Чугаалар 24 - Ыдыктыг Библия

¹ Бузуттуг улуска адааргава, олар-биле кады боорун күзеве.

² Оларның угаан-чүрээ күчүлел дугайында бодаар, а аас-сөзү улуска бак үүлгедигни чугаалап турар.

³ Бажың-балгат мерген угаан-биле туттунар база угаан-сарыыл-биле быжыг апаар;

⁴ билиг барда, бажың ишти күзенчиг болгаш үнези улуг хөреңги-биле долдунар.

⁵ Мерген угаанныг кижи – күштүг болур, билиглиг кижи – күжүн немеп алыр.

⁶ Дайын чоруда бергеш, арга-сүмени дыңнап аар сен: чөвүлекчилериң хөй болза, тиилелге сээңии боор.

⁷ Мелегей кижиге мерген угаан чедип алдынмас бедикте турар, ол кижи чугула херектер шиитпирлээр черге аксын ажар-даа харыы чок болур.

⁸ Бузут үүлгедирин бодап турар кижини кара сагыштыг кижи дээр.

⁹ Мелегей кижиниң бодалдары бачыт болур, кочуургак кижи улуска бужар бооп көстүр.

¹⁰ Айыыл-халап хүнүнде кошкааң көргүзер болзуңза, күжүң эвээжээни ол-дур.

¹¹ Өлүртүр деп турар улусту камгала! Өлүрү чайлаш чок улусту камгалаарындан дадагалзаар сен бе?

¹² «Ол дугайында билбээн бис!» – деп болур сен. Чүректерниң Шенекчизи Бурган билир, сеткилиңниң Хайгааракчызы бүгү чүвени билир – кижи бүрүзүн, ажыл-херектерин барымдаалап, Ол кезедир азы шаңнаар.

¹³ Оглум, ары чигирин чиирге, кандыг ийик? Ооң чаагайы кончуг, ары өөнүң үттеринде чигир сээң өгүңге амданныг болур.

¹⁴ Мерген угаанны чедип аары база сеткилиңге шак ындыг салдарлыг: ону тып алган болзуңза, келир үең бар, идегелиң өжүп төнмес.

¹⁵ Чөптүг-шынныг кижиниң бажыңының чанында кедеп турар бузуттуг хей дег болба, буянныг кижиниң бажың-балгадын хоозуратпа:

¹⁶ чөптүг-шынныг кижи чеди-даа катап кээп ушса, дөмей-ле туруп кээр, а бузуттуглар кээп ужар болза, айыыл-халапка таваржыр.

¹⁷ Дайзының кээп ужарга, өөрүве; ол моондакка тептигерге, чүрээң өөрүп-байырлавазын,

¹⁸ оон башка Дээрги-Чаяакчы көрүп кааш, өөрүшкүңнү бак чүүл деп санааш, Бодунуң килеңин дайзыныңдан чайладып аппаар.

¹⁹ Кара сагыштыг улус дээш хөлзеп, хорадава, бузуттуг улуска адааргава,

²⁰ чүге дээрге кара сагыштыгларның келир үези чок база бузуттуг улустуң чырыткызы өжүп каар.

²¹ Дээрги-Чаяакчыдан коргуп чор, оглум, хаандан база коргуп чор, өскерликчилер-биле харылзашпа.

²² Чүге дээрге олардан хенертен өлүм хөме таварып кээр: Дээрги-Чаяакчы биле хаандан кандыг айыылдар кээрин билип-даа шыдавас сен.

Мерген угаанныгларның өске сөстери

²³ Мерген угаанныгларның өске сөстери бо-дур. Шииткел черинге улусту ылгай көөрү – бак херек;

²⁴ буруулуг кижиге «Актыг сен» деп турар кижини чоннар каргаар, аймактар көрбестей бээр.

²⁵ А сойгалап турар кижи ээ көрүүшкүннү алыр, олче ачы-буян бадып кээр.

²⁶ Шынныг харыы – эриннерже ошкаашкын дег.

²⁷ Бажыңың даштында ажыл-херээңни аайлап каавыт, шөлүңде ажылдарыңны доозуп ал, а ооң соонда бажыңыңны тудуп эгеле.

²⁸ Өске кижиге удур хоозун херечилел кылба, аас-сөзүңден меге үнмезин.

²⁹ «Ол кижи меңээ кандыг хамаарылгалыг болчук, мен база аңаа шак ындыг хамаарылгалыг болуйн: кылган херектери дээш, кеземчеден көргүзейн!» – диве.

³⁰ Бир катап чалгаа кижиниң шөлүнүң чаны-биле, угааны четпес ээ кижиниң виноград шөлүнүң чоогу-биле эртип бар чыткан мен.

³¹ Көөрүмге, чер болганда тенниг чадаң ыяш өзүп үнген, бок үнүштер черни шыва апкан, даш херим буступ калган болду.

³² Ол бүгүнү көрүп, боданып тургаш, көрген, билген чүүлүмден мындыг түңнел үндүрдүм:

³³ ам-даа удуп-ноюрзап чыдар болзуңза, ам-даа хөлестеп чыдар болзуңза,

³⁴ тояанчы дег, ядарал сенче халдап кээр, үптекчи дег, түрегдел сенче халдап кээр.