Чугаалар 20 - Ыдыктыг Библия

¹ Арага биле эзиртир суксун кижини кочуургак болгаш үен-даян кылып каар, оларга алзыпкан кижи угаанныг болбас.

² Хаанның коргунчуг килеңи – арзылаң ырланганы дег: ону хорададып алыр кижи бодунга хора чедиргени ол.

³ Алгыш-кырышка киришпес кижи алдар-хүндүлүг, а мелегей кижи бодун тудуп шыдавас.

⁴ Чалгаа кижи чогуур үеде тараа тарывас, ынчангаш дүжүт ажаар үе кээрге, куруг калыр.

⁵ Кижиниң чүрээнде бодал – терең ээрем дег, ынчалза-даа угаанныг кижи оон безин узуп ап шыдаар.

⁶ «Бүзүрелдиг, шынчы мен» деп чарлаттынган улус-ла хөй, а ылап шынчы кижи тыптыр деп бе?

⁷ Чөптүг-шынныг кижи кем-буруу чок чурттаар, ооң ажы-төлү амыр-чыргалдыг.

⁸ Хаан кижи шииткел үндүрүп оруп алгаш, көрүжү-биле кандыг-даа бузутту тарадыр сывырыптар.

⁹ «Мээң чүрээмде кем-бак чок, бачыттарымдан арыгланып алдым» – деп шыдаар кижи бар бе?

¹⁰ Соора деңзилеп-даа бээри, соора хемчээп-даа бээри – Дээрги-Чаяакчының мурнунга бужар чүүл-дүр.

¹¹ Кижини аныяандан-на ажыл-херээнден билип ап болур: кылган херектериниң арыг-шынчызы илдең болур.

¹² Дыңнаар кулак-даа, көөр карак-даа – Дээрги-Чаяакчының чаяап каан чүүлдери-дир.

¹³ Уйгуга ынак болзуңза, түрегделге дүжер сен; карааң шийбес болзуңза, тоттур чемненир сен.

¹⁴ Садып алыкчы: «Багай бараан-дыр!» – дээр, а бичии ырай бергеш, оозу-биле мактанып-ла эгелээр.

¹⁵ Угаанныг сөс-домак алдынга, эртине дашка болгаш улуг үнелиг каасталгага дөмей.

¹⁶ Хары кижи дээш дагдынган кижиниң идик-хевин долаа кылдыр ап ал, өске улус дээш дагдынган кижиден долаадан ап ал.

¹⁷ Меге-биле чедип алган хлеб амданныг-ла, ынчалза-даа алызы барып аксыңга сай-дашче хуула бээр.

¹⁸ Сүмележип тургаш, бодалды быжыктырар: дайын чорударда, арга-сүмеден дыңнап ал.

¹⁹ Шуугаар кижи чажыттарны ажыдып бээр, ынчангаш аксы бош кижи-биле харылзашпа.

²⁰ Ада-иезин бак сөглээр кижиниң чырыткызы дүмбей караңгыда өжүп каар.

²¹ Харамдыгып сегирип алганың өнчү сөөлүнде кээп алгыш-йөрээл албас.

²² «Бузут дээш өжээн негээр мен!» – диве; Дээрги-Чаяакчыга идеге, Ол ынчан сени камгалаар.

²³ Килдээр шойлары мегелээр деңзи – Дээрги-Чаяакчыга бужар чүүл-дүр, шын эвес деңзи – бак херек-тир.

²⁴ Дээрги-Чаяакчы кижиниң оруун изеп бээр, а кижи бодунуң оруун канчап билип аарыл?

²⁵ Ыдыктыг даңгыраан далаш-биле бергеш, оон өскээр боданып эгелээри – кижиге дузак-тыр.

²⁶ Мерген угаанныг хаан бузуттуг улусту тараа дег тарадыр челбипкеш, дээрбелеп кааптар.

²⁷ Кижиниң сеткили – ооң бүгү бодун өттүр чырыдып турар Дээрги-Чаяакчының чырыткызы-дыр.

²⁸ Шынчы чорук болгаш энерел хаанны кадагалаар, ооң дүжүлгези энерел быжыгып турар.

²⁹ Аныяк-өскенниң алдары – күчү-күжүнде, а кырганнарның каасталгазы – буурул бажында.

³⁰ Балыг-бышкын болгаш сорбулар кижини бузуттан арыглаар; эттеп-согары – кижиниң ишти-хөңнүн эдип-чазаар.