Чугаалар 31 - Ыдыктыг Библия

Лемуил хаанның авазының чагыы

¹ Масса чурттуг Лемуил хаанның сөстери. Бо сөстер-биле Лемуилдиң авазы оглунга өөредиг берип турган:

² Оглум, мен чүү дээйн? Мээң божуп-төрээн оглум, канчаайн? Аксы-даңгыраам бээримге, төрүттүнген оглум, чүнү чагыыйн?

³ Бодуңнуң күжүңнү херээженнерже чарывайн көр, хааннарны буурадыр херээженнер сээң оруктарыңны боттарынче ээй тыртпазыннар.

⁴ Лемуил, арага ижери хааннарга шуут-ла таарышпас, чагырыкчылар-даа эзиртир суксун дилевезин.

⁵ А оон башка эзиртир ижип алгаш, хоойлу-дүрүмнерни-даа уттуп аарлар, дарладып базындырган улуска-даа чөптүг шиитпир үндүрбестер.

⁶ Эзиртир суксунну – өлүр четкен кижиге; араганы – сеткил-хөңнү ажып-саргаан кижиге кудуп бериңер:

⁷ ол күжүр ижипкеш, бодунуң ядыы-түреңгизин база хилинчектиг үүлезин уттупсун.

⁸ А сен бодун камгалап шыдавас кижини, шыдал чок бүгү улусту камгалап чугаала.

⁹ Чөптүг шииткел үндүрүп, ядыы болгаш түреп баксыраан улусту камгалап чугаала. א (алеф)

Бүдүштүг херээженге йөрээл

¹⁰ Бүдүштүг херээженни кым тып шыдаарыл? Ооң үнези эртине даштардан бедик болгай, ב (бет)

¹¹ ашааның чүрээ аңаа бүзүрелдиг, ол кадайының ачызында ажык-орулга чок артпас. ג (гимел)

¹² Кадайы аңаа бүгү назынында бузутту эвес, буянны шаңнап кээр. ד (далет)

¹³ Дүк азы лён пөс-даа белеткей берген дижик – кандыг-даа ажылды күзелдии-биле кылыр. ה (хе)

¹⁴ Ол, садыглаар корабль дег, аъш-чемни ырак черден тып эккээр. ו (вав)

¹⁵ Ол даң атпаанда-ла тура халыыр, оон өг-бүлезин ашкарып-чемгергеш, чалча кыстарга кылыр ажылды хуваап бээр. ז (зайин)

¹⁶ Бир шөлдү шинчип көргеш, садып алыр; ишчи холдары-биле акша-хөреңги ажылдап алгаш, виноград олуртуп алыр. ח (хет)

¹⁷ Ол ажылдап тура, могап-шылаарын билбес, ооң холдары ажылындан салдынмас. ט (тет)

¹⁸ Садыг-саарылгазы эки чоруп турарын билип кагза, орай дүне-даа чырыткызын өжүрбес; י (йод)

¹⁹ ооң холдары даараныр херекселинче дап бээр, а салаалары ээргиижин салбас. כ (каф)

²⁰ Ол адыжын ядыы кижиге чада салып бээр, а холун түреп баксыраан кижиже сунар. ל (ламед)

²¹ Ооң өг-бүлезинге улуг хар-даа коргунчуг эвес, өг-бүлезиниң бүгү улузу каас-коя хептиг. מ (мем)

²² Ол бодунга база хевис шывыглар даарап аар, янзы-бүрү каас-коя хептер кедер. נ (нун)

²³ Ооң ашааның ады хоорайның улус чыглыр черинде билдингир, ашаа чуртунуң баштыңнарының аразында орар. ס (самех)

²⁴ Бүдүштүг херээжен хептер даарап садар база садыгжыларга курлар аппарып садар. ע (айин)

²⁵ Күш-шыдал биле ат-алдар – ооң кеткен хеви дег; ол келир үени өөрүшкүлүг уткуур. פ (пе)

²⁶ Ооң аксындан – мерген угаанныг сөстер, а дылындан – энерелдиг өөредиг үнер. צ (цаде)

²⁷ Ол бажыңында ажыл-агыйының чоруп турарын хайгаараар база аъш-чемин халаска чивес. ק (коф)

²⁸ Ажы-төлү туруп келгеш, ону алгап-мактаар, ашаа база мактап ханмас: ר (реш)

²⁹ «Бүдүштүүн көргүскен херээженнер-ле хөй, а сен оларның шуптузун ажып кааптың!» ש (шин)

³⁰ Кыс кижиниң аянныы – меге дуурай, чараш-каазы – оңуп каар, а Дээрги-Чаяакчыдан коргар херээжен макталга төлептиг. ת (тав)

³¹ Ону кылган ажыл-үүлези дээш шаңнаңар, ол херээжен хоорайның улус чыглыр черинге ажыл-херектери-биле алдаржызын!