Чугаалар 2 - Ыдыктыг Библия

Ачазының оглунга чагыг-сургаалы

¹ Оглум, мээң сөстеримни хүлээп ал база чагыгларымны чүрээңге шыгжап ал;

² мерген угаанны кичээнгейлиг дыңна база чүрээңни билиишкинче ээлдирип ал;

³ билигни кый де база угаанны кыйгырып ал;

⁴ угаанны, мөңгүннү дег, диле база эртине-байлак шыгжаан черни дег, истеп тып ал –

⁵ ынчан Дээрги-Чаяакчыдан коргары деп чүл ол дээрзин билип каар сен база Бурган дугайында билигни тып аар сен.

⁶ Чүге дээрге мерген угаанны Дээрги-Чаяакчы хайырлаар, билиг биле угаан Ооң аас-сөзүн дамчып кээр болгай.

⁷ Бурган эки мөзүлүг улуска тиилелгени белеткеп берген. Ол – кем-буруу чок улустуң мурнунга турар камгалалы.

⁸ Ол чөптүг чоруктуң оруктарын камгалап турар база Аңаа бердинген улустуң оруун кадагалап турар.

⁹ Ынчан сен чөптүг болгаш шынчы чорукту, эки мөзүлүг боорун база бүгү-ле буянныг оруктарның дортун билип каар сен.

¹⁰ Чүге дээрге сээң чүрээңче мерген угаан сиңе бээр, билиг – сеткилиңге тааржы бээр.

¹¹ Бодамчалыг чорук сени камгалаар; улуг угаан – кадагалаар.

¹² Мерген угаан сени бузуттугларның оруундан, шын сеткилинден чугаалавас улустан кадагалаар.

¹³ Шак ындыг улус дүмбейниң оруктары-биле чоруур дээш, дорт оруктан чайлай бээр.

¹⁴ Ол улус дээрге бузуттуг үүлгедиглер кылгаш, өөрүүр, бузут биле бачытка таалаар,

¹⁵ ыргак оруктарда боттарының изин изеп, бузутту эдерип чоруур улус-тур.

¹⁶ А оон ыңай мерген угаан өске кижи кадайындан – элзедип чугаалаар, ашактыг херээженден база кадагалаар.

¹⁷ Ол дээрге аныяандан кады чурттаан эжин каапкан, Бурганының берген чагыын уттупкан херээжен-дир.

¹⁸ Ол херээженниң бажыңы – өлүмнүң какпазы-дыр, ооң оруу – өлүглер оранынче орук-тур.

¹⁹ Ооң бажыңынче кирген кижи дедир ээп келбес, амыдыралдың оруунче катап кирбес.

²⁰ Ынчангаш эки улустуң оруун эдер, чөптүг-шынныг улустуң изин исте.

²¹ Эки мөзүлүг улус чер-чуртка чурттаар, кем-буруу чок улус аңаа артып каар болгай.

²² А бузуттуг улусту чырык черге амылыг арттырбас, кара сагыштыг улусту ооң кырынга узуткап кааптар.