Чугаалар 14 - Ыдыктыг Библия

¹ Мерген угаанныг херээжен аалын быжыглаар, а мелегей херээжен ону боду-ла үрегдеп бузар.

² Дээрги-Чаяакчыдан коргар кижи – дорт оруктап, а Ону херекке албас кижи – ыргак-дагыр оруктап чоруур.

³ Мелегей кижини бодунуң аас-сөзү кымчылаар, а мерген угаанныг улусту чугаа-сөзү кадагалаар.

⁴ Шарылар чок черде аңмаарлар куруг, а күш-шыдалдыг шарылар барда, дүжүт элбек.

⁵ Шынчы херечи мегелеп чугаалавас, а мегелеп херечилээр кижи аксындан меге дүжүрбес.

⁶ Кочуургак кижи мерген угаанны дилээш-даа, дөмей-ле тыппас, а угаангыр кижи билигни белен шиңгээдип алыр.

⁷ Мелегей кижиден ырадыр тур, оон угаанныг аас-сөс черле дыңнавас сен.

⁸ Кажараан кижиниң мерген угааны – бодунуң оруун билиринде, а мелегей улустуң сээдеңи – оп-мегезинде.

⁹ Мелегей улус кем-буруу дээш өргүлдерни шоодар, а эки мөзүлүг улус Дээрги-Чаяакчының сеткилинге кирер.

¹⁰ Кижиниң муңгаралын чүгле чүрээ билир, ооң өөрүшкүзүн-даа үлежип шыдаар өске улус тывылбас.

¹¹ Бузуттуг улустуң оран-савазы хоозураар, а эки мөзүлүг улустуң аалы чечектелир.

¹² Бир-ле орук дорт ышкаш сагындырар-даа болза, адак соонда өлүмге чедире бээр.

¹³ Каттырып хөглеп-даа туруңда, чүрээң саргып аарып боор, өөрүшкүнү муңгарал-даа солуп боор.

¹⁴ Шынчы эвес кижи үүлгедии-биле чүү чүвеже бар чытканыл – ону чедип алыр, а эки кижи ажыл-херектери дээш шаңнадыр.

¹⁵ Кенен кижи дыңнаан чүвезинге-ле бүзүрей бээр, а бодамчалыг кижи базым бүрүзүн ыяк бодап алыр.

¹⁶ Мерген угаанныг кижи оваарымчалыг болгаш, бузуттан чайлай бээр, а мелегей кижиниң бардамы дам баар, туразы улам-на улгадыр.

¹⁷ Ажынчак кижи мелегей чоруктар кылыр, кара сагыштыг кижини улус көөр хөңнү чок.

¹⁸ Кенен улуска онаажыр үлүг – мелегей чорук, а бодамчалыг улус билии-биле алдаржыыр.

¹⁹ Бак улус – буянныг улуска, бузуттуг улус – чөптүг-шынныг кижиниң хаалгазынга сөгүрүүр.

²⁰ Ядыы кижини кожазы безин кижи деп санавас, а бай кижиге ынак улус эңмежок.

²¹ Кожазын бак көөр кижи – бачыт үүлгеткени ол, а ядыы улуска ачы-дузалыг кижи амыр-чыргалдыг

²² Өзү кара улус оруундан азар, а буян тарыыр улуста шынчы энерел бар.

²³ Карак кызыл ажылдан кезээде орулга кээр, а хоозун чугаадан чүгле каража үнер.

²⁴ Мерген угаанныг улустуң ат-алдары – байлакшылы ол, а мелегей улустуң каасталгазы – мелегей чоруу.

²⁵ Шынчы херечи улустуң амы-тынын камгалаар, а кара сагыштыг кижи аксындан меге дүжүрбес.

²⁶ Дээрги-Чаяакчыдан коргары – быжыг чөленгииш; кижиниң бодунуң-даа, ажы-төлүнүң-даа хоргадалы ында болур.

²⁷ Дээрги-Чаяакчыдан коргары – амыдырал хайырлаар суг бажы база өлүмнүң дузаандан адырлыр арга.

²⁸ Албаты чону хөйде – хаан кижи өндүр улуг, а чону эвээште – чагырыкчы буураар.

²⁹ Белен-селен ажынмас кижи улуг угаанныг, а хорадаачал кижи мелегей чоруун көргүзер.

³⁰ Сеткил дыштыгда, мага-бот кадык, а хүннээчел сагыш – сөөк-даякты иридиптер.

³¹ Ядамыкты дарлаар кижи ооң Чаяакчызын бак сөглээни ол, а түремикке ачы-дуза көргүзер кижи Ону алдаржыдар.

³² Бузуттуг улустуң багы оларны базар, а чөптүг-шынныг кижи өлү-даа бээрге, ооң хоргадалы бар.

³³ Мерген угаан – сарыылдыг чүрекке чурттаар, мелегей-даа улустуң аразынга бодун көргүзер.

³⁴ Чөптүг-шынныг чорук чонну өрү көдүрер, а бачыт – аймакты бак атка киирер.

³⁵ Хаан кижи угаанныг чалчазы дээш сагыжы ханар, а бужар-бак херектер үүлгеткен кижиже килеңнээр.