2 Коринфичилерге 9 - Ыдыктыг Библия

Өске улуска экииргек кижиге Бурган ынак

¹ Бурганның улузунга ачы-дуза дугайында силерге бижиири эргежок чугула эвес боор.

² Силерниң ол ажыл-херекке чүткүлдүүңерни билир мен, македончулар мурнунга силерни мактап шаг болдум: Ахаияда христианнар эрткен чылда-ла ону кылырынга белен турган деп турдум. Силерниң чүткүлүңер хөй улусту ажыл-херекче сорук киирипкен.

³ Ол дугайты силерни хей черге мактаан диртпес дээш, бүзүрээн ха-дуңмавысты дөмей-ле силерже чорудуп тур мен. Ачы-дуза хайырлаарынга белен бооруңарны чугаалап турдум чоп.

⁴ А оон башка мээң-биле кады македончулар чедип кээрге, белен эвес болзуңарза, канчаарыл? Ындыг бүзүрелдиг мактанып тургаш, ыянчыг байдалга киргей-ле бис, а силерге кайы хире ыянчыын чугаалааш-даа канчаар!

⁵ Ооң мурнунда-ла аазааныңар ачы-дузаны баш бурунгаар белеткеп кагзыннар дээш, бүзүрээн ха-дуңмавыстың силерге бисти мурнай чеде бээрин дилээри эргежок чугула-дыр деп шиитпирледим. Ол хайырлал ынчан ылап-ла эки тура-биле чыгдынган хайырлал боор база албадал-биле чыгган үндүрүг дег эвес боор.

⁶ Сактып алыңар: үрезин харамнанган кижиниң дүжүдү база чегей боор, а элбээ-биле тараан кижиниң дүжүдү база элбек боор.

⁷ Кижи бүрүзү, муңгаравайн база «Албадалга кирдим» деп бодавайн, чүрээ чежени бээр дээр болдур, ынчаны берзин. Чүге дээрге Бурган өөрүшкүлүг берип турар кижиге ынак.

⁸ Ол силерни кандыг-даа ачы-буяны-биле байыдып шыдаар. Ынчан херектиг хамык чүве силерге кезээде бар бооп, кандыг-даа буянныг ажыл-херек кылырынга чедер болгаш артар.

⁹ Бижилгеде бижээн-не болгай: «Ол кижи ядыы улуска ачы-дузаны элбээ-биле берген, ооң чөптүг-шынныг чоруу кезээ мөңгеде артып каар» .

¹⁰ Чажыкчыга үрезинни база улуска чем кылдыр хлеб-тарааны берип турар Бурган силерни база үрезин-биле хандырар. Ол үрезиниңерни көвүдеткеш, буянныг ажыл-херээңерниң дүжүдүн элбекшидип бээр.

¹¹ Кандыг-даа байдалдарда үргүлчү экииргек бооп шыдаар дээш, бүгү талазы-биле байый бээр силер, а силерниң экииргээңер бисти дамчыштыр улустуң Бурганга өөрүп четтирериниң чылдагааны апаар.

¹² Чүге дээрге силерниң ол бараан болуушкунуңар чүгле Бурганның улузунуң чединмезин хандырып турар эвес, а хөй улустуң Бурганга өй-хемчээл чок өөрүп четтиргени апаар.

¹³ Бо бараан болуушкунуңар силерге шылгалда дег боор, ону дамчыштыр Бурганның улузу дыңнангыр чорууңарны база Христос дугайында Буянныг Медээни ылап-ла хүлээп көргениңерни көрүп каар. А ол ышкаш силерниң олар-биле база бүгү улус-биле акша-хөреңгиңерни харам чок үлежип турарыңарны көрүп кааш, олар ооң түңнелинде Бурганны алдаржыда бээрлер.

¹⁴ Олар боттарының мөргүлдеринге сеткилиниң ханызындан силерже чүткүүрлер, чүге дээрге Бурган силерге Бодунуң эгээртинмес авыралын хайырлаан-дыр.

¹⁵ Сөс-биле чугаалап четпес белээ дээш, Бурганга өөрүп четтирээлиңер!