Экклесиаст 4 - Ыдыктыг Библия

¹ Эргий көргеш, чырык черде үүлгеттинип турар бүгү-ле базымчаны көрдүм: базындыртканнарның караа чаштыг, а оларны аргалаар кижи чок; дарлакчыларның холунда эрге-күш бар-дыр, а дарлатканнарны аргалаар кижи чок-тур.

² Ынчангаш мен чок апарган улусту ам чурттап чоруур улустан артык экизиндим, чүге дээрге өлүглерниң чуртталгазы төнген-дир.

³ А оларның кайызындан-даа дээре салым-хуу – ам-даа төрүттүнмээн, чырык черде дойлуп турар каржы-дошкун херектерни көрбээн кижиде боор чүве-дир.

⁴ Оон аңгыда кандыг-даа ажыл-иш болгаш кандыг-даа чедиишкин кижилер аразында адааргалдан үнүп турарын база көрдүм. Ол база-ла – хоозун куруг чүүл болгаш түңнел чок күжениишкин-дир.

⁵ Мугулай кижи чудуруун чудук адаанче суп алгаш, бодунуң бажын чип чоруур-дур дээрзи шын.

⁶ Ындыг-даа болза, ажыл-иш болгаш улуг күжениишкин-биле чедип алган ийи адыш хиреден амыр-дыштыг оргаш алган чаңгыс адыш хирези дээре.

Чааскаан болуру – берге үүле

⁷ Эргий көргеш, чырык черде оон-даа өске хоозун куруг чүүлдү көрдүм.

⁸ Бир кижи чааскаан, ооң чанында кым-даа чок, ооң оглу-даа, ха-дуңмазы-даа чок дижик; а ооң бүгү-ле ажыл-ижи төнчү чок, бай-байлаанга ооң караа тотпайн чоруур. Ол кым дээш-ле иженип база сеткилинге чыргал көргүспейн чоруурул? Ол база-ла хоозун куруг чүүл болгаш берге үүле-дир.

⁹ Чаңгыс боорундан эштиг болганы дээре, чүге дээрге ийи кижиниң ажыл-ижи эки түңнелдиг.

¹⁰ Чүге дээрге олар барып дүжер болза, бот-боттарын көдүржүп аар. А чаңгыс кижи барып дүжер болза база ону көдүрүп каар эжи чок болза, ат болганы ол.

¹¹ База ол ышкаш ийи кижи кады чыдар болза, оларга чылыг; а чаңгыс кижи канчап чылыгып аарыл?

¹² База ол ышкаш чаңгыс кижини ажып-тиилеп ап болур болза, ийи кижи алыспайн баар. База ол ышкаш үш каът кылдыр ээрип каан удазын белен үзүлбес.

¹³ Арга-сүме хүлээп билбес, кырган-даа бол, угаан чок хаандан ядыы-даа бол, угаанныг аныяк оол дээре.

¹⁴ Чүге дээрге ол хаанның үезинде демги оол ядыы бооп төрүттүнген-даа болза, кара-бажыңдан үнгеш, хааннай берген.

¹⁵ Чырык черде кылаштап чоруур бүгү-ле дириг улус демги хаанның орнун ээлээр амдыы оолактың талазында дээрзин база көрдүм.

¹⁶ Ындыг-даа болза, оларның мурнунда хааннап чораан улусту санап четпес, а келир салгалдар ол оолакты магадавас. Ол база-ла хоозун куруг чүүл болгаш түңнел чок күжениишкин-дир.

Бурган мурнунга хей даңгырактың хоозуну

¹⁷ Бурганның өргээзинче кел чыда, базымыңны кичээп хына. Мугулайлар ышкаш, чүгле өргүл кылыр дээш эвес, а эки дыңнап аар дээш келгениң дээре. Чүге дээрге шын эвес кылып турарын олар боттары билбес-тир.