Экклесиаст 6 - Ыдыктыг Библия

¹ Чырык черде мындыг човулаң барын көрдүм, улуска ол бо-ла таваржыр-дыр.

² Бурган кижиге бай-байлакты-даа, эт-хөреңгини-даа, алдар-хүндүнү-даа берген дижик, ол кижиниң күзээн-не чүвези бар дижик. Ынчалза-даа Бурган аңаа ол бүгүнүң ажыын көөр арга бербес-тир, а ооң ажыын көңгүс өске кижи көрүп чоруур-дур. Ол база-ла хоозун куруг чүүл болгаш хилинчектиг човулаң-дыр.

³ Кандыг-бир кижи чүс ажы-төлдү төрүп, хөй чыл чурттаан база ооң назыны улам узаан дижик. Ынчалза-даа ол кижиниң сеткили бай-байлаанга өөрүп чыргаваан, а боду безин таптыг ажааттырып хөөржүттүрбээн болза, аңаа көөрде, ара дүжүп, төрүттүнмейн барган төл аас-кежиктиг дээр ийик мен.

⁴ Ол төл хей-бус ышкаш келгеш, караңгыже чорупкан база ооң адын дүмбей бүргээн.

^5-6 Ол төл чырык хүннү көрбээн-даа, билбес-даа болза, 2000-даа чыл чурттааш, чуртталгазынга өөрүп чыргаваан демги кижиге көөрде, амыр-дыштыг. Бүгү-ле улус чаңгыс черже чоруур эвес ийик бе?

⁷ Кижиниң бүгү-ле ажыл-ижи ооң хырны дээш чүве-дир, а ооң сеткили кажан-даа тодуп ханмайн чоруур.

⁸ Мугулайдан мерген угаанныг кижи чүзү-биле дээре деп, чурттап билир-даа болза, ядыы кижи чүзү-биле дээре деп?

⁹ Сеткилиңниң күзеп чорууру четтинмес чүүлден мурнуңда көстүп турар чүүл дээре. Ол база-ла хоозун куруг чүүл болгаш түңнел чок күжениишкин-дир.

Кижиге чүү чүве дээрел

¹⁰ Бар-ла чүве бүрүзү чүл ол дээрзин шагда-ла адап каан, кижи дээрге чүл дээрзи база билдингир, ол оон артык күштүг Бурган-биле маргыжып шыдавас.

¹¹ Сөс көвүдээн тудум, хоозун куруг чүве көвүдеп чоруур: кижиге ол бүгүнүң ажык-дүжүү чүл?

¹² Кижиниң хөлеге дег чурттап эртип турар, хоозун куруг чүүл долган чуртталгазының өйлүг назынында аңаа чүү чүве эки дээрзин кым билир боор? База кижиге ооң соонда чырык черге чүү болурун кым чугаалаар боор?