Амос 8 - Ыдыктыг Библия

Бышкан чимистиг көстүүшкүн

¹ Дээрги-Бурган-Чаяакчы меңээ мындыг көстүүшкүн чорудуп берген. Бышкан чимистиг аргымал хааржак турар болду.

² Ол: «Чүнү көрүп тур сен, Амос?» – деп айтырарга, мен: «Бышкан чимистерлиг аргымал хааржакты» – деп харыыладым. Дээрги-Чаяакчы ынчан меңээ: «Мээң израиль чонумнуң төнчүзү келген-дир: Мен аңаа катап база өршээл көргүспес мен.

³ Мээң шииткелим хүнү кээрге, ордуга ырлар өөлээн ыы-сыыже шилчий бээр» – деп медегледи. Дээрги-Бурган-Чаяакчы аңаа немей: «Кижи сеги дыка хөй болур, оларны улус чер бүрүзүнге ыыт чок октапкаш баар.

⁴ Силер – ядыыларны бастыксап, бо чурттуң түреңгилерин чок кылыксап турар улус – ону дыңнаңар.

⁵ Силер дээрге: „Кажан-на ай чаазының байырлалы эртип, далган-тараа садар аргалыг боор бис; кажан-на амыр-дыш хүнү төне берип, аңмаарларны ажыткаш, хемчээр саваны бичииледип, өртектерни улгаттыргаш, шын эвес деңзи шойлары-биле улус мегелээр аргалыг боор бис?

⁶ Ынчан баксырап калган далган-тарааны садыглаар аргалыг боор бис; чединмес улусту – акша-мөңгүнге, ядыы улусту – эжеш идик өртээнге-ле кул кылдыр садып алыр бис“ – деп турар улус-тур силер» – диди.

⁷ Израиль чоннуң чоргааралы Дээрги-Чаяакчы Бодунуң бажы-биле даңгыраглап: «Бо улустуң үүлгедиглериниң чаңгызын-даа кезээ мөңгеде утпас мен!

⁸ Ол үүлгедиглерден чер шимчей бербес бе, ында чурттап турар кижи бүрүзү ыглай бербес бе? Бүгү чер, Египетте Нил хем ышкаш, хөлзей бербес бе, көдүрлүп-даа, чавырлып-даа турбас бе?» – деп чугаалаан.

⁹ «Мээң шииткелим хүнү кээр – деп, Дээрги-Бурган-Чаяакчы медеглээн. – Ынчан хүннү дал дүъште ажар кылып каар мен, чырык хүндүс-ле чер кыры караңгылай бээр;

¹⁰ байырлалдарыңарны – ажыг-шүжүг кылдыр, хамык ырларыңарны – ыы-сыы кылдыр хуулдурар мен, шуптуңарга качыгдалдың самдар хевин кедирип, шуптуңарның баштарын тазартыр таарып каар мен; чуртка ол хүннү кижиниң эр чаңгыс оглунуң өлүмү дээш кажыыдалы дег кылып каар мен, ол хүн төнчүзүнге чедир кажыыдал хүнү дег болур».

¹¹ Дээрги-Бурган-Чаяакчы оон ыңай медеглээн: «Кажан Мээң черже ашты чорударым – улустуң аъш-чем биле суг чедишпезинден эвес, а Дээрги-Чаяакчының сөстерин дыңнаар дээш аштап-суксаары хүннер чоокшулап келген-дир.

¹² Кижилер бир далайдан өске далайга чедир Дээрги-Чаяакчының сөзүн дыңнаары-биле чер кезип элеңнедир кылаштап, соңгу чүктен чөөн чүкче улчуур, ынчалза-даа дыңнавас.

¹³ Ол шииткел хүнүнде аянныг чараш аныяк оолдар, кыстар суксаанындан медерелин оскунуптар.

¹⁴ Самарияны кем-бурууже киирип турар бурганнар-биле даңгыраглаар, „Дан хоорайның дириг бурганнары-биле база Беэр-Шева-биле даңгыраглап тур бис!“ дээр улус кээп дүшкеш, катап көдүрлүп шыдавас».