Эге дөс 49 - Ыдыктыг Библия

Иаковтуң бодунуң оолдарын алгап-йөрээгени

¹ Иаков оолдарын кыйгырып алгаш, мынча дээн: «Чыглып келиңер, келир үеде силерни чүү манап турарын чугаалап берейн.

² Бээр четкилеп келгеш, ачаңар мени – Израильди дыңнаңар, оолдарым!

³ Дун оглум Рувим! Мээң шыдалым, мээң үре-салгалымның баштайгызы, эң-не тергиин болгаш күчүлүг сен.

⁴ Үер суу дег хөделип чордуң, ынчангаш сен тергиидевес сен. Чүге дээрге сен адаң мээң орун-дөжээмче үнүп, чыдынымны бужартаткан сен.

⁵ Симеон биле Левий алышкыларның хылыш-чепсээ каржы чорукту кылган-дыр!

⁶ Оларның сүлчээзиниң деткикчизи эвес мен, мээң ат-алдарым оларныынга каттышпас. Олар ажынып-хорадааш, кижилер өлүрүп каан-дыр; туразы улгадып, мал-маган кемдеткен-дир.

⁷ Оларның каржы-дошкун кылыы, араатанзыг килеңи каргаттырар! Иаковтуң салгалының аразынга оларның үре-салгалын тарадып, израиль чоннуң аразынга үлеп чорудуптар мен!

⁸ Иуда! Сени ха-дуңмаң алгап-мактаар. Дайзыннарыңны доңгайтыр базар сен, кады төрээннериң сээң мурнуңга мөгеерлер.

⁹ Сен олча тыпкан аныяк арзылаң дег-дир сен, оглум Иуда! Халдаарынга белеткенген араатан дег-дир сен. А ону кым дүвүредип диттир боор!

¹⁰ Иуда эрге-дужаал даянгыыжын холдан салбас, чагырыкчының эргези оон кажан-даа адырылбас; үези кээрге, албан-үндүт төлеп, чоннар аңаа чагыртыр.

¹¹ Ооң элчигеннерин чимистиг ыяшка безин баглап болур, виноградының ханды-арагазы, идик-хеп чуп болгу дег, хөй болур.

¹² Арага-хымыстың хөйүнден оларның карактары кылаң, сүттүң хөйүнден диштери ак болур.

¹³ Завулон корабльдар эжиндирип кээп турар далай эриинге чурттаар. Ооң ээлээн чериниң кызыгаары Сидон хоорайга чедир.

¹⁴ Иссахар – чүък аразында чыдыпкан шыырак элчиген дег.

¹⁵ Дыштанган чери эки, беримчелиг деп чүвени ол көрүп кааш, чүъктү эктинге каап алгаш, албадал адаандан ажылдап эгелээн.

¹⁶ Израильдиң бир аймаа болгаш, Дан бодунуң чонун шын шиидер.

¹⁷ Дан орукка чылан болзун, шагар чылан дег, орук дозар болзун! Аъттың будунче шаптарга, ооң мунукчузу ойта кээп дүжер болзун!

¹⁸ Сээң камгалалыңга идегеп тур мен, Дээрги-Чаяакчы!

¹⁹ Гадче дээрбечилер халдай берзе, оларның боттарын ызыртыр сүргеш, үптээр.

²⁰ Асирниң аъш-чеми элбек, ол хааннарны хандырар.

²¹ Неффалим – хостуг чээрен-дир, ол чараш ажы-төл төрүүр.

²² Иосиф – суг кыдыында аныяк элчиген дег, даг эдээнде оъттап турар чаваа дег.

²³ Ча адыгжылары олче халдап-даа, аткылажып-даа, ооң-биле өжээннежип-даа турганнар.

²⁴ Ынчалза-даа Иосифтиң чазы кадыг, холдарының шыңганнары дыңзыг болуп арткан. Ооң күжү Иаковтуң күштүг Бурганының холдарындан келген. Израильдиң Кадарчызы болгаш Хаязы ону деткээн!

²⁵ Сээң адаңның Бурганы сеңээ дузалаар, Күчүлүг Бурган сеңээ ачы-буян хайырлаар: деңгер-дээрлерниң, чер адаанда сугларның, ава амытанның ачы-буяны сеңээ чедер.

²⁶ Сээң адаңның хайырлаан йөрээлдери үе-дүптүң дагларының ачы-буянындан, эрте-бурунгу тейлерниң хайыразындан артык үнелиг. Ол бүгү йөрээшкиннер Иосифтиң бажынче бадып келзин, алышкыларның аразында онзагай кижиниң тейинче бадып келзин.

²⁷ Вениамин дээрге араатан бөрү-дүр ол. Эртен эрте ол бодунуң олчазын хемирип орар, кежээ тывыжын үсперлеп турар».

²⁸ Израильдиң он ийи аймаа ол-дур. Оларның адазының оларга берген алгыш-йөрээли ындыг болган. Аймак бүрүзүнге – тускай алгыш-йөрээл.

Иаковтуң өлгени

²⁹ Иаков оолдарынга мынча дээн: «Удавас мен өгбелерим соондан чоруптар мен. Мени хет Эфроннуң шөлүнде турар куйда адаларымның чанынга ажаап каар силер.

³⁰ Авраамның хууда орнукшудулга чери кылдыр хет Эфрондан садып алганы, ханаан черде Мамре чоогунда Махпела шөлүнде турар куй ол-дур.

³¹ Ында Авраам болгаш ооң кадайы Сарраны, Исаак болгаш ооң кадайы Ревекканы ажааган болгай. Ында мен Лияны база ажаап каан мен.

³² Ол шөлдү болгаш ында куйну хет чондан садып алган болгай».

³³ Оолдарынга шак ындыг чагыгны берип кааш, орунунга чыдып алгаш, Иаков өлүп калган, өгбелериниң соондан өске оранче чоруй барган.