Чугаалар 28 - Ыдыктыг Библия

¹ Бузуттуг кижини сүрүп турар кижи чок-даа болза, ол дезип маңнаар, а чөптүг-шынныг кижи, арзылаң дег, амыр-шөлээн.

² Чуртка хөлзээзин үнүп турда, чагырыкчылар көвүдээр, а угаанныг болгаш чүү шын боорун билир чагырыкчы барда, чурт үр туруп шыдаар.

³ Түреңги улусту кызып-кыйып турар ядыы кижи тараан үрезинни чууй шаап аппаар чайык дег.

⁴ Ыдыктыг хоойлудан ойталап турар кижи бузуттуг улусту мактаар, а хоойлуну сагып турар улус олар-биле демисежир.

⁵ Каржы-бак улус чөптүг чорукту билбес, а Дээрги-Чаяакчыже чүткүп чоруур улус чөптүг чорукту бүрүнү-биле билип алыр.

⁶ Кем-буруу кылбайн амыдырап чоруур ядыы кижи шын эвес оруктар-биле чораан бай кижиден дээре.

⁷ Угаанныг оол ыдыктыг хоойлуну сагыыр, а үен-даян улус-биле эдержир оол ачазының адын баксырадыр.

⁸ Улуска акшаны чээлиге бергеш, хөөзүнден байып турар кижиниң хөреңгизи ядыыларга ачы-дуза көргүзер кижиниң холунче кире бээр.

⁹ Ыдыктыг хоойлунуң сөстерин дыңнаар хөңнү чок кижиниң мөргүлү безин бужар чүүл болур.

¹⁰ Эки мөзүлүг улусту бузуттуг орукче дуурайлап киирип турар кижи бодунуң-на дузаанга туттурар, а кем-буруу чок кижи буянны салгап алыр.

¹¹ Бай-шыдалдыг кижи бодун мерген угаанныг кылдыр бодаар, ынчалза-даа угаанныг ядыы кижи ооң кандыызын эндевес.

¹² Чөптүг-шынныг кижилер тиилеп үнерге, ат-алдары алгыыр; бузуттуглар депшип үнерге, улус чаштына бээр.

¹³ Бачыттыг үүлгедииңни чажырар болзуңза, эки чүве көрбес сен, а ону ажыы-биле миннип, ойталаар болзуңза, өршээл алыр сен.

¹⁴ Бодун үргүлчү оваарымчалыг ап чоруур кижи амыр-чыргалдыг. А чүрээн чөрүүледип аар кижи айыылга таваржыр.

¹⁵ Каржы-бак чагырыкчы ядыы албаты чонга ырланган арзылаң, чазыйлаан адыг дег.

¹⁶ Чагырыкчы мелегей болган тудум-на, албан-үндүрүгнүң саны көвүдээр, а чөптүг эвес олча-ажыкты көөр хөңнү чок кижиниң назыны узаар.

¹⁷ Кижи өлүргеш, буруудаан кижи өлгүжеге чедир дезип кээр, кым-даа аңаа деткимче бербес.

¹⁸ Кем-буруу чок амыдырап чоруур кижи камгалал алыр, а шын оруктан соора баар кижи хенертен буурап дүжер.

¹⁹ Черин болбаазыраткан кижиниң хырны тодуг, а хоозун күзел-бодал сүрген кижи түрегделди мага хандыр көөр.

²⁰ Шынчы кижи хөй ачы-буянны алыр, а дүрген байып аарынче чүткээн кижи кеземчеден чайлап шыдавас.

²¹ Улусту ылгай көөрү – бак херек: кижи кескинди хлеб дээш безин бачыт үүлгедип болур болгай.

²² Чазый кижи дүрген-не байып алыксаар, ынчалза-даа ядарал ону чыпшыр сүрүп кел чыдарын билбес.

²³ Улус алызында барып чашпаа чугаалыг кижиже эвес, а чемелээшкин чугаалаар кижиже ээ көрнүр.

²⁴ Ада-иезин үптеп-тонааш: «Ол дээрге бачыт эвес-тир» – деп турар кижи үрегдекчи дег-дир.

²⁵ «Алыйн-чиийн» дээр кижи алгыш-кырыш үндүрер, а Дээрги-Чаяакчыга идегээр кижи чаагай амыдыралдыг болур.

²⁶ Чүгле бодунуң угаанынга идегээр кижи мелегей болур, а мерген угаанның оруктарын изээр кижи камгалал алыр.

²⁷ Ядыы кижиге дузалаар кижи чединмес деп чүве билбес болур, а оон хая көрнүр кижи бодунга хөй-ле каргышты чыып алыр.

²⁸ Бузуттуглар өрү депшиирге, улус чаштына бээр, а олар чок апаарга, чөптүг-шынныг улус көвүдээр.