Чугаалар 27 - Ыдыктыг Библия

¹ Даартагы хүнде болур чүве-биле мактанма – ол хүннүң чүнү эккээрин билбес-ле болгай сен.

² Сени бодуң эвес, а өске кижи; бодуңнуң эвес, а хары кижиниң аас-сөзү мактазын.

³ Даш-даа аар, элезин-даа чиик эвес, ынчалза-даа мелегей кижиниң аажы-чаңы оон-даа аар.

⁴ Килең – каржы, күштүг килең – үерлээн суг дег, ынчаарга хүннээчел кижиге удур туржуп шыдаар кижи бар бе?

⁵ Ажыы-биле сойгалаар кижи бүдүү ынак эжиңден дээре.

⁶ Ынак эжиң ак сеткилдиинден сени балыглаар, а сени көөр хөңнү чок кижи мегелеп ошкаар.

⁷ Эмин эрттир тоткан кижи ары чигирин-даа херекке албас, а аштаан кижиге ажыг-даа чем амданныг болур.

⁸ Төрээн черин каапкан кижи – уязын каапкаш барган куш дег.

⁹ Чагдынар болгаш айдызаар чаагай чыттыг чүүлдер чүректи өөртүр, а эжиң чүрээниң ханызындан арга-сүме бээрге, база ындыг таптыг.

¹⁰ Бодуңнуң-даа, ачаңның-даа эш-өөрүн кагба; айыыл таварыырга, төрелдериңче барба: ыракта акы-дуңмаңга көөрде, чоокта кожаң дээре.

¹¹ Оглум, мерген угаанныг бооп, мээң чүрээмни өөртүп көр, ынчан мени бак сөглээр улуска харыылаар сөстер тыпты бээр.

¹² Угаанныг кижи айыыл көргеш, чашты бээр, а кенен улус олче уткуштур баргаш, кеземче алыр.

¹³ Хары кижи дээш дагдынган кижиниң идик-хевин долаа кылдыр ап ал, өске кижи кадайы дээш дагдынган кижиден долаадан ап ал.

¹⁴ Эртен эрте эжин аажок ыыткыр алгап-йөрээр кижи – каргыш салып турар кижи бооп санаттырар.

¹⁵ Хыйланчак кадай – дамдылаар ойбак-дыдык дээвиир дег;

¹⁶ ону соксадыры – хатты доктаадыры дег азы үстүң адышка туттунмазы дег.

¹⁷ Демирни демир чидидер, а кижини өске кижи кажарадыр.

¹⁸ Чимистиг ыяшты ажаап турар кижи ооң чимистерин чиир, а ээзи дээш сагыш човаар кижи алдар-хүндүге чедер.

¹⁹ Арын-шырайның сугга көрүнчүктелири дег, кижи өске кижиниң чүрээнге көстүр.

²⁰ Тамы биле Өлүм пөгерин билбес, кижиниң карактары тодарын билбес.

²¹ Кижиге мактал сөстериниң салдары – мөңгүн биле алдынга хайылдырар суугу дег.

²² Мелегей кижини тараа-биле кады согаашка суккаш, бала-биле соктаар-даа болзуңза, мелегей чоруун арыглап шыдавас сен.

²³ Шээр малыңның шуптузун бирден бирээ чокка танып ал, кодан сүрүүңче сагыштан сал:

²⁴ кандыг-даа байлакшыл мөңгези-биле турбас, дүжүлге безин үргүлчү салгал дамчывас болгай.

²⁵ Оът-сиген оңар, оон чаа көк шымырарты үнүп кээр, дагларның ийлеринде оът-сигенни кезип, чыып алыр;

²⁶ хураганнар сеңээ хеп болур, а анайлар – шөл садып алыр төлевир болур;

²⁷ өшкү сүдү – сеңээ чем боорунга, өг-бүлеңни ашкарып-чемгереринге болгаш чалча кыстарыңны тоттур азыраарынга четчир.