Чугаалар 3 - Ыдыктыг Библия

¹ Оглум, мээң өөредиимни утпа, чагыг-сүмемни чүрээңге шыгжап ал.

² Чүге дээрге олар сээң чурттаар үеңни узадыр, назы-харыңны немээр база амыр-чыргалыңны көвүдедир.

³ Шынчы чорууң биле энерелиңни кагба: ону, каасталга ышкаш, мойнуңга астып ал база чүрээңге сиилбирлеп бижип ал –

⁴ ынчан Бурган болгаш улус сенче ээ көрнүр база эки кижи деп санаар.

⁵ Дээрги-Чаяакчыга чүрээңниң ханызындан идеге, а бодуңнуң угааныңга ынанма.

⁶ Кандыг-даа оруктап чоруп орзуңза, Дээрги-Чаяакчыны билип аарын кызыт, Ол ынчан сээң орууңну дорттап бээр.

⁷ «Мерген угаанныымны» деп бодава, Дээрги-Чаяакчыдан коргуп, бузуттан чайлап чор –

⁸ ынчаар кылыр болзуңза, мага-бодуң бүрүнү-биле кадыкшып, күш кире бээр.

⁹ Бодуңнуң өнчү-хөреңгиңден база кандыг-даа дүжүдүңнүң башкылыындан Дээрги-Чаяакчыга берип, Ону алдаржыт;

¹⁰ сээң тараа шыгжаар аңмаарларың сыңышпастап, дола бээр, көгээржиктериңде чаа арага эриин ажыр төктүп турар апаар.

¹¹ Оглум, Дээрги-Чаяакчының эдип-чазаар сургаалын хүлээвейн барба, Ооң чемелээшкинин халалыг диве.

¹² Дээрги-Чаяакчы Бодунуң ынак кижизин, ачазы эргим оглун дег, кеземчеге онаар болгай.

¹³ Мерген угаанны чедип алган кижи база сарыылдыг апарган кижи амыр-чыргалдыг.

¹⁴ Мерген угаанның ажыы мөңгүннүг болурундан канчап-даа дээре, ооң үре-түңнели алдындан-даа үнелиг.

¹⁵ Мерген угаан эртине даштардан-даа аар өртектиг, күзээн чүүлдериңниң кандыызы-даа ооң-биле деңнежип шыдавас.

¹⁶ Ооң оң холунда – узун назын, а солагай холунда – байлакшыл биле алдар-хүндү бар.

¹⁷ Ооң оруктары тааланчыг-дыр, ону олар шупту амыр-чыргалга чедире бээр-дир.

¹⁸ Мерген угаан ону кагбас улуска амыдыралдың ыяжы-дыр, ооң-биле чарылбас улус амыр-чыргалдыг!

¹⁹ Дээрги-Чаяакчы Бодунуң мерген угааны-биле черни үндезилеп тургускан, сарыылы-биле дээрни доктаадып тургускан.

²⁰ Ооң билии башкарарга, дүп чок далайларның суу аттыгып үнүп, булуттар чаъс-шалыңны дүжүрүп турар.

²¹ Оглум, быжырымчалыг бодаар болгаш бодамчалыг чорукту кадагалап ал, олар үргүлчү карааң мурнунга турзун.

²² Олар ынчан сээң сеткилиңге тынгарыышкын болгаш мойнуңга азар каасталгаң апаар.

²³ Ынчан сээң орууңга айыыл таварышпас, а будуң чүге-даа илдикпес.

²⁴ Чүден-даа кортпайн, удуп чыдып аар сен, а удаан уйгуң – тааланчыг боор.

²⁵ Бузуттугларны манап турар, оларны хенертен таварыыр хай-халаптан база өлүрүнден кортпа.

²⁶ Дээрги-Чаяакчы сээң талаңда болгай, Ол сээң будуңну какпадан чайладып чоруур.

²⁷ Бир кижиге ачы-буян көргүзер ужурлуг турган дижик сен. Шыдаар-ла болзуңза, аңаа ону көргүзеринден ойталава.

²⁸ Өске кижиге бээр ужурлуг чүвең бодуңда бар болза: «Чоруй бар, катап чедип кээр сен, даарта бээр мен» – диве.

²⁹ Сээң-биле каразыышкын чок чурттап турар кижиге удур бак чүве бодава.

³⁰ Сеңээ бак чүве кылбаан кижи-биле чылдагаан чок черге чаргылдашпа.

³¹ Күчүлел кылып турар кижиге адааргава, ооң оруун шилип алба.

³² Чүге дээрге кара сагыштыг кижи Дээрги-Чаяакчыга бужар бооп көстүр, а чөптүг-шынныг улус Ооң сеткилинге кирер.

³³ Бузуттуг кижиниң бажың-балгадынга Дээрги-Чаяакчының каргыжы чедер, а эки мөзүлүг улустуң оран-савазынга Ол ачы-буян хайырлаар.

³⁴ Ол кочуургак улусту шоодар, а томаараан улуска ээ көрүүшкүнүн хайырлаар.

³⁵ Мерген угаанныг улус алдарга чедер, а адыыргак мелегей улус адын баксырадыр.