Чугаалар 21 - Ыдыктыг Библия

¹ Дээрги-Чаяакчының холунга хаанның чүрээ – агым суг дег: Ол ону күзээн-не уг-шиинче аксыптар.

² Кижи бодунуң бодаарын ёзугаар кезээде шынныг болур, ынчалза-даа чүректерни Дээрги-Чаяакчы шенеп турар.

³ Өргүл салыр кижиге көөрде, бодун чөптүг болгаш шын ап чоруур кижи Дээрги-Чаяакчының сеткилинге кирер.

⁴ Бузуттуг улустуң ылгалып көстүрү турамык көрүш биле улуургак чүрек – бачыт-тыр.

⁵ Кызымак кижиниң бодалдары ыяап-ла элбекшилге эккээр, а далаш чорук чүгле түрегделге чедирер.

⁶ Байлакшылды меге-биле чедип ап турар кижи – хоозун чүүл сүрүп, өлүмче чүткээн кижи-дир.

⁷ Бузуттуг улустуң каржы-бак үүлгедиглери боттарын-на узуткап каар, чүге дээрге олар чөптүг чорукту сагыырындан ойталаан болгай.

⁸ Бак кижиниң оруу – соора баар, а кем-буруу чок кижиниң ажыл-херектери ак сеткилдиг.

⁹ Хыйланчак кадай-биле чаңгыс черге чурттаарынга көөрде, оон озалааш үгекке чурттааны дээре.

¹⁰ Бузуттуг кижи бачытты аажок күзээр: чанында эжин безин өршээвес.

¹¹ Кочуургак кижини кезедир болзуңза, кенен кижи угаан кире бээр, мерген угаанныг кижини эдип-чазаар болзуңза, билии немежир.

¹² Чөптүг-шынныг кижи бузуттугларның аалын хайгаараар база оларга айыыл халдадып каар.

¹³ Ядамыктың алгы-кышкызын дыңнааш, кулаан бөөшкүннеп аар кижи боду база кажан-бир алгыра бээрге, кым-даа харыылавас.

¹⁴ Чажыт белек килеңни оожургадыр, бүдүү уштуп сунган хээли калчаалыг килеңни намдадыр.

¹⁵ Шынныг шииткел чөптүг кижиге – өөрүшкү, бузут үүлгедикчилеринге – буураашкын.

¹⁶ Угаанның оруундан аза берген кижи өлүглер оранынга чеде бээр.

¹⁷ Хөглээшкинге ынак кижи чединмес апаар, арага-дары биле үс-чагга ынак кижи черле байывас.

¹⁸ Чөптүг-шынныг кижиден чайлаан багай чүве бузуттуг кижини таварыыр, эки мөзүлүг кижиден чайлаан багай чүве кара сагыштыг кижини таварыыр.

¹⁹ Хыйланчак болгаш ажынчак кадай-биле чурттаарынга көөрде, ээн кургаг ховуга чурттааны дээре.

²⁰ Мерген угаанныг кижиниң аалында үнелиг курлавырлар биле үс-чаг үзүлбес, а мелегей кижи төдүзүн төтчеглеп алыр.

²¹ Чөптүг-шынныг чорук болгаш энерелче чүткээн кижи узун назынны, чөп-шынны, алдар-хүндүнү тып чеде бээр.

²² Мерген угаанныг кижи күш-шыдалдыг улустуң хоорайын эжелеп алыр, оларның идегеп турганы шивээзин узуткап каар.

²³ Аас-дылын тыртып чоруур кижи айыылдардан бодун камгалаар.

²⁴ «Кочуургак» деп адаттырар адыыргак, турамык кижи улуургай бергенде, хай-чагырга билбес.

²⁵ Чалгаа кижиниң алыксак-чиксээ ону өлүмге чедирер, чүге дээрге ооң холдары ажыл кылыр хөңнү чок.

²⁶ Чамдык улус үргүлчү «алыйн-чиийн» дээр, а чөптүг-шынныг кижи хараадал чокка үлеп бээр.

²⁷ Бузуттуг улустуң өргүлдери – ылаңгыя бузуттуг сагыш-биле салган өргүлдер – бужар чүүл-дүр.

²⁸ Мегечилерниң херечилели буурап каар, а сөөлгү сөс – шупту чүвени боду дыңнаан кижиге артар.

²⁹ Бузуттуг кижиниң ыядыр арны чок болур, а эки мөзүлүг кижи бодунуң оруу-биле дорт бар чыдар.

³⁰ Кижиниң мерген угааны-даа, угаан-сарыылы-даа, арга-сүмези-даа Дээрги-Чаяакчының мурнунга хоозун чүүлдер-дир.

³¹ Чаалажырда мунар дээш, аът-хөлдү белеткеп каар, а тиилелгени Дээрги-Чаяакчы хайырлаар.