Филипчилерге 4 - Ыдыктыг Библия

Бодун канчаар алдынарының дугайында

¹ Ынчангаш, ханы ынак, сактып ийлээн ха-дуңмам, аас-кежиим болгаш шаңналым силер: Дээрги-Чаяакчыга башкарткаш, быжыг туруңар.

² Эводия биле Синтихия, Дээрги-Чаяакчыга бүзүрээниңер ачызында чаңгыс эп-сеткилдиг болу берип көөрүн силерден ээрежип дилеп тур мен.

³ Мээң шынчы эжим, сени база дилеп тур мен: бо херээженнерге дузадан кат. Олар мээң-биле, Климент-биле база амыдыралдың номунче аттарын киир бижээн өске-даа кады ажылдап турар эштерим-биле Буянныг Медээ дээш, эгин кожа туржуп келгеннер болгай.

⁴ Дээрги-Чаяакчы-биле харылзааңар ужун үргүлчү өөрүп-байырлаңар. Катап-катап чугаалаайн: өөрүп-байырлаңар!

⁵ Улуска чөпшүл, буянныг хамаарылгаңар бүгүдеге билдине берзин. Дээрги-Чаяакчы мырыңай чоокта турар.

⁶ Чүү-даа дээш, сагыш човаваңар, харын боттарыңарның дилег-човааңарны Бурганга ажыдып берип, мөргүңер, Аңаа үргүлчү өөрүп четтириңер.

⁷ Ынчан улустуң угаап-билиптер шаандан ажа бээр Бурганның амыр-тайбыңы чүректериңер болгаш угаан-сарыылыңарны Христос Иисусче угланган кылдыр кадагалаар.

⁸ Ха-дуңма, түңнелинде силерге чугаалап каайн, бодалдарыңарны чүгле буянныг болгаш макталга төлептиг чүүлдер-биле иштеп көрүңер: алыс шынныг, чаагай сеткилдиг, чөптүг, арыг база ынакшылга болгаш макталга төлептиг чүүлдер ол-дур.

⁹ Силерниң менден өөренип азы хүлээп алганыңар, көрүп азы дыңнап алганыңар бүгү чүүлдү херек кырында ажыглаңар-ла. Амыр-тайбыңның үнер дөзү Бурган ынчан силер-биле кады боор.

Хайырлал белектер дээш өөрүп четтириишкин

¹⁰ Мен дээш, ам база сагыш човап эгелээриңерге, Дээрги-Чаяакчының мурнунга шын сеткилимден өөрүп тур мен. Ийет, үргүлчү сагыш човап келген болбайн канчаар силер, чүгле ооңарны көргүзүптер аргаңар чок турган-дыр.

¹¹ Кандыг-бир чүве хереглээш, ону чугаалаан деп бодаваңар, чүге дээрге кандыг-даа байдалдарда менде бар чүве-биле сеткил ханып өөренген мен.

¹² Түрегделди-даа, элбекшилди-даа көрүп эрттим, кажан-даа, кандыг-даа байдалдарга чорааш, тодуг азы аш-даа, эңдерик хөй азы эвээш-биче кошкулдуг-даа болзумза, аңаа сеткил ханарының чажыдын ажыдып алган мен.

¹³ Меңээ күштү хайырлап турар Христостуң ачызында чүнү-даа шыдажып эртер мен.

¹⁴ Ындыг-даа болза, мээң бергедээшкиним үлешкеш, эки херекти кылган-дыр силер.

¹⁵ Буянныг Медээни силерниң араңарга суртаалдаарым эгезинде, Македониядан чоруй барган турумда, силерниинден өске, чаңгыс-даа христиан ниитилел мээң чидириглерим болгаш тывыштарымны үлешпейн келгенин эки билир силер, филипчилер.

¹⁶ Фессалоника хоорайга турумда безин, чединмес апарган үемде, чаңгыс эвес удаа дузалаан болгай силер.

¹⁷ Хайырлал белээ дилээш, ынча дивейн-дир мен. Харын кылып турар чүүлүңер силерге ажыктыг үре-түңнелди көвүдедир бээрин күзеп тур мен.

¹⁸ Эпафродитти дамчыштыр чоруткан хайырлал белектериңерни алдым. Мээң хереглелимден-даа хөйнү берген болдуңар, ынчангаш ам хереглээн бүгү чүүлүм бар. Белектериңер – Бурганга таарымчалыг чаагай өргүлдерниң айдызааны дег болду.

¹⁹ Мээң Бурганым база силерниң бүгү хереглелдериңерни Христос Иисусту дамчыштыр Бодунуң өндүр-чаагай эртине-байлактарындан хандырып бээр!

²⁰ Бурганывыс болгаш Адавыска кезээ мөңгеде алдар доктаазын. Аминь.

Түңнел байыр чедириишкиннери

²¹ Христос Иисустуң ыдыктыг улузу апарган бүгү улуска байыр чедирдим. Мээң-биле кады турар ха-дуңма база силерге байыр чедирип тур.

²² Бурганның бүгү ыдыктыг улузу, ылаңгыя императорнуң ордузунда бараан болуп турарлар, силерге байыр чедирип турлар.

²³ Дээргивис Иисус Христостуң авыралы силерниң сеткил-чүрээңерге доктаазын!