Амос 9 - Ыдыктыг Библия

Вефилде өргүл бедигээжиниң көстүүшкүнү

¹ Өргүл салыр бедигээш чанында турар Дээргини көрүп кагдым. Ол меңээ мынча дээн: «Дээвиир сириңейни бээр кылдыр адагашты үстүрүпкеш, дээвиирни демги улустуң шуптузунуң баштарынче кээп дүжер кылывыт, дириг артканнарын Мен хылыш-биле шанчып өлүрүп каар мен: оларның аразындан дезер дээн кижи дезип шыдавас, амы-тынныг артарын күзээн кижи камгалал ап шыдавас.

² Олар Менден дезип, алдыы оранче-даа кире бээр болза, Мээң холум оларны ушта тыртып аар, дээрже-даа дезип үне бээр болза, оортан дүжүр октаптар мен.

³ Кармил дагның бажынга-даа чашты бээр болза, оларны аңаа тып алгаш, тудуп аар мен; далай дүвүнге-даа Мээң караамдан ажытталы бээр болза, оларны аңаа шагарын далай чыланынга дужаар мен.

⁴ Дайзыннар тудуп алгаш, сүрүп аппаар-даа болза, оларны аңаа өлүрүп каарын хылышка дужаар мен. Оларга ачы-буянны эвес, айыыл-халапты таварыштырар мен».

⁵ Аг-шериглиг Дээрги-Бурган-Чаяакчы чер кырынга дээптерге, ол эстип-хайлы бээр, ында чурттап турар бүгү улус кажыыдап ыглажыр, ол чер Египетте Нил хем ышкаш көдүрлүр база чавырлыр.

⁶ Дээрги-Чаяакчы Бодунуң үстүкү ордузун дээрлерге туткан, дээрниң таваан черге тургускан; Ол далайның сугларын кыйгыргаш, чер кырынга тарай аксып турар; Ооң ады – Дээрги-Чаяакчы!

Бурган Израильди узуткааш, оон катап тургузуп каар

⁷ «Израильчилер, силерге Мээң хамаарылгам эфиоптарга ышкаш эвес ийик бе? – деп, Дээрги-Чаяакчы медеглээн. – Силерни египет черден үндүре бергеним дег, филистим чонну – Кафтордан, арамей чонну – Кирден база Мен үндүре бербээн ийик мен бе?

⁸ Дээрги-Бурган-Чаяакчының карактары бачыттыг күрүнеже көрүп тур. Мен ону чырык чер кырынга турбас кылдыр узуткап каар мен. Ынчанмыже Иаковтуң ук-салгалын шуут-ла узуткавас мен – деп, Дээрги-Чаяакчы медеглээн. –

⁹ Дыңнаңар даан, Мен дужаал берип, израиль чоннуң бок хавыын, далган-тарааны шишкиишке челбиири дег, бүгү чоннар аразынче тарай шишкиир мен, чаңгыс-даа үрезин черже кээп дүшпес!

¹⁰ Мээң чонумда бүгү бачыттыг улус – „Бо айыыл-халап бисти таварбас, биске чедип келбес!“ дижир улус – хылыштан өлүп калыр.

¹¹ Шииткел хүнү кээрге, Мен Давидтиң буступ дүшкен чадырын катап тургузар мен, ооң тиглерин дуглап каар мен, бузундуларын эде тудуштурар мен, бурунгу үеде турганы дег кылдыр тудуп каар мен.

¹² Израильчилер ынчан Эдомнуң арткан чонун болгаш Меңээ хамааржыр бүгү өске чоннарны чагырып алыр». Ол бүгүнү кылыр Дээрги-Чаяакчының медеглээн чүвези ол-дур.

¹³ «Дүжүттүң хөйүнден ону чыып безин четтикпейн баар, элбек үнгенинден виноградты арага кылдыр хуулдуруп четтикпейн баар үе кээр – деп, Дээрги-Чаяакчы медеглээн, – ынчан виноград чулуу даглардан сыстып үнер, хамык тейлерден агып бадар.

¹⁴ Мээң израиль чонумга эки чолду эгидер мен, олар буурап дүшкен хоорайларны катап туткаш, аңаа чурттай бээр, шөлдерге виноград олурткаш, ооң арагазын ижер, садтар тарып алгаш, ында кат-чимисти чыып чиир.

¹⁵ Израильчилерни боттарының черинге чурттадып каар мен, оларны Мээң бергеним черден база катап үндүр сывырбас». Дээрги-Чаяакчы Бурганыңның чугаалаан чүвези ол-дур.