Иеремия 18 - Ыдыктыг Библия

Дой сава кылыкчызы

^1-2 Дээрги-Чаяакчы Иеремияга Бодунуң сөзүн ажыдып каан: «Дой сава кылыкчызының бажыңынче бар, Мен аңаа Бодумнуң сөзүмнү сеңээ чугаалаар мен».

³ Мен дой сава кылыкчызының бажыңынче кирип келгеш, көөрүмге, ол дой сава кылыр херекселиниң артында ажылдап турар болду.

⁴ Дойдан кылып турган савазының хевири үнмейн баарга-ла, ол ону бодунуң бодап алганын ёзугаар өске сава кылдыр эде кылып ап турду.

⁵ Дээрги-Чаяакчы меңээ Бодунуң сөзүн ажыдып:

⁶ «Израиль чон, бо дой сава кылыкчызының кылып турар чүвезин таанда-ла Мен сээң-биле боттандырып шыдавас мен бе? – деп медеглээн. – Ооң холунда дой дег, сен база Мээң холумда сен, израиль чон!

⁷ Мен кажан-даа чон азы күрүне дугайында „Ону дазылы-биле тура тыртып, буурадып, узуткап каар мен“ деп шиитпир хүлээп ап боор мен.

⁸ А бир эвес ону чугаалап каан чонум бодунуң бузудундан ойталаар болза, Мен база өскээр бодай берип, ол чонга таварыштырар дээн айыыл-халавым ытпас мен.

⁹ Мен кажан-даа чон азы күрүне дугайында „Ону быжыглаар, тарып олуртур мен“ деп шиитпир хүлээп ап боор мен.

¹⁰ А бир эвес ол чон Мээң мурнумга бузут үүлгедип, Мээң сөзүмнү тооп дыңнавас болза, Мен база өскээр боданып, аңаа көргүзер дээн ачы-буянымны ытпас мен.

¹¹ Ынчангаш ам Иудеяның чонунга, Иерусалимниң чурттакчыларынга мону чугаала. Дээрги-Чаяакчы: „Мен силерге айыыл-халап белеткеп тур мен, силерге удур сагыштыг мен! Кайыңар-даа бузуттуг оруктан чайлай берзин. Оруктарыңарны, ажыл-херектериңерни экижидип алыңар“ – деп чугаалады дээр сен.

¹² Ынчалза-даа олар: „Хей чүве! Күзээн чүвевис кылыр бис, кижи бүрүзү бодунуң бузуттуг чүрээниң чөрүү чоруунуң аайы-биле кылыр“ – деп харыылаар».

¹³ Ынчангаш Дээрги-Чаяакчы: «Чоннардан айтырып көрүңер, кым ындыг чүве дыңнааныл? Израиль-кыс кончуг багай чүве үүлгетти!

¹⁴ Ливан дагларында хар хаяларлыг ийлерден кажан-даа эрип чидер эвес. Өске черден аккан соок дамырак суглар кажан-даа соглуп төнер эвес.

¹⁵ А Мээң чонум Мени уткан-дыр, чөгенчиг дүрзү-бурганнарга айдызаашкын кылып турар-дыр! Дүрзү-бурганнар чонну оруундан астырарга, ол эрте-бурунгу оруктан өскээр баргаш, ам кокпа орук-биле, оңгул-чиңгил орук-биле бар чыдар-дыр.

¹⁶ Бо чон бодунуң черин хоозураашкынга, мөңге кочулалга чыгаткан-дыр. Ооң чаны-биле эрткен кижи бүрүзү элдепсинип, бажын чаяр.

¹⁷ Мен, күштүг хат дег, оларны дайзыннарының мурнунга тоо быдарадып каар мен, айыыл-халавының хүнү кээрге, оларга арным көргүспейн, хая көрнү бээр мен» – деп чугаалаан.

Иеремияга удур сүлчээ

¹⁸ Ынчалза-даа улус-чон: «Барып, Иеремияга удур сүлчээ кылыылы. Дүрүм-хоойлу – Бурганның бараалгакчыларынга, арга-сүме – мерген угаанныгларга, Бурганның сөзү – Ооң медээчилеринге артып каар-ла болгай! Барып, ону нүгүлдээли, ооң чугаа-сөзүн дыңнаваалы» – деп турган.

¹⁹ Дээрги-Чаяакчы, менче кулааң ээктирем, мээң дайзыннарымның чугаа-сөзүн база дыңнап көрем!

²⁰ Таанда-ла буян дээш бузут-биле харыылаар ужурлуг бе? Мени өлзүн дээш, оңгар казып кагдылар. Сактып келем: мен Сээң өргээңге оларга ачылыг болзун дээш мөргүп, Сээң килеңиңни олардан чайладырын кызып турдум.

²¹ Ынчангаш оларның ажы-төлүн аш-чутка чыгадып көрем, оларны хылышка шаштырып калам! Оларның кадайлары дулгуяк бооп артсын, ажы-төлүн чидирзин, ашактары өлүп калзын, аныяк оолдары дайынга хылыш-биле өлүртсүн!

²² Кажан оларже үптекчилерни хенертен эккээриңге, оларның бажыңнарындан уё-човуур дыңналзын, чүге дээрге олар мени тудуп аар дээш оңгар казып, мээң буттарымга дузак салып каан-дыр.

²³ А Сен, Дээрги-Чаяакчы, оларның меңээ удур кара сагыштыын, мени өлүрер деп турарын билир сен. Оларның кемниг херектерин өршээвейн көрем, оларның бачыттарын эскербээн бооп эрттирбейн көрем! Олар Сээң мурнуңга кээп ушсун – Бодуңнуң килеңнээн үеңде оларны ынчаар аажылап көрем!