Чугаалар 5 - Ыдыктыг Библия

Самыыраар чоруктан кичээндириг

¹ Оглум, мерген угаанымны кичээнгейлиг дыңна, сарыылымче кулааңны ээктир –

² ынчан чүве эндевес чорукка бүргедир сен, угаан-билигни кадагалап аар сен.

³ Өске кижи кадайының аксы ары чигири дег чытталыр, ооң чугаа-сөзү үстен чымчак.

⁴ Ынчалза-даа ол херээжен алызы барып ажыг чашпан бооп база аажок чидиг хылыш бооп хуула бээр.

⁵ Ооң буттары өлүмче дүжүп бар чыдар, а базымнары өлүглер оранынче шиглээн.

⁶ Ооң оруу ону амы-тынныг арттырбас, оруктары ол-бо чайгылып чоруурун ол боду-даа билбес.

⁷ Ам мени дыңнап көрүңер, ажы-төлүм, мээң сөстеримни хүлээвейн барбаңар.

⁸ Шак ындыг херээженче чагдаваңар, ооң бажыңының эргининче-даа чоокшулаваңар.

⁹ Оон башка бодуңнуң күжүңнү – өске улус дээш; амыдыраар хуусааңны – кээргээр сеткил чок улус дээш төтчеглээр сен.

¹⁰ Сээң күжүң хары улусту тоттурар, сээң күжениишкиниң өске аалга баар.

¹¹ Эът-бодуң соглуп, харыксыраар өйде – амыдыралыңның төнчүзүнде – халагың төп, ондап-остап:

^12-14 «Чагыг-сургаалды хей-ле херекке албайн чораан-дыр мен, чемелээшкинни мээң чүрээм хей-ле тоовайн чораан-дыр; башкыларны тооп дыңнавас, чагыг-сүме берген улусче кичээнгей салбас чораан кончуумну! Ам бичии-ле болза, улус мурнунга, хамык чон аразынга бак атка кирерим ол-дур» – дээр сен.

¹⁵ Бодуңнуң кудууңда сугну база бодуңнуң сууң бажында сугну дозуп иш.

¹⁶ Сээң сугларыңның кудумчуларга, шөлдерге агып баткан херээ чүл?

¹⁷ Сугларың чүгле сээңии болзун, оларны өске улус-биле үлешпе.

¹⁸ Сээң сууң бажынга йөрээл доктаазын, аныяаңда алган кадайың сеңээ өөрүшкүнү шаңназын.

¹⁹ Ол – ынак мыйгааң, эргим элииң-дир, ооң эргеледии сени бүгү назыныңда хандырар, ынакшылы – үргүлчү эзиртир.

²⁰ Чүү дээш өске кижи кадайынга хандыкшып, ашактыг херээженче сыңныр сен, оглум?

²¹ Дээрги-Чаяакчыга кижиниң бүгү оруктары көскү болгай, кижиниң бүгү оруктарын Ол билир болгай.

²² Бузуттуг кижи кем-буруузунуң дузаанга туттурар, бачыттарынга ораажыр.

²³ Эдип-чазаар сургаалдың чедишпези ону узуткаар, а мелегей чоруунуң көвүдээни – оруундан астырар.