Эфесчилерге 5 - Ыдыктыг Библия

Чырыктың ажы-төлү дег амыдыраңар

¹ Ындыг болганда, Бурганның ынак ажы-төлү дег, Аңаа дөмей боорун оралдажыңар.

² Христос биске ынакшааш, Бодунуң амы-тынын бис дээш Бурганга салган чаагай чыттыг, күзел ханар өргүл дег берипкен. Ооң ынчаар ынакшааны ышкаш, ынчалдыр ынакшылга бүргедип амыдыраңар.

³ Үй-балай самыырал азы кандыг-даа бужар чорук болгаш алыксак-чиксек чорук ышкаш чүүлдер дугайында араңарга чугаа безин көдүрүлбезин. Ындыг үүлгедиглер Бурганның ыдыктыг улузунга көңгүс таарышпас.

⁴ Ааска эптешпес сөстер, хоозун куруг чугаалар болгаш үй-балай баштактар чугааңарже кирбезин, ол бүгү чүүл чок! Бурганга өөрүп четтирери оон канчап-даа дээре!

⁵ Харын бүзүреп боор силер: чаңгыс-даа самыыраан, бодун бужартаткан база чазый кижи (а ол дүрзү-бурганга чүдүүрлерден ынай-даа ылгалбас) Христостуң база Бурганның Чагыргазынга өнчү албас.

⁶ Силерни кым-даа хоозун сөстер-биле дуурайлавазын! Чүге дээрге чогум-на ол чүүлдер дээш, Бурганның килеңи Ону дыңнавастарже халдаар.

⁷ Ынчангаш олар-биле силерниң араңарга дөмей чүү-даа турбазын!

⁸ Боттарыңар кажан-бир шагда караңгыга бүргеткен улус чораан силер, а ам, Дээрги-Чаяакчыга башкарткаш, чырыкка бүргедиптиңер. Чырыктың ажы-төлү дег амыдыраңар!

⁹ А чырыктың үре-түңнели – кандыг-даа янзылыг буянныг херек, чөптүг-шынныг чорук болгаш алыс шын боор.

¹⁰ Дээрги-Чаяакчыга таарымчалыг чүүлдү тодарадып аарын оралдажыңар.

¹¹ Караңгының үре-түңнел чок үүле-херээнге киришпеңер, харын оларны сойгалаңар.

¹² Чүге дээрге ындыг ёражоктарның бүдүү чүнү үүлгедип турарын чугаалаары безин ыянчыг-дыр.

¹³ Ынчалза-даа чырыктың сойгалааны бүгү чүүл көскү апаар.

¹⁴ А чырыктың көскү кылыпканы бүгү чүүл боду база чырык апаар. Ынчангаш мынча деп чугаалаар бис: «Удаан кижи, оттуп кел! Өлүг кижи, дирлип кел, сени ынчан Христос херелдендир чырыдыптар!»

¹⁵ Таптыг көрүңер, оваарымчалыг болуңар: боттарыңарны мелегей эвес, а угаанныг улус ышкаш ап чоруңар.

¹⁶ Кандыг-даа арганы чөп ажыглаарын оралдажыңар, чүге дээрге бузуттуг-бак чорук көвүдээн үе-дир бо.

¹⁷ Ынчангаш сарыыл чок болбаңар, а Дээрги-Чаяакчының күзел-соруун билип аарын оралдажыңар.

¹⁸ Араганы эзиртир ишпеңер, оон чүгле үрелир силер. Ооң орнунга Сүлдеге бүргеттириңер.

¹⁹ Ыдыктыг ырлар, йөрээлдер болгаш Сүлдеден кээр ырлар күүседип, араңарда ынчалдыр харылзажыңар. Ырлажыңар, чүректериңер ханызындан Дээрги-Чаяакчыны алгап-йөрээңер.

²⁰ Дээргивис Иисус Христостуң ады-биле Бурган Адага бүгү чүве ужун үргүлчү өөрүп четтириңер.

Христиан өг-бүле

²¹ Христосту хүндүлээриңерниң демдээ кылдыр бот-боттарыңарга чагыртыңар.

²² Херээжен улус, Дээрги-Чаяакчыга дег, ашактарыңарга чагыртыңар.

²³ Христостуң Бодунуң ниитилели болур мага-бодунуң Бажы болгаш Камгалакчызы болганы дег, ашаа кадайынга баштыңчы боор.

²⁴ Христостуң ниитилелиниң Аңаа чагыртканы дег, кадайлар база ашактарынга бүрүнү-биле чагыртыр ужурлуг.

²⁵ А силер, ашактар, Христостуң Бодунуң ниитилелинге ынаа ышкаш, кадайларыңарга ынак болуңар. Ол Бодунуң амы-тынын ол дээш өргээн болгай.

²⁶ Христиан ниитилелди сугга чуп, арыглааш, Бодунуң сөзү-биле ыдыктап, аңгылап алыр дээш,

²⁷ ону Бодунуң мурнунга бүрүн каазы-биле: четпес-дудуу чүве чок, бокка борашпаан – бачыт база кем чок бооп көзүлзүн дээш, Ол ынчаар кылган.

²⁸ Ашактар база ынчалдыр, бодунуң мага-бодунга дег, кадайларынга ынак боор ужурлуг. Кадайынга ынак кижи бодунга база ынак.

²⁹ Бодунуң мага-бодун көөр хөңнү чок чаңгыс-даа эр кижи кажан-даа туруп көрбээн, харын ол оозун чемгерер, ажаап-тежээр болгай. Христос Бодунуң ниитилели дээш база ынчалдыр сагыш човаар.

³⁰ А бис Ооң мага-бодунуң кезектери-дир бис.

³¹ Ынчангаш эр кижи ада-иезин каапкаш, кадайы-биле катчы бээр, ынчан ийи кижи чаңгыс мага-бот апаар .

³² Мында аажок ханы чажыт бар, ол чажыт Христоска болгаш Ооң ниитилелинге хамааржырын чугаалап тур мен.

³³ Силерниң эр кижи бүрүзү база, бодунга боду дег, кадайынга ынак боор ужурлуг, а кадайы ашаан хүндүлезин.