Чугаалар 6 - Ыдыктыг Библия

Ажыл-агыйга, амыдыралга херек сүмелер

¹ Оглум! Өске кижи дээш дагдынып, шак ол эжиң дээш хол тутчуп, хүлээнген болзуңза,

² бодуңнуң-на сөзүң дээш дузакка киргениң ол-дур, бодуңнуң-на аас-сөзүң-биле туттуруп алганың ол-дур.

³ Өске кижиниң холунче кирген-дир сен, оглум. Оон адырлып алыр дизе, мону кыл: доп-дораан ол кижиниң мурнунче кээп дүжүп, ээрежип диле, чыда калба;

⁴ уйгу-дыжың уттувут, ийи карааң шийбе;

⁵ аңчыдан дескен элик дег, куш тудар кижиниң дузаандан ойлаан куш дег, тын менди үнерин бода.

⁶ Чалгаапай! Кымыскаякка бар – чүнү кылып турарын көргеш, оон өөренип ал:

⁷ даргазы-даа, чагырыкчызы-даа, хайгааракчызы-даа чок хирезинде,

⁸ ол чиир аъш-чемин чайын-на белеткеп аар-дыр, дүжүт ажаар өйде курлавырлай чыып аар-дыр.

⁹ Чежеге дээр чыргап чыдар сен, чалгаапай, оттур өй келбээн бе?

¹⁰ Ам-даа удуп-ноюрзап чыдар болзуңза, ам-даа хөлестеп чыдар болзуңза,

¹¹ тояанчы дег, ядарал сенче халдап кээр; үптекчи дег, түрегдел сенче халдап кээр.

¹² Дүржок, бузуттуг кижиниң аксындан меге черле дүшпес:

¹³ ол караан-даа база кааптар, будун-даа тепсей кааптар азы холу-биле-даа имней кааптар.

¹⁴ Ооң чүрээнде – кара сагыш, ооң бодалында – үргүлчү-ле бузут бар, ол каяа-даа алгыш-кырыш үндүрер.

¹⁵ Ооң уржуунда айыыл-халап ону хенертен хөме таварааш, хензиг када шуут узуткап каар.

¹⁶ Дээрги-Чаяакчы алды чүүлдү көөр хөңнү чок, чедиги чүүл база Аңаа чүдек-бужар болур.

¹⁷ Олар бо-дур: адыыргак көрүш, мегечи дыл, актыг кижиниң ханын төгер холдар,

¹⁸ кара сагыштыг бодалдар чажырар чүрек, бузутче маңнаан буттар,

¹⁹ аксындан меге дүжүрбес, мегелеп херечилээр кижи база ха-дуңмашкы улус аразынга алгыш-кырыш үндүрер кижи.

Самыыраарындан кичээндириишкин

²⁰ Оглум! Ачаңның чагыг-сүмезин утпа, аваңның өөредиин сагы.

²¹ Оларны үргүлчү чүрээңге шыгжап чор, каасталга дег, мойнуңга азып алгаш чор.

²² Олар сени кылаштап чоруңда – эдертир, удуп чыдып аарыңга – кадагалаар, оттуп кээриңге – сеңээ сүме кадар.

²³ Чагыг-сүме – чырыткы, өөредиг – чырык, а эдип-чазаан сургаал – амыдыралче орук болгай.

²⁴ Олар сени бак херээженден, өске кижи кадайының элзедиглиг сөс-чугаазындан кичээндирер.

²⁵ Ол херээженниң чараш-каазы-биле чүрээңни хөлзетпе, ооң карактарының чивеңнээринге дуурайлатпа.

²⁶ Самыын-садар херээженниң өртээ – кескинди хлеб, а өске кижи кадайы дээш, үнелиг амы-тының-биле төлээр сен.

²⁷ От хойлап алгаш, хевин өрттетпес кижи бар бе?

²⁸ Изиг көс кырлап баскаш, будун өрттетпес кижи бар бе?

²⁹ Өске кижи кадайы-биле холбажып турар кижи-биле база ындыг болур: ол херээженге дегген кижи кеземче чок артпас.

³⁰ Бир кижи аштай бергеш, хырнын тоттурар дээш оорланган болза, улус ону дора көрбес.

³¹ А ол кижи туттуруп алза, чеди дакпыр кылдыр орнун тургузуп, бажыңында бүгү өнчү-хөреңгизин ап бээр.

³² Ашактыг херээжен-биле самыырап турар эрниң угааны четпес-тир – бодунуң өлүмүн белеткеп турар-дыр.

³³ Ону манап турар чүве – эттедип-соктурары, бак атка кирери, ооң бужар-багы ам кажан-даа балалбас.

³⁴ Демги херээженниң ашаа хүннээнинден кылыы хайныр, өжээн негээр хүнү кээрге, ол өршээл билбес,

³⁵ кандыг-даа садыы алырынга чөпшээрешпес база чеже-даа хөй белек тутсуруңга, хайыра бодавас.