медеглээн. –

²² Силер Мээң чонум болур силер, Мен – силерниң Бурганыңар болур мен!»

²³ Дээрги-Чаяакчының шуурганы килеңнии-биле көдүрүлдү! Коргунчуг казыргы бузуттугларны хөме ап, бажын алыр!

²⁴ Дээрги-Чаяакчы Бодунуң чүрээнде бодалдарын күүседип, боттандырбаан шаанда, Ооң өөскүп үнген килеңи оожургавас. Келир үеде силер ону билип аар силер.