1 Тимофейге 2 - Ыдыктыг Библия

Мөргүл дугайында

¹ Сенден чүден артык дилээм бо-дур: Бурганга дилеглерлиг, чалбарыглыг, өөрүп четтириишкинниг, өскелерге болушкан мөргүлдер – бүгү улус дээш мөргүлдер болзун.

² Хааннар биле эрге-чагырга ээлээннер база ол санче кирзин. Бистиң оожум база амыр-шөлээн, Бурганны хүндүлеп, Аңаа төлептиг амыдырап шыдаарывыс дээш, ол ындыг болзун.

³ Ындыг боорга, эки-даа, Камгалакчывыс боор Бурганга таарымчалыг-даа.

⁴ Бурган бүгү улустуң камгалалды алырын база алыс шынны билип аарын күзеп турар.

⁵ Чүге дээрге Бурган-даа чаңгыс, Бурган биле кижи төрелгетенниң эптештирикчизи – Боду база кижи – Христос Иисус-даа чаңгыс!

⁶ Ол Бодун шупту улусту хостаар дээш өргээн. Бурганның бодалын Ол чогуур үеде ынчалдыр херечилээн.

⁷ Ооң ужурунда Бурган мени бүзүрел биле алыс шынны өске чоннар улузунга медеглезин дээш, элчин база башкы кылдыр шилип томуйлап каан. Силерге чугаалаан чүвем шынныг, мен мегелевейн тур мен!

⁸ Ынчангаш эр улус каяа-даа болза мөргүп чоруурун күзеп тур мен. Олар килеңневейн, алгыжып-кырышпайн, актыг холдарын өрү сунуп, мөргүзүннер.

⁹ Шак ынчаар херээженнер база ужур-чурумга таарыштыр кеттинип, эгениичел база бодамчалыг чоруу-биле боттарын каастаар ужурлуг. Бажын аянныг таартканы, алдыны, ак шуру эртинези база үнелиг хеви-биле каастанмазыннар.

¹⁰ А ооң орнунга Бурганны хүндүлээр дээн херээженнер буянныг херектери-биле боттарын каастаар ужурлуг.

¹¹ Өөредиг ап турар херээженнер оожум, бүрүнү-биле дыңнангыр болзуннар.

¹² Херээжен кижиниң өөредирин азы эр кижини чагырарын чөпшээревейн тур мен. Ол бодун оожум ап чорзун.

¹³ Бурган баштай Адамны, а ооң соонда Еваны чаяаган-на болгай.

¹⁴ Адам-даа эвес, а Ева дуурайлаткаш, Бурганның хоойлузун үреди чоп!

¹⁵ Ындыг-даа болза, херээжен кижи бүзүрелдиг, ынакшылдыг, ыдыктыг база эки мөзүлүг амыдырап чоруур болза, ол ажы-төл божуп, камгалалды алыр.