Чугаалар 13 - Ыдыктыг Библия

¹ Оглунуң мерген угааны ачазының эдип-чазаан сургаалындан тыптыр, а кочуургак кижи чемелээшкин дыңнап шыдавас.

² Кижи бодунуң чугаа-сөзүнүң буянныг үре-түңнелин четтирер, а кара сагыштыг улус күчүлел-биле амыдыраар.

³ Аас-сөзүн оваарымчалыг ажыглаар кижи амы-тынын кадагалап аар, а аас-сөзүн тыртып шыдавас кижи бодун узуткап аар.

⁴ Чалгаа кижи чеже-даа күзеп-манаарга, чүү-даа чок боор, а кызымак улустуң хырны тодар.

⁵ Чөптүг-шынныг кижи мегени көөр хөңнү чок, а бузуттуг кижи бужар-бак херектер кылыр.

⁶ Актыг кижиниң оруун чөптүг-шынныг чоруу кадагалаар, а бачыттыг кижини кем-буруузу оруундан астырар.

⁷ Бир кижи, хол даяң боду, бай-шыдалдыг бооп, а өске кижи, хөй байлакшылдыг боду, ядыы бооп баажыланыр.

⁸ Бай кижи бодунуң байлакшылы-биле амы-тынын садып хостаар, а ядыы кижи кажан-даа кыжаныг дыңнавас.

⁹ Чөптүг-шынныг улустуң чырыы өөрүшкүлүг хып турар, а бузуттуг улустуң чырыткызы өжүп каар.

¹⁰ Хоозун кижи турамык чоруу-биле чүгле алгыш-кырыш үндүрер, а арга-сүме дыңнаар улус мерген угаанны тып алыр.

¹¹ Хей черден келген акша-хөреңги чиде бээр, а күш үндүрүп, бичиилеп чыгганы – немежир.

¹² Үр бүтпээн идегел чүректи хилинчектээр, а бүткен күзел – амыдыралдың ыяжы-дыр.

¹³ Чугаалаан сөстү тооп көрбес кижи бодун узуткап аар, а чагыгны хүндүлээр кижи шаңнал алыр.

¹⁴ Мерген угаанныг кижиниң өөредии – амыдырал хайырлаар суг бажы; өлүмнүң дузаандан адырлыр арга.

¹⁵ Шынныг угаан кижиге ээ көрүүшкүннү шаңнаар, а кара сагыштыг кижиниң оруу өлүмге чедирер.

¹⁶ Кажараан кижи бүрүзү бодун угаанныг алдынар, а мелегей кижи бодунуң сээдеңин нептередир.

¹⁷ Бак элчи айыылга таваржыр, а шынчы айбычы экиртиишкин эккээр.

¹⁸ Сургаалды хүлээвээн кижи түрегдел көөр база бак атка кирер, а чемелээшкинни хүлээп алган кижи алдар-хүндүге чедер.

¹⁹ Күзелдиң бүдери – сеткилди тааладыр; мелегей кижи бузуттан адырлырын эң бак деп көөр.

²⁰ Мерген угаанныг улус-биле эдеришкеш, мерген угаанныг апаар сен, а мелегейлер-биле эштешкеш, айыылдан чайлавас сен.

²¹ Бачыттыг улусту бузут истеп-сүрер, а чөптүг-шынныг улустуң шаңналы буян болур.

²² Эки кижиниң өнчү-хөреңгизи үре-салгалынга артар, а бачыттыг кижиниң байлакшылы чөптүг-шынныг кижиниң холунга кирер.

²³ Ядыы улустуң дүжүдү элбек-даа болза, ону хоойлу-дүрүм чок чорук оорлап аппаар.

²⁴ Шыкпыыжын камнаар кижи оглунга бак чүве күзээни ол, а оглунга ынак кижи ону угаан киир кезедир чүткүлдүг.

²⁵ Чөптүг-шынныг кижиниң хырны тодуг, а бузуттуг улустуң хырны куруглаар.