Эге дөс 8 - Ыдыктыг Библия

Суг халавының соксааны

¹ Бурган Нойже болгаш ооң-биле кады бажың-хемеде чоруур азырал база черлик дириг амытаннарже кичээнгей салып, черже хат чорудуптарга, суг халавы оожургай берген.

² Дүп чок ээрем сугларның үттери дуглалып, дээрниң эжиктери хагдына бээрге, чаъс соксай берген.

³ Суг чоорту сыыгап, 150 дугаар хүнде тырттынып эгелээн.

⁴ Чедиги айның он чедиги хүнүнде бажың-хеме Арарат дагларынга доктаай берген.

⁵ Чылдың онгу айынга чедир суг чоорту эвээжеп-ле орган. Он дугаар айның бирги хүнүнде даглар баштары көстүп келген.

⁶ Дөртен хонук эрткенде, Ной бажың-хемеде кылып алган соңгазын ажыдыпкаш,

⁷ оон кускунну салып үндүрүпкен. Чер кургап калгыжеге чедир, ол кускун аай-дедир ужуп-ла турган.

⁸ Ооң соондан Ной, суг халавының соксаанын билип алыры-биле, көге-буга салып чорудупкан.

⁹ А көге-буга ужуп баргаш, хонуптар чер тыппайн, дедир ээп келген, чүге дээрге черниң кыры ам-даа суг-биле шыптынган хевээр болган. Ной холун сунгаш, көге-буганы туткаш, бажың-хемеже катап киирип алган.

¹⁰ База бир чеди хонук манааш, ол көге-буганы катап база бажың-хемеден салып үндүрүпкен.

¹¹ Кежээ апарганда, көге-буга чаа үнген олива бүрүзү ызырып алган ужуп чедип келген. Ынчан суг халавының соксаанын Ной билип каан.

¹² Ол база бир чеди хонук ишти манааш, көге-буганы катап салып үндүрүпкен. Ооң соонда көге-буга бажың-хемеже ээп келбээн.

¹³ Нойнуң амыдыралының 601 дугаар чылында, чылдың бир дугаар айының бирги хүнүнде суг халавы шуут төнген. Ной бажың-хемениң серизин ап каапкаш, черде суг чок дээрзин көрүп каан.

¹⁴ Ийи дугаар айның чээрби чединиң хүнүнде, кажан чер шуут кургап калганда,

¹⁵ Бурган Нойга мынча деп чугаалаан:

¹⁶ «Кадайың, оолдарың база кенээттериң-биле кады бажың-хемеден үнүп кел.

¹⁷ Дириг амытаннарның шуптузун – куштарны, мал-маганны, соястаарларны, өскелерни-даа база үндүрүп кел: олар чер кырын ээлезин, өзүп-көвүдезин».

¹⁸ Ынчан Ной оолдары, кадайы база кенээттери-биле кады бажың-хемеден үнүп келгеннер.

¹⁹ Оларның соондан аң-мең, соястаарлар, куштар – черниң бүгү чурттакчылары – хевирлер аайы-биле бажың-хемеден база үнүп келгеннер.

²⁰ Ной Дээрги-Чаяакчыга өргүл салыр бедигээш кылган, бүрүн өрттедир өргүлге арыг дириг амытаннарның база куштарның хевир бүрүзүнден бир-бирни бедигээшке эккелген.

²¹ Өргүткеннерниң чаагай чыдын тынып ора, Дээрги-Чаяакчы мынча деп шиитпирлээн: «Моон соңгаар кижилерниң хайының ужун черже каргыш салбас мен. Оларның бодалдары аныяандан тура каржы-бак чүүлдерже угланган-даа болза, Мен, суг халавы чорудуп турганым дег, моон соңгаар амылыг чүвелер кырбас мен.

²² Чер турар-ла болза, тарылга болгаш дүжүт ажаалдазы, изиг болгаш соок, чай болгаш кыш, дүн болгаш хүн төнчү чок болур».