Иеремия 23 - Ыдыктыг Библия

Давидтен укталган чөптүг-шынныг хаан

¹ Дээрги-Чаяакчы: «Мээң коданымда хойларны чок кылып, тарадыр сывырып турар кадарчылар ат болур!» – деп медеглээн.

² Мээң чонумну кадарып турар чагырыкчыларга Дээрги-Чаяакчы, Израильдиң Бурганы: «Мээң хойларымны тоо быдарадыр сывырыпкан, оларже сагыш салбаан силер. Мен ам бузуттуг үүлгедиглериңер дээш силерни кезедир мен – деп медеглээн. –

³ Хойларымның артынчызын үндүр сывырыпкан бүгү чурттарымдан чыып алгаш, төрээн аал-оранынче дедир чандырар мен. Олар ынчан өзүп-көвүдээр.

⁴ Чагырыкчылар кылдыр Мээң томуйлап каар улузум оларны кадарар. Хойларым оон ыңай коргуп-сүрээдевес, чиде бербес». Дээрги-Чаяакчының медеглээн чүвези ол-дур.

⁵ «Үези кээрге, Давидтиң салгакчызын, чөптүг-шынныг Өзүмнү өрү көдүрер мен – деп, Дээрги-Чаяакчы медеглээн. – Ол хаан чагырып эгелээш, мерген угаанныын көргүзүп, чер кырынга шын шииткел биле чөптүг чорукту доктаадыр.

⁶ Ооң чагырар үези кээрге, Иудея камгалал алыр, Израиль айыыл чок чурттаар. Ол хаанга „Яхве-Седкену“ деп ат тыпсыр.

⁷ Улус: „Израиль чонну Египеттен үндүре берген дириг Дээрги-Чаяакчының ады-биле!“ – деп даңгыраглавас апаар хүннер кээр – деп, Дээрги-Чаяакчы медеглээн. –

⁸ Харын улус: „Израиль чонну соңгу чүкте черден үндүре берген дириг Дээрги-Чаяакчының ады-биле!“ – деп бир өскээр чугаалааш, Мээң оларны үндүр сывырыпканым бүгү чурттардан дедир чанып келгеш, боттарының черинге чурттаар».

Меге медээчилер дугайында

⁹ Бурганның медээчилериниң дугайында. Чүрээм чарылгыже саргып, соп тур, бүгү сөөктерим мунчурады. Дээрги-Чаяакчының ыдыктыг сөстериниң ужун Ооң мурнунга эзирик кижи дег, арагага алыскан кижи дег апардым.

¹⁰ Чер кырын самыыраан улус долган, каргаттыргаш, чер ыглап турар – ховуда оът-сиген кадып калган. Ол улустуң сорулгазы – бузут, оларның күжү – чөптүг эвес чорук.

¹¹ «Бурганның медээчизи-даа, бараалгакчызы-даа бужартаан-дыр. Оларның бузуттуг үүлгедиглерин Мээң өргээмде безин көрүп тур мен! – деп, Дээрги-Чаяакчы медеглээн. –

¹² Ол дээш, оларның оруу тайгыр апаар, караңгыже шымны бээр. Оларны идерге, кээп дүжерлер. Чүге дээрге кеземче үезинде оларже айыыл-халап ыдар мен! – деп, Дээрги-Чаяакчы медеглээн. –

¹³ Самарияда медээчилеримниң шуут бодал чогун көрген мен; олар Ваал бурганның өмүнээзинден медеглеп турду, Мээң израиль чонумну оруундан астыктырып кагды.

¹⁴ Мээң Иерусалимде медээчилерим коргунчуг чүүл үүлгедип турарын база көрүп тур мен; олар самыыраан, мегеге башкартып чурттап чоруур, бузуттуг хейлерниң холун быжыктырып, деткиир улус-тур, ооң түңнелинде бузуттуг хейлер бак херектерин кагбас-тыр. Мээң мурнумга олар шупту Содом дег, Иерусалимниң чурттакчылары – Гоморра дег!»

¹⁵ Ынчангаш Аг-шериглиг Дээрги-Чаяакчы ол медээчилер дугайында: «Оларны ажыг чашпан-биле чемгерер мен, оларга хоранныг суг ижиртир мен, чүге дээрге Иерусалимде Мээң медээчилерим дээш бүгү чер бужартаан-дыр!» – деп чугаалаан.

¹⁶ Аг-шериглиг Дээрги-Чаяакчы мынча дээн: «Ол медээчилерниң сөстерин, силерге медеглээн чүвезин дыңнаваңар! Олар хоозун сөстер медеглеп, Дээрги-Чаяакчының сөстерин эвес, а боттарының сеткилиниң күзелдерин чугаалап турар.

¹⁷ Олар Мени бак көөр улуска: „Силерге амыр-тайбың турарын Дээрги-Чаяакчы чугаалаан!“ – деп катаптап чугаалаар-дыр. Чөрүү чүрээниң аайы-биле кылып турар бүгү улуска олар: „Айыылга таварышпас силер!“ – дээр-дир».

¹⁸ Ындыг-даа болза, Дээрги-Чаяакчының чөвүлелинге турган, Ооң сөзүн дыңнаан, билип алган кижи бар бе? Ооң сөзүнче кулаан ээктирип, дыңнаан кижи кымыл?

¹⁹ Дээрги-Чаяакчының шуурганы килеңнии-биле көдүрүлдү! Коргунчуг казыргы хөме алгаш, бузуттугларның бажын алыр.

²⁰ Дээрги-Чаяакчы Бодунуң чүрээнде бодалдарын күүседип, боттандырбаан шаанда, Ооң килеңи оожургавас. Келир үеде силер ону кончуг тода билип аар силер.

²¹ «Мен ол медээчилерни айбылап чорутпаан мен, олар боттары маңнажып келди. Мен оларга чүве чугаалаваан мен, харын олар Мээң адым тудуп медеглеп тур!

²² Бир эвес олар Мээң чөвүлелимге турган болза, чонумга Мээң сөстеримни медээлеп, ону бузуттуг оруктан база бак үүлгедигден чайладыр ийик.

²³ Мен чүгле чоок тургаш, Бурган боор мен бе? – деп, Дээрги-Чаяакчы айтырган. – Ырак тургаш, Бурган эвес мен бе?

²⁴ Кандыг-бир кижи Менден чажыт черже чаштына берип шыдаар бе? Мен ону көрбейн баар мен бе? – деп, Дээрги-Чаяакчы айтырган. – Дээр биле черни Мен бүргей ап турар эвес мен бе?» Дээрги-Чаяакчының медеглээн чүвези ол-дур.

²⁵ «Мээң адым тудуп, мегелеп өттүр билип медеглеп турар медээчилер чүү деп турарын дыңнаан мен. Олар: „Мен дүш көрдүм, дүш көрдүм!“ – дээр-дир.

²⁶ Кажанга чедир ынчап кээр улузул? Ол медээчилер мегелеп өттүр билип медеглээр деп, бодунуң сагыжының даап бодаан чүвезин медеглээр деп бодап алган бе?

²⁷ Мээң чонумнуң ада-өгбези Ваал бурганга мөгеер дээш, Мээң адымны утканы дег, ол медээчилер бот-боттарынга чугаалап турар дүштериниң дузазы-биле чонну Мээң адымны уттур кылдыр албадаар бис деп бодаар.

²⁸ Дүш көрген медээчи оозун бодунуң дүжү кылдыр чугаалазын, а Мээң сөзүмнү ажыдып чугаалааным медээчи ол сөстү чонга шынныы-биле медеглезин! Тарааның үрезини биле саваңының аразында дөмей чүү барыл? – деп, Дээрги-Чаяакчы айтырган. –

²⁹ Мээң сөзүм от ышкаш – деп, Дээрги-Чаяакчы медеглээн, – Мээң сөзүм хая-даш чуура шапкан маска ышкаш!

³⁰ Мен ол медээчилерге удур мен! – деп, Дээрги-Чаяакчы медеглээн. – Олар Мээң сөстеримни бот-боттарындан оорлап турар.

³¹ Мен ол медээчилерге удур мен! – деп, Дээрги-Чаяакчы медеглээн. – Олар хей чүве чулчургаш: „Бурганның медеглээн чүвези-дир“ – деп турар.

³² Меге дүштерин чугаалаан медээчилерге удур мен! – деп, Дээрги-Чаяакчы медеглээн. – Олар дүштерин чугаалап, боттарының бардамы-биле, мегези-биле Мээң чонумну будулдуруп турар. Мен оларны айбылап чорутпаан мен, оларга айтыышкын бербээн мен. Олар бо чонга кандыг-даа ажык-дуза чедирбес». Дээрги-Чаяакчының медеглээн чүвези ол-дур.

Дээрги-Чаяакчының сөзү үүрге-чүък бе?

³³ «Иеремия, кажан азы Иудеяның чону, азы Бурганның медээчизи, азы бараалгакчызы сенден: „Дээрги-Чаяакчы кандыг үүрге-чүък чүдүрдү?“ – деп айтырар болза, „Дээрги-Чаяакчы: ‘Силер боттарыңар үүрге-чүък боор силер, а Мен силерни дүжүр октаптар мен’ – деп медеглээн“ – деп харыылаар сен.

³⁴ Бир эвес моон соңгаар азы медээчи, азы бараалгакчы, азы улус-чондан бир кижи „Дээрги-Чаяакчының чүдүрген үүрге-чүъгү“ деп сөстер чугаалаар болза, Мен ол кижини, ооң өг-бүлезин кезедир мен».

³⁵ Бот-боттарыңардан, ха-дуңмаңардан: «Дээрги-Чаяакчы чүү деп харыылады?» – деп азы «Дээрги-Чаяакчы чүү диди?» – деп айтырар ужурлуг силер.

³⁶ «Дээрги-Чаяакчының чүдүрген үүрге-чүъгү» деп сөстерни моон соңгаар сагынмаңар, чүге дээрге кижи бүрүзүнүң сөстери ооң бодунга үүрге-чүък апаар болгай, а Аг-шериглиг Дээрги-Чаяакчы, Дириг Бурганывыстың сөстерин хажыткан-дыр силер.

³⁷ Медээчиден: «Дээрги-Чаяакчы чүү деп харыылады?» – деп азы «Дээрги-Чаяакчы чүү диди?» – деп айтырар ужурлуг силер.

³⁸ Бир эвес силер «Дээрги-Чаяакчының чүдүрген үүрге-чүъгү» деп сөстер чугаалаарын соксатпас болзуңарза, Дээрги-Чаяакчының чүнү чугаалаанын дыңнаңар: «Мен силерге „Дээрги-Чаяакчының чүдүрген үүрге-чүъгү“ деп сөстерни чугаалап болбазын сагындырып турумда-ла, чугаалааныңар дээш,

³⁹ Мен силерни база силерге, ада-өгбеңерге бергеним бо хоорайны уттуптар мен, Бодумдан ырадыр дүжүр октаптар мен!

⁴⁰ Мен силерни кезээ мөңгеде кажан-даа уттундурбас бак атка киирер мен, куду көрүүшкүнге чыгаар мен».