Чугаалар 16 - Ыдыктыг Библия

¹ Кижиниң чүрээнде янзы-бүрү бодалдар бар, а ооң аас-сөзүнден үнер шиитпир Дээрги-Чаяакчыдан кээр.

² Кижи бодунуң оруктарын дөгерезин кем-буруу чок деп санаар, ынчалза-даа сеткилдерни Дээрги-Чаяакчы шенээр.

³ Дээрги-Чаяакчыга ажыл-херектериңни дагзып бер, ынчан сээң бодалдарың боттаны бээр.

⁴ Дээрги-Чаяакчы бүгү чүүлдерни оларның боттарының салым-чолу дээш чаяаган; бузуттуг кижи безин айыыл-халап хүнү дээш чаяаттынган.

⁵ Адыыргак кижи Дээрги-Чаяакчыга бужар чүүл болур, ол кеземчеден канчап-даа чайлап шыдавас.

⁶ Шынчы болгаш энерелдиг болуру – кижиниң бузудун арыглаар; Дээрги-Чаяакчыдан коргары – айыылды чайладыр.

⁷ Дээрги-Чаяакчыга кижиниң оруктары тааржыр болза, ону дайзыннары-биле безин эптештирип каар.

⁸ Чөптүг чорук чок чорааш, элбек орулгалыг боорунга көөрде, чөптүг чорук-биле кады чорааш, хөй эвес олчалыг боору дээре.

⁹ Кижиниң чүрээ оруун боду бодап алыр, ынчалза-даа ооң базымнарын Дээрги-Чаяакчы башкарар.

¹⁰ Хаанның аксында – өттүр билир сөстер; ооң үндүрген шииткелинде меге турбас.

¹¹ Мегелевес деңзи тавактары Дээрги-Чаяакчыдан кээр, хапка суккан деңзи шойлары база Оон кээр.

¹² Бачыттыг үүлгедиглер хааннарга бужар чүүл болур, дүжүлге чөптүг чоруктуң ачызында тендиш дивес.

¹³ Шынны сөглээр кижи хааннарга таарымчалыг, олар алыс шынны чугаалаар улуска ынак.

¹⁴ Хаанның килеңи – өлүмнүң медээчизи дег; мерген угаанныг кижи ону чайладып шыдаар.

¹⁵ Хаанның чырык көрүжүнде – амыдырал бар, ооң эки көөрү – кааң өйде чаъс эккелген булут-ла.

¹⁶ Алдын эвес, мерген угаан чедип аары канчап-даа дээре, мөңгүн эвес, сарыыл чедип аарын шилиири черле дээре.

¹⁷ Эки мөзүлүг улустуң оруу – бузуттан чайлаары; шын оруундан соора барбас кижи амы-тынын кадагалап алыр.

¹⁸ Буураашкынны – адыыргаары, а аштырыышкынны – улуг тура мурнаар.

¹⁹ Адыыргак улус-биле олча үлежиринге көөрде, ядыы улус-биле биче сеткилдиг чурттап чорааны дээре.

²⁰ Бодамчалыг чурттап чоруур кижи – чаагай чорукту чедип алыр; Дээрги-Чаяакчыга идегээр кижи – амыр-чыргалга чедер.

²¹ Мерген угаанныг кижи улуска сарыылдыг диртир, аас-сөстүң аянныы бүзүренчиг боорун күштелдирер.

²² Угаанныг боору – амыдырал хайырлаар суг бажы, а мелегей кижиниң кеземчези – сээдеңи.

²³ Мерген угаанныг кижиниң угааны ооң сөзүн сарыыл киирер база чугаа-сөзүн бүзүренчиг болдурар.

²⁴ Буянныг сөстер – ары чигири дег: кижиниң сеткил-сагыжын тааладыр-даа, ишти-хөңнүн экиртир-даа.

²⁵ Бир-ле орук улуска дорт ышкаш сагындырар-даа болза, адак соонда өлүмге чедире бээр.

²⁶ Ажылчын кижиниң аштааны ону ажылдадыр, ооң чем чиксээри аңаа дыш бербес.

²⁷ Дүржок кижи бузут бодап тып турда амыр-ла – ооң аас-сөзү өрттендир чиир от дег.

²⁸ Кара сагыштыг кижи алгыш-кырыш өөскүдер, хопчу кижи эжишкилерни чара кирер.

²⁹ Күш дөгээр кижи эжин дуурайлаар база бак орукче киир тыртар.

³⁰ Хыйыртап көөр кижиниң сагыжы кара; аксын тыртыйтыр кижиниң үүлгедип турар херектери бак.

³¹ Буурул баш – алдарлыг оваадай, ону чөптүг-шынныг амыдырааш, чедип алыр.

³² Килеңнээчел эвес кижи күчүлүг маадырдан дээре, бодун туттунуп билир кижи хоорайлар эжелекчизинден дээре.

³³ Шиитпир үндүрүксээр улус төлге даштары-биле үлүг тыртар, ынчалза-даа шиитпир бүрүзү Дээрги-Чаяакчыдан кээр.