Чугаалар 18 - Ыдыктыг Библия

¹ Бодун бодаар кижи күзээн чүвезин кылырынче чүткүүр, угаанныг сүмелерге удурланыр.

² Мелегей кижи боданыр хөңнү чок, харын бодун бодамчалыг кылдыр көргүзүксээр.

³ Бузут үүлгеткен кижи дора көрдүрер, а бак атка кирерге, дорамчылал сүрүп кээр.

⁴ Кижиниң аксындан үнген сөстер – терең ээрем дег; мерген угаанның үнер дөзү – агым суглар дег.

⁵ Бузуттуг кижини чүүлдүг деп көөрү азы эки кижиге чөптүг шииткел үндүрбези – бак херек-тир.

⁶ Мелегей кижиниң аас-дылы алгыш-кырыш үндүрер, аксындан үнген сөзү эттедип-соктурарынга чедирер.

^7-8 Мелегей кижиниң чугаа-сөзү буураашкынга чедирер, аксындан үнген сөзү – бодунуң туттунар дузаа.

⁹ Хопчу кижиниң чугаа-сөзү амданныг чем дег – кижиниң ишти-хөңнүнүң эң ханызынче кире бээр.

¹⁰ Ажылынга чалгаа кижи – үрегдекчиниң дуңмазы.

¹¹ Дээрги-Чаяакчының ады – быжыг суурга: аңаа чаштынган чөптүг-шынныг кижи камгалалды алыр.

¹² Бай кижиге эт-хөреңгизи – быжыг шивээ-даа дег, ол аңаа артап болбас хана дег сагындырар.

¹³ Кижи буураар бетинде туразы улгадыр, а биче сеткил алдарны мурнап чоруур.

¹⁴ Чугааны чедир дыңнавайн, харыы бээри – мелегей чорук болгаш ыят-тыр.

¹⁵ Сеткили сорук кирген кижи аарыг-аржыкты ажып шыдаар, ынчалза-даа сеткили ундаргай болза, ол канчаптарыл?

¹⁶ Сарыылдыг кижиниң чүрээ билигже чүткүүр, мерген угаанныг улустуң кулаа билиг дилээр.

¹⁷ Белек сөңнээшкини кижиге делгем орукту ажыдар, бедик ат-дужаалдыг улус аразынче киире бээр.

¹⁸ Удурланыкчызы чугаалап эгелевээнде, сактырга, баштай чаргылдажып эгелээн кижиниң сөстери шынныг-даа ышкаш болур.

¹⁹ Күштүг удурланыкчыларның маргыжын чарар дээш үлүг тыртары алгыш-кырышты соксадыр.

²⁰ Хомудаан ха-дуңмаң – быжыг шивээ-ле; алгыш-кырыш – шивээ хаалгазының дээктери-ле.

²¹ Кижи чугаа-сөзүнүң үре-түңнели-биле хырнын тоттурар: аксы-биле чедип алган чүвезин чигеш, тодар.

²² Амыдырал биле өлүм – чугаа-сөстүң эргезинде; чугаа-сөзү-биле эп-найыралдыг кижи ооң үре-түңнелин амзап көөр.

²³ Кадай тып алган кижи ачы-буян тып алган-дыр, Дээрги-Чаяакчының ээ көрнүүшкүнүн чедип алган-дыр.

²⁴ Ядыы кижиниң сөстеринде – кызып дилээни, а бай кижиниң харыызында – каржы-хажагайы бар.

²⁵ Хөй таныш өөрлүг кижи бак чүведен чайлавас; сеңээ ха-дуңмаңдан артык ынак эжиң кижи база турар.