Экклесиаст 10 - Ыдыктыг Библия

Өөредиглиг чугаалар

¹ Өлүг сээктер чаагай чыттыг үстү чыдыдып үреп турар, улуг мерген угаанны хензигийне мугулай чорук чая базып турар.

² Мерген угаанныгның чүрээ ону шын талаже углап чоруур, мугулайның чүрээ ону өске талаже углап чоруур.

³ Мугулай кижи бодунуң оруу-биле чоруп чорааш, чүнү-даа чедир угаап билбейн чоруур, база кижи бүрүзүнге ол бодунуң мугулайын көргүзүп чоруур.

⁴ Бир эвес чагырыкчы сенче кылыктаны бээр болза, турган чериңден ырава; серт-бурт эвес бүдүштүг болзуңза, улуг бачыттарың өршээттинер.

⁵ Чагырыкчының частырыы-биле болуп турар, чырык черде көргеним багай чүүл бар-дыр:

⁶ мугулай улусту депшидип турар, а ызыгууртан-байларны адаанче бадырып турар-дыр;

⁷ кулдар аъттыг шаап турарын, а беглер кулдар ышкаш чадаг кылаштажып турарын база көрдүм.

⁸ Оңгар казып турар кижи боду ынаар барып дүжүп болур база херим-хананы үрегдеп турар кижини чылан шаптып болур.

⁹ Даштарны казып ап турар кижи бодун кемдедип ап болур база ыяш чарып турар кижи ооң айыыл-халавынга таваржып болур.

¹⁰ Бир эвес балды шаптылай бээр болза, ону чидидип албаан шаанда, кижи хөй күш үндүрер апаар; маңаа мерген угаан болгаш мергежил ажыктыг.

¹¹ Бир эвес чылан илбичиниң шишпиириниң мурнунда шапкан болза, ооң илби-шидизиниң ам ажыы чүү боор.

¹² Мерген угаанныг кижиниң аксындан үнген сөстер буянныг чаагай, а мугулайның чугаа-сөзү ооң бажын чиир.

¹³ Ооң аксындан үнген сөстүң эгези – мугулай, а ол сөстүң төнчүзү – хоралыг тенек аарыг;

¹⁴ ол хиреде мелегейниң чугаазы хөй. Келир үеде чүү болурун кижи билбес база ол кижиниң соонда чүү болурун аңаа кым чугаалап бээр боор.

¹⁵ Мугулай улустуң ажылы оларның боттарын могадып шыладыр, олар хоорайже чанар оруун безин билбес.

¹⁶ Бир эвес чурттуң хааны чалча уктуг база бир эвес беглери эртен эрте-ле дойлап эгелеп турар болза, ындыг чурт ат болганы ол.

¹⁷ Бир эвес чурттуң хааны бедик уктуг болза база беглери арагалап-дарылаар дээш эвес, а чогуур шагында күш кирип аар дээш чемненип турар болза, ындыг чурт амыр-чыргалдыг.

¹⁸ Чалгаа чоруктан бажыңның дээвиири сандарай бээр, база хол шимчевеске, сери өттүр чаъс дамдылай бээр.

¹⁹ Аъш-чем кижини өөртүр, арага чуртталганы хөгледир, бүгү чүвеге акша-мөңгүн дузалаар.

²⁰ Бодуңнуң бодалдарыңда безин хаанны бак сөглеве база удуур өрээлиңге безин бай кижи дугайында багай сөс этпе, чүге дээрге дээрниң куштары сээң сөзүңнү дамчыдыптып болур, база чалгынныглар сээң чугааңны тарадыптып болур.