Аввакум 2 - Ыдыктыг Библия

¹ Доскуулдап туруп алгаш, суургадан хайгаарап көрүп, Дээрги-Чаяакчының меңээ чүү дээрин, мээң хомудалымга Ооң канчаар харыылаарын билип ап көрейн.

Бурганның харыызы

² Дээрги-Чаяакчы меңээ мынча деп харыылаан: «Мээң чорутканым көстүүшкүннү бижип каг – номчуп турар кижиге билдингир болзун дээш, самбыраларга тода кылдыр шыйып бижип каг.

³ Ол көстүүшкүн бир-ле доктааткан үеге хамааржыр, боттаныышкынынче чүткүп бар чыдар база черле мегелевес; ук көстүүшкүн дораан боттанмас-даа болза, шыдажып мана, чүге дээрге албан чогуп бүдер, үр үеде саадавас.

⁴ Көрүңер даан, туразы улуг кижиниң сагыш-сеткили арыг эвес, а актыг-шынныг кижи бүзүрелиниң ачызында амылыг артар.

⁵ Турамык улусту байлакшылы сотка олуртур, оларга оожургал бербес, ынчангаш боттарының ишти-хырнын тамы ышкаш алгыг кылып аар, ол улус, өлүм-даа дег, пөгери чок; шупту чоннарны чаалап ап, шупту аймактарны чагырып туруп бээр.

⁶ Ынчалза-даа ол чоннар шупту оларны кочулап: „Боттарынга хамаарышпас чүве-биле хөлүн эрттир байып алган улус ат болур! Долаалар төлевири чыып, чүдүртүнүп алган улус чежеге дээр ынчап кээрил?“ – деп ойзу чугаалажыр.

⁷ Сеңээ өрелиг улус хенертен тура халышпас бе, олар оттуп келгеш, сени сириледиппес бе, оларга үптеттирип албас сен бе?

⁸ Хөй чоннарны үптеп-тонаан болгай сен; кижи ханы төккениң дээш, чурттарга, хоорайларга, ында чурттаан бүгү улуска күчүлел көргүскениң дээш, арткан бүгү аймактар сени база үптеп-тонап кааптар.

⁹ Уязын бедик черге тудуп ап, озалдыг байдалдардан бодун айыыл чок болдурар дээш, аал-оранынга былаап алганы олча чыып алыксап турар улус ат болур!

¹⁰ Сээң кара бодалдарың бодуңнуң аал-ораныңны бак атка киирер, хөй чоннарны узуткап тура, бодуңга хора чедиргениң ол-дур.

¹¹ Ханаларда даштар безин сеңээ удур алгыржы бээр, оларның сөстерин бажың-балгаттың ыяш ооргалары бадыткаар.

¹² Өлүрүүшкүн-биле хоорай таваа салып, кемниг үүлгедиг-биле орду тудуп турар улус ат болур!

¹³ Чоннарның ажыл-ижин от чиир деп, аймактар хей черге хинчектенип ажылдаар деп Аг-шериглиг Дээрги-Чаяакчы тодарадып кагбаан чүве бе?

¹⁴ Чүге дээрге Дээрги-Чаяакчының алдарының дугайында билиг чер-делегей кырынга, далайны долдур аккан суг дег, нептерей бээр.

¹⁵ Өске кижиге килеңин куткан дашка сунуп, ооң шалдаң-чанагажын көөр дээш, эзиртир ижиртип турар улус ат болур!

¹⁶ Алдар орнунга кочулал-биле пөгер сен, ам бодуң иш-ле, бужар шалдаңыңны көргүс-ле! Дээрги-Чаяакчының күчүлүг холунуң сунган дашказы сээң ижер үлүүң апаар, ат-алдарыңны баксырадыр сен.

¹⁷ Ливан чуртту каржы-бак чаңнап турганың дег, сени база каржы-бак чаңнаар. Мал-маган кыргып-хыдып турганың дег, сени база узуткап каар. Кижи ханы төккениң дээш, чурттарга, хоорайларга, ында чурттаан бүгү улуска күчүлел көргүскениң дээш, сени база бак аажылаар.

¹⁸ Үнү чок дүрзүлер кылып турар шуткукчу кижи оозунга идегээр-даа болза, ол уран-шевер кижиниң кылып кааны дүрзү-бурган – шуткуп каан меге башкы ол шевер кижиге кандыг ачы-дуза көргүзерил?

¹⁹ Ыяш дүрзүге: „Тынгарлып кел!“, а чугаа-сөзү чок дашка: „Оттуп кел!“ – деп турар улус ат болур! Ол дүрзү кандыг-бир чүвеге өөредип каап шыдаар бе? Көрүңер даан, ону алдын, мөңгүн-биле шап каан-даа болза, амыдыралдың тыныжы ында чок-тур.

²⁰ А Дээрги-Чаяакчы – Бодунуң ыдыктыг өргээзинде, бүгү чер-делегей Ооң мурнунга ыыт чок турзун!»