Чугаалар 10 - Ыдыктыг Библия

Соломоннуң улуг чыындызы

¹ Соломоннуң угаадыглыг чугаалары бо-дур. Мерген угаанныг оол ачазын өөртүр, а мелегей оол авазын муңгарадыр.

² Бузуттан келген байлакшылдың ажык-дүжүү чок, а чөптүг-шынныг чорук өлүмден камгалаар.

³ Дээрги-Чаяакчы чөптүг-шынныг кижини аштатпас, а бузуттуг кижиниң күзээн чүүлүн таптай базып кааптар.

⁴ Кылыр чүве чок холдар ядаралга чедирер, а кызымак холдар байыдар.

⁵ Чайны өттүр ажылдаар кижи – угаанныг, а дүжүт ажаалдазын эрттир удуп каар кижиниң ады баксыраар.

⁶ Чөптүг-шынныг кижиниң бажын алгыш-йөрээлдер каастаар, а бузуттуг улустуң аас-сөзү кара сагыжын чажырар.

⁷ Чөптүг-шынныг кижиниң ат-сураа алгыш-йөрээлдиг, а бузуттуг кижиниң ады чиде бээр.

⁸ Мерген угаанныг кижи чагыгларны тооп дыңнаар, а мелегей чүве чугаалаар кижи буурап дүжер.

⁹ Кем-буруу чок орук-биле бар чыдар кижиге айыыл халдавас, а бодунуң оруктарынга будалып чоруур кижиниң херектери билдингир апаар.

¹⁰ Карак базып, бузутче кыйгырар кижи хилинчекти эккээр; мелегей чүве чугаалаар кижи буурап дүжер.

¹¹ Чөптүг-шынныг кижиниң аас-сөзү – амыдырал хайырлаар суг бажы, а бузуттуг улустуң аас-сөзү кара сагыжын чажырар.

¹² Кижилерге хөңнү чок чорук алгыш-кырышты өөскүдер, а ынакшыл бар болза, бүгү хомудалдарны өршээп боор.

¹³ Угаанныг улустуң аас-сөзүнден мерген угаан бодараар, а угааны четпес улустуң ооргазынга дүжер шыкпыыш тыпты бээр.

¹⁴ Мерген угаанныг улус билиглиин чажырар, а мелегей кижиниң аас-сөзү буураашкынга чедирер.

¹⁵ Бай-шыырак кижиниң өнчү-хөреңгизи – шивээ дег, а ядыыларның түрегдели – бузундулар дег.

¹⁶ Чөптүг-шынныг кижиниң алыр төлевири ону амы-тынныг арттырар, а бузуттуг кижиниң ажык-кончаазы ону бачытче киирер.

¹⁷ Чагыг-сургаалды эдерери – амыдыралче орук-тур, а чемелээшкинни хүлээвес кижи аза бээр.

¹⁸ Өжээннежиишкин чажырар кижиниң аас-сөзү мегеден бүткен; хоп-чип тарадып чоруур кижи – мелегей.

¹⁹ Хөй сөстүгде, бачыттан чайлаары болдунмас, а угаанныг кижи белен сөс ышкынмас.

²⁰ Чөптүг-шынныг кижиниң дылы арыг мөңгүн дег үнелиг, а бузуттуг улустуң чүректери көңгүс өртек чок.

²¹ Чөптүг-шынныг кижиниң аас-сөзү хөй улусту кадагалаар, а мелегей улус угааны четпезинден узуткаттынып каар.

²² Дээрги-Чаяакчының ачы-буяны кижини байыдар, ооң-биле кады хилинчек келбес.

²³ Мелегей кижи бак үүлгедиг кылырын оюн-хөг деп бодаар, а сарыылдыг кижи мерген угаанга өөрүүр.

²⁴ Бузуттуг улуска коргуп чоруур чүвези чедер, а чөптүг-шынныг улустуң күзелдери чогуп бүдер.

²⁵ Хат-шуурган хөме таварыырга, бузуттуг кижи чок апаар, а чөптүг-шынныг кижиниң үндезин-дөзү мөңгеде быжыг.

²⁶ Чалгаа кижи ону айбылаан улуска – ааста ажыг амдан дег база карак өйген ыш дег.

²⁷ Дээрги-Чаяакчыдан коргар кижи үр амыдыраар, а бузуттуг улустуң назыны кызырлыр.

²⁸ Чөптүг-шынныг кижиниң манаашкын-идегели өөрүшкү-биле бүдер, а бузуттуг улустуң идегели өлүп төнер.

²⁹ Дээрги-Чаяакчы кем-буруу чок кижиге хоргадал болур, а бузут үүлгедир улусту Ол чок кылып каар.

³⁰ Чөптүг-шынныг кижи кезээ мөңгеде тендиш дивес, а бузуттуг улус чырык чер кырынга чурттап артып шыдавас.

³¹ Чөптүг-шынныг кижиниң аас-сөзү мерген угаанны чугаалаар, а бузут чугаалаар кижи узуткаттырар.

³² Чөптүг-шынныг улус таарыштыр чугаалап билир, а бузуттугларның аксы-дылы кара сагыштыг.