Чугаалар 11 - Ыдыктыг Библия

¹ Меге деңзи Дээрги-Чаяакчыга бужар бооп көстүр, а шын деңзи шойлары Аңаа таарымчалыг.

² Турамык чорукту бак атка кирери чыпшыр сүрүп чоруур, а томаарыыр чоруктуң эдеринчизи – мерген угаан.

³ Эки мөзүлүг улусту оларның кем-буруу чогу баштап чоруур, а кара сагыштыг улусту оп-мегези узуткап каар.

⁴ Дээрги-Чаяакчының килеңиниң хүнү кээрге, байлакшыл дузалап шыдавас, а чөптүг-шынныг чорук өлүмден камгалаар.

⁵ Кем-буруу чок улустуң чөптүг-шынныг чоруу дорт оруктап эдертип аппаар, а бузуттуг кижи бодунуң бачыдындан өлүп калыр.

⁶ Эки мөзүлүг улусту чөптүг-шынныг чоруу камгалаар, а кара сагыштыг улус кем-буруулуг күзээшкиннериниң дузаанга туттурар.

⁷ Бузуттуг кижиниң идегели ооң-биле кады өлүр; бак улустуң ынаныжы база кырлып калыр.

⁸ Чөптүг-шынныг кижи айыылдан чайлаар, а бузуттуг кижи ол айыылга таваржыр.

⁹ Бужар-бак кижиниң аас-сөзү чанында кижини узуткаар, а чөптүг-шынныг улус билии-биле камгаланыр.

¹⁰ Чөптүг-шынныг улус эки чурттаар болза, хоорайның чону өөрүп-хөглээр, а бузуттуг улус өлүп-чидер болза – өөрүшкүден алгыржыр.

¹¹ Хоорай эки мөзүлүг улустуң алгыш-йөрээлдери-биле тургустунар, а бузуттуг улустуң аас-сөзү-биле буступ дүжер.

¹² Угааны четпес кижи эжин бак сөглээр, а угаанныг кижи ыыттавайн эрттириптер.

¹³ Шуугаар кижи өске улустуң чажыттарын ажыдар, а шынчы кижи чаңгыс-даа сөс ышкынмас.

¹⁴ Чагыг-сургаал чокта, чон кырлып каар, а чөвүлекчилерниң саны хөй болза, чон камгалал алыр.

¹⁵ Өске кижи дээш дагдынып турар кижи бодунче айыыл халдадыр, а дагдынары-биле далашпас кижи айыылдан чайлаар.

¹⁶ Бүдүштүг херээжен ат-алдарга чедер, а ажылгыр улус байлакшылды чедип алыр.

¹⁷ Энерелдиг кижи бодунга ажык-дуза чедирер, а каржы-хажагай кижи бодунга айыыл халдадыр.

¹⁸ Бузуттуг кижиниң шаңналы – хоозун, а чөптүг-шынныг чорук тарыыр кижи алыс шын шаңналды алыр.

¹⁹ Чөптүг-шынныг чорук амыдыралче орук изээр, а бузут сүрер кижи өлүмче бар чыдар.

²⁰ Кара сагыштыг улус Дээрги-Чаяакчыга бужар бооп көстүр, а кем-буруу чок улус Ооң сеткилинге кирер.

²¹ Кем-буруулуг кижиниң кеземче алыры чайлаш чок, а чөптүг-шынныг улустуң үре-салгалы айыылдан адырлыр.

²² Угаан чок херээженниң чараш-каазы хаван хаайында алдын сырга дег.

²³ Чөптүг-шынныг улустуң күзел-бодалы буян бооп хуула бээр, а бузуттуг улустуң идегели Дээрги-Чаяакчының килеңинге чедирер.

²⁴ Бир кижи харам чогу-биле үлеп-даа бергеш, немелделиг болур, а өске кижи хөлүн эрттир харамнангаш, камнап-даа алза, каражадап үнер.

²⁵ Ачы-дузалыг кижи чедимчелиг болур, өске улустуң суксунун хандырган кижи боду база суксавас.

²⁶ Тараазын шыгжап алгаш, сатпас кижиге чоннуң каргыжы чедер, а садып турар кижи алгыш-йөрээлдиг болур.

²⁷ Буян дилээр кижи ээ көрүүшкүннү чедип алыр, а бузутче чүткүүр кижи ону бодунче халдадыр.

²⁸ Байлакшылынга идегээр кижи – тайып ужар, а чөптүг-шынныг улус ногаан бүрү ышкаш частып үнер.

²⁹ Бодунуң өг-бүлезинче айыыл халдаткан кижиниң алыр үлүү – хат дег хоозун; мелегей кижи мерген угаанныг кижиниң кулу апаар.

³⁰ Чөптүг-шынныг кижиниң үрезининден амыдыралдың ыяжы өзүп үнер, мерген угаанныг кижи улустуң сеткил-чүрээн бодунче хаара тудар.

³¹ Чөптүг-шынныг кижи шаңналын бо черге ап алыр болганда, бачыттыг, бузуттуг улус кеземчени албан алыр.