1 Чылдар 9 - Ыдыктыг Библия

Туттуруушкундан Иерусалимче ээп келгеннер

¹ Ынчалдыр бүгү израильчилерниң төрел бөлүктер аайы-биле чизе-даңзызын тургускан, Израильдиң хааннарының төөгү бижилгезинче киирген. Иудейлер ужур-дүрүм чок чоруктары дээш Вавилонче көжүртүпкен соонда,

² Израильдиң хоорай, суурларынга катап база чурттап эгелээн баштайгы улус израильчилер, Бурганның бараалгакчылары, левиттер болгаш Бурганның өргээзинде ажылчыннар болган.

³ Иуданың, Вениаминниң, Эфремниң база Манассияның аймактарындан дараазында улус Иерусалимге турумчуп алган.

^4-6 Иуданың аймаандан: Фарестиң үре-салгалындан – Утай (ол дээрге Аммиудтуң оглу, Аммиуд Омриниң оглу, Омри Имрийниң оглу, Имрий Баниниң оглу); Шеланың үре-салгалындан – төрел бөлүүнүң баштыңы Асайя болгаш ооң оолдары; Зерахтың үре-салгалындан – Иеуил болгаш ооң акы-дуңмалары. Шуптузу 690 кижи.

⁷ Вениаминниң аймаандан: Саллу (ол дээрге Мешулламның оглу, Мешуллам Годавияның оглу, Годавия Гассенуаның оглу);

⁸ Иерохамның оглу Ивний; Эла (ол Узийниң оглу, а Узий Михрийниң оглу); Мешуллам (ол Шефатияның оглу, Шефатия Регуилдиң оглу, Регуил Ивнийниң оглу);

⁹ база салгалдар аайы-биле оларның акы-дуңмалары, шупту боттарының төрел бөлүктериниң баштыңнары чүве-дир. Шуптузу 956 кижи.

Бараалгакчылар болгаш левиттер

¹⁰ А Бурганның бараалгакчыларындан: Иедайя, Иегоиарив, Яхин,

¹¹ Бурганның өргээзинде эргелекчи Азария (ооң ада-өгбелери – Хелкия, Мешуллам, Садок, Мерайот болгаш Ахитув),

¹² Адайя (ооң ада-өгбелери – Иерохам, Пашхур, Малхия, Маасай, Адиил, Яхзера, Мешуллам, Мешуллемит болгаш Иммер)

¹³ болгаш оларның акы-дуңмалары – төрел бөлүктериниң баштыңнары, Бурганның өргээзинге бараан болурунга шылгараан улус. Шуптузу 1760 кижи.

¹⁴ Левиттерден: Мерариниң үре-салгалындан – Шемайя (ол дээрге Хашувтуң оглу, Хашув Азрикамның оглу, Азрикам Хашавияның оглу);

¹⁵ оон ыңай Вакбакар, Хереш, Галал база Маттания (ол Миханың оглу, Миха Зихрийниң оглу, а Зихрий Асафтың оглу);

¹⁶ оон ыңай Авдий (ол Шемайяның оглу, Шемайя Галалдың оглу, а Галал Идифуннуң оглу) база Нетофаның чоок-кавызы чурттуг Берехия (ол Асаның оглу, Аса Элкананың оглу).

¹⁷ А хаалгачылардан: Шаллум, Аккув, Талмон, Ахиман база оларның акы-дуңмалары. Оларның кол кижизи Шаллум турган.

¹⁸ Ол хаалгачылар бо үеге чедир чөөн талакы Хаан Хаалгазын кадарбышаан хевээр. Оларның төрел бөлүү левиттерниң турлааның хаалгачылары турган.

¹⁹ Шаллум (ол Корениң оглу, Коре Эвиасафтың оглу, Эвиасаф Корахтың оглу) база ооң төрел ха-дуңмалары – корах төрел бөлүк албан-хүлээлгезин ёзугаар ыдыктыг майгынның хаалгазын кадарар, оларның өгбелери база Дээрги-Чаяакчының турлаанга кирер черни кадарып чорааннар болгай.

²⁰ Шаг шаанда Элеазарның оглу Финеес оларның даргазы турган, Дээрги-Чаяакчы ооң-биле кады турган.

²¹ Мешелемияның оглу Захария Ужуражылга майгынының хаалгачызы турган.

²² Хаалгачылар кылдыр шилиттингеннерниң ниити саны 212 кижи. Оларны чурттап турар черлериниң аайы-биле даңзыже киирген. Давид биле өттүр көөр Самуил хаалгачыларны оларның шынчы бердингени дээш томуйлап дагзып каан.

²³ Олар болгаш оларның үре-салгалы Дээрги-Чаяакчының өргээ-майгынының хаалгазын кадарар ужурлуг.

²⁴ Хаалгачылар дөрт талада: чөөн, барыын, соңгу болгаш мурнуу талада турганнар.

²⁵ А хаалгачыларның суурларга чурттаан төрелдери оларга доктааткан үеде келгеш, чеди хонар турганнар.

²⁶ Левит хаалгачыларның дөрт даргазынга Бурганның өргээзинде өрээлдерни база ында бар эртине-байлакты кадарарын бүзүреп дааскан.

²⁷ Бурганның өргээзин кадарар база эртенниң-не эжик ажыдар хүлээлгелиг болгаш, ол хаалгачылар ооң даштынга долгандыр хонуп турганнар.

²⁸ Левиттерниң чамдыызынга Бурганга бараан болурда ажыглаар эт-херекселди хүлээдип каар турган. Ол левиттер бо эт-херекселди улус ажыглаар дээш алырга база дедир эгидерге, санап аар турган.

²⁹ А чамдыктары өске херекселдерни, ооң иштинде ыдыктыг эт-херекселди, кадагалаар хүлээлгелиг. Ол ышкаш далганны, араганы, олива үзүн, айдызаар чүүлдерни база чаагай чыттыг бүдүмелдерни.

³⁰ А чаагай чыттыг бүдүмелдерни холуур харыысалга Бурганның бараалгакчыларының чамдыызынга онаашкан.

³¹ Левит Маттифияга (корах уктуг Шаллумнуң дун оглунга) далганнар хаарарын бүзүреп дагзып каан.

³² А амыр-дыш хүн санында хереглээр ыдыктыг хлеб быжырар, одуруглай салыр хүлээлге кохат уктуг чамдык левиттерге онаашкан.

³³ Төрел бөлүктериниң баштыңнары болур ыраажы левиттер өргээниң өрээлдеринде чурттап, өске ажылдардан хостуг турганнар, чүге дээрге олар херек апарганда, дүн-хүн дивейн, ырлаар хүлээлгезин күүседир ужурлуг.

³⁴ Олар дээрге левиттерниң төрел бөлүктериниң баштыңнары-дыр. Олар Иерусалимге чурттап турганнар.

Саул хаанның өгбелери, үре-салгалы

³⁵ Гаваончуларның өгбези Иеиел Гаваонга чурттап турган. Ооң кадайының ады Мааха.

³⁶ Ооң дун оглу Авдон, оон аңгы оолдары Цур, Кис, Ваал, Нир, Надав,

³⁷ Гедор, Ахио, Захария болгаш Миклот.

³⁸ Миклот Шимамны төрээн. Олар Иерусалимге дөргүл-төрелиниң аразынга ха-дуңмалары-биле кады чурттап чорааннар.

³⁹ Нир Кисти төрээн. Кис Саулду төрээн. Саул Ионафан, Малхисуа, Авинадав болгаш Эшбаалды төрээн.

⁴⁰ Ионафанның оглу – Мериббаал. А Мериббаалдың оглу Миха.

⁴¹ Миханың оолдары: Пион, Мелех, Тахрея болгаш Ахаз.

⁴² Ахаз Иараны төрээн. Иара Алемет, Азмавет болгаш Зимрини төрээн. Зимри Моцаны төрээн.

⁴³ Моца Бинеяны төрээн. Бинеяның оглу Рефайя, Рефайяның оглу Элеаса, Элеасаның оглу Ацел.

⁴⁴ Ацел алды оолдуг турган, оларның аттары бо: Азрикам, Бохру, Измаил, Шеария, Авдий болгаш Ханан. Олар дээрге Ацелдиң оолдары-дыр.