Чугаалар 8 - Ыдыктыг Библия

Мерген угаанның өртемчейге ужур-утказы

¹ Мерген угаан кыйгырып турар эвес бе? Сарыылдың үнү дыңналып турар эвес бе?

² Мерген угаан орук чанында тей бажында – оруктарның белдиринде туруп алган-дыр.

³ Ол хоорайже кирер эжик аксында, хаалга чанында кыйгырып тур:

⁴ «Улус-чон, силерни кый деп тур мен, кижи төрелгетенни кыйгырып тур мен!

⁵ Кенен улус, сагынгыр бооп көрүңер, а мелегей улус – угаан кирип алыңар.

⁶ Дыңнаңар, мээң чугаалаар чүвем чугула, аксымдан алыс шынныг чугаа үнер;

⁷ мээң дылым алыс шынны сөглээр, а бузуттуг, бужар сөстү аксы-дылым кажан-даа этпес.

⁸ Мээң шупту чугааларым чөптүг, оларда кара сагыштыг-даа, меге-даа чүве чок;

⁹ олар дөгере угаанныг кижиге тодаргай, билиг чедип алган улуска билдингир.

¹⁰ Мээң сургаалымны – мөңгүнден, а билиимни – арыг алдындан бедик үнелеңер.

¹¹ Мерген угаан эртине даштардан каас-чараш болгай, күзеп чорууруңар бүгү чүве ооң-биле деңнежип шыдавас.

¹² Мен дээрге Мерген угаан-дыр мен, кажараашкын-биле кады турар мен, билиг биле бодамчалыг чорукту чедип ап тур мен.

¹³ Дээрги-Чаяакчыдан коргары – бузутту көөр хөңнү чогу-дур. Бодун өрү көрдүнер, адыыргаар чорукту, бузуттуг орукту база мегечи аас-сөстү көөр хөңнүм чок.

¹⁴ Менде – арга-сүме бар, менде – чедиишкин бар, мен – угаан-дыр мен, күш база мээң таламда.

¹⁵ Мээң ачымда хааннар хааннап, чагырыкчылар чөптүг чорукту доктаадып турар,

¹⁶ мээң ачымда чагырыкчылар, нояннар болгаш черниң бүгү баштыңчылары чагырып турар.

¹⁷ Меңээ ынак улуска мен база ынак мен, мени дилеп турар улус – тып алыр.

¹⁸ Байлакшыл-даа, алдар-хүндү-даа мээң-биле кады, төнчү билбес эртине-байлак болгаш чөптүг чорук база.

¹⁹ Мээң эккээр үре-түңнелим арыг алдындан дээре, мээң дүжүдүм – арыг мөңгүнден үнелиг.

²⁰ Чөптүг чоруктуң оруу-биле, шынчы чоруктуң изи-биле бар чыдар мен:

²¹ меңээ ынак улусту эктин ажыр шаңнаар мен, оран-савазын эртине-байлак-биле чык долдурар мен.

²² Дээрги-Чаяакчының чаяап кылган бүгү-ле чүүлдериниң мурнунда, үе-дүпте-ле Ооң оруунуң эң эгези бооп турган мен.

²³ Мен хамык үе-шагның эгезинде, үе-дүпте-ле, чер-делегейниң боттанырының бетинде-ле тывылган мен.

²⁴ Дүп чок далай болгаш элбек суглуг суг баштары чок турда-ла, төрүттүнген мен;

²⁵ дагларны-даа, тейлерни-даа тургуспаан турда, төрүттүнген мен.

²⁶ Дээрги-Чаяакчы ол өйде черниң делгемнерин-даа, черниң довурак-доозунунуң баштайгы доозунчугажын-даа чаяаваан турган.

²⁷ Кажан Ол дээрлерни тургузуп турда, мен аңаа турган мен; кажан далайның кырынга дээрлер биле черни аңгылаар төгерикти шыйып турда;

²⁸ кажан дээрге булуттарны быжыглап турда, дүп чок далайның агып үнген дөстерин быжыглап турда;

²⁹ кажан далайны суглар ашпас кылдыр, ооң хемчээлин доктаадып турда база черни тудуп турар үндезиннерни доктаадып турда –

³⁰ мен Ооң чанынга тудугжу бооп турган мен, хүннүң-не өөрүшкү-маңнай бооп, Ооң мурнунга үргүлчү өөрүп-хөглеп турган мен –

³¹ Ооң чер-делегейи дээш өөрүп-хөглеп, кижи төрелгетен дээш өөрүп-байырлап турган мен.

³² А ам мени дыңнаңар, ажы-төлүм: мээң изим базар улус амыр-чыргалдыг!

³³ Сургаалымны дыңнаңар, ынчан мерген угаанныг апаар силер, ону хүлээвейн барбаңар.

³⁴ Мени дыңнап турар, мээң эргиним чанынга үргүлчү манап турар, эжиимден караан салбас кижи амыр-чыргалдыг!

³⁵ Мени тып алган кижи – амы-тынны тып алган-дыр база Дээрги-Чаяакчының ээ көрүүшкүнүн чедип алган-дыр.

³⁶ А меңээ удурланыр кижи бодун боду чок кылып турар: мени көөр хөңнү чок болуру дээрге-ле өлүмге ынак болуру-дур».