Экклесиаст 3 - Ыдыктыг Библия

Өй-шак Бурганның холунда

¹ Бүгү чүве өйлүг-шактыг база бо өртемчейде бүгү-ле чүүлге үе турар.

² Төрүүр-даа үе турар, өлүр-даа үе турар; тарыыр-даа үе турар, тарып каан чүүлдү тура тыртар-даа үе турар;

³ өлүрер-даа үе турар, эмнээр-даа үе турар; бузуп үрегдээр-даа үе турар, тудуп кылыр-даа үе турар;

⁴ ыглаар-даа үе турар, каттырар-даа үе турар; кажыыдаар-даа үе турар, хөглээр-даа үе турар;

⁵ даштарны тарадыр октаар-даа үе турар, даштарны чыыр-даа үе турар; куспактаар-даа үе турар, куспактаашкындан ойлаар-даа үе турар;

⁶ дилээр-даа үе турар, чидирер-даа үе турар; кадагалаар-даа үе турар, үндүр октаар-даа үе турар;

⁷ ора тыртар-даа үе турар, тудуштур даараар-даа үе турар; ыыттавас-даа үе турар, чугаалаар-даа үе турар;

⁸ ынакшыыр-даа үе турар, көөр хөөн чок боор-даа үе турар; дайылдажыр-даа үе турар, тайбың чурттаар-даа үе турар.

⁹ Ынчангаш иженип чоруур кижи кылган чүүлүнден кандыг ажык-дүжүк алырыл че?

¹⁰ Кижи күжүн үндүрзүн дээш Бурганның кижи төрелгетенге онаап кааны берге үүлезин көрдүм:

¹¹ Бурган бүгү чүвени чогуур үеде кайгамчык эки боор кылдыр кылып каан, кижи амытанга мөңге өй дугайында бодап чоруур чүректи берип каан. Ындыг-даа болза, кижилер Бурганның кылып турар ажыл-херээн эгезинден төнчүзүнге чедир билип шыдавас.

¹² Ынчангаш оларга өөрүп-хөглээринден болгаш чуртталгазында буян кылырындан дээре чүве чок-тур дээрзин угаап билдим.

¹³ База бир эвес кандыг-бир кижи аштанып-чемненип-даа, бодунуң кандыг-даа ажыл-ижинден таалал ап чоруур болза, ол дээрге Бурган хайыразы-дыр.

¹⁴ Бурганның кылып турар бүгү-ле чүүлү мөңгеде турар дээрзин угаап билдим; аңаа чүү-даа немээр аргажок база оон чүү-даа казыыр аргажок; улус Бургандан кортсун дээш, Ол ынчаар кылып турар.

¹⁵ Ам бар чүүлдер мооң мурнунда-ла турган, моон соңгаар болур чүүлдер бо үеде болуп турар. Бурган эрткен үени ээлдириптер болгай.

Өлүм шупту чүвени деңнеп турар

¹⁶ Чырык черде оон өске көргеним бо: шииткел черинде-даа бузут бар болду, чөптүг-шынныг чорук турар ужурлуг черде-даа бузут бар болду.

¹⁷ Ынчан мен сагыш-чүрээмде: «Чөптүг-шынныг-даа кижини, бузуттуг-даа кижини Бурган сайгарып шиидер-дир, чүге дээрге бүгү-ле чүүлге база кандыг-даа ажыл-херекке үе Ооң холунда-дыр» деп чугааландым.

¹⁸ Кижи төрелгетенниң дугайында сагыш-чүрээмде: «Олар боттары мал-маган бис дээрзин билзиннер дээш, Бурган оларны шылгап турар-дыр» деп чугааландым.

¹⁹ Чүге дээрге кижи төрелгетенниң хуу-салымы-даа, мал-маганның салым-хуузу-даа – чаңгыс салым-хуу-дур; оларның өлүрү ышкаш, демгилери база өлүп турар, шуптузунуң тыныжының дөзү чаңгыс-тыр. Кижиниң мал-магандан дээредээр чүзү-даа чок-тур; чүге дээрге бүгү чүве – хоозун куруг чүве-дир!

²⁰ Бүгү-ле дириг чүве чаңгыс черже чоруп турар, олар шуптузу довурак-доозундан тыптып келген база довурак-доозунче катап эгли бээр.

²¹ Кижи төрелгетенниң сүлде-сүнезини өрү үнүп турар бе, дириг амытаннарның сүлде-сүнезини черже бадып турар бе? – ону кым билир боор.

²² Ынчангаш кижиге бодунуң ажыл-ижи дээш өөрүп чыргаарындан дээре чүве тывылбас-тыр дээрзин көрдүм; кижиниң үлүг-хуузу ындыг-дыр, а ооң соонда чүү болурун көөр арганы аңаа кым бээр деп?