Чугаалар 7 - Ыдыктыг Библия

¹ Оглум, мээң сөстеримни кадагала, чагыгларымны чүрээңге шыгжап ал.

² Мээң чагыгларымны сагып чор – ынчан амы-тынныг артар сен, өөредиимни карааң огу дег кадагала.

³ Оларны, билзек ышкаш, салааларыңга суп ал, чүрээңге сиилбирлеп бижип ал.

⁴ Мерген угаанга: «Сен – мээң угбам сен» – деп, а сарыылга: «Чоок кыс төрелим сен» – деп чугаала.

⁵ Өске кижи кадайындан – элзедип чугаалаар херээженден ынчалдыр камгаланыр сен.

⁶ Бир-ле катап бажыңымның соңгазындан бакылап, ооң хана-карактарын өттүр көре берген мен.

⁷ Ынчан бир-ле угааны четпес аныяк оолду кенен кижилер аразындан, аныяк-өскен аразындан эскерип каан мен.

⁸ Ол бир херээженниң чурттап турар кудумчузун кежип, ооң бажыңынче бар чыткан.

⁹ Хүн ажып, имиртиңней бергенде; дүн дүжүп, дүмбей караңгы апарып турда болган чүве.

¹⁰ А демги херээжен аңаа уткуй үнүп келди – самыын-садар херээженниң хевин кеткен, оптуг-кажар,

¹¹ шуугаазынныг, дөскел чок база бажыңынга олурар хөңнү чок херээжен болду:

¹² ол бирде – кудумчуга, бирде – хоорай шөлдеринге, бир болза – азыг бүрүзүнге улус кедээр турган.

¹³ Ол херээжен аныяк оолду сегирип алгаш, ошкап-чыттап, ыядыр арын чогу-биле мынча деп турду:

¹⁴ «Мен бөгүн кылыр бооп аазааным эп-найырал өргүлүн боттандырдым.

¹⁵ Ынчангаш сеңээ уткуй үнүп келдим, дилеп чорааш, сени тып алдым.

¹⁶ Орун-дөжээмни хевис шывыглар болгаш Египеттен эккелген чараш пөстер-биле шып алдым.

¹⁷ Чыдар дөжээмни мирр, алоэ, корица дээр чаагай чыттыг үнүштер-биле айдызап алдым.

¹⁸ Бээр кирип кел, эртенге чедир мага хандыр эргеленчип-чассытчыылы, ынакшылдан ханып-таалап чыдаалы.

¹⁹ Ашаам бажыңда чок, ырак орукче үнүпкен-не болгай;

²⁰ ол акшалыг хавын ап алган, ай ортузунга чедир ээп келбес-даа».

²¹ Ол херээжен хөй оптуг аргалар-биле дуурайлап, эптиг-ээлдек чугаазы-биле көгүдүп аарга,

^22-23 аныяк оол доп-дораан ону эдерип чорупкан. Ооң ынчаар кылганы – шарының соктурар черинче бар чыдары дег, хүлбүстүң окка өкпе-баарын үзе аттырары аяже баары дег база куштуң амы-тынындан чарлырын билбейн, дузакче ужары дег болган.

²⁴ Ынчангаш, ажы-төлүм, ам мени дыңнаңар, сөстеримче кичээнгейден салыңар:

²⁵ силерниң чүрээңер ындыг херээженниң оруунче ээй тыртпазын, ооң оруктарын изеп, азып-тенивеңер!

²⁶ Хөй-ле улус ооң чижи болуп, өлген болгай, дыка хөй улусту ол узуткаан болгай.

²⁷ Ооң бажыңы – өлүглер оранынче, өлүмнүң турар черинче аппаар орук-тур.