1 Чылдар 27 - Ыдыктыг Библия

Израиль шеригниң салбырлары

¹ Шериглерниң салбырлар аайы-биле удуртукчуларының даңзызы – израиль төрел бөлүктерниң даргаларының, муң болгаш чүс шериг баштыңчыларының даңзызы бо-дур. Чылды өттүр ай санында-ла бир салбыр хаанга бараан болур ужурлуг турган. Салбыр бүрүзүнге 24 000 кижи турган.

² Баштайгы айда бирги салбырны Завдиилдиң оглу Яшавам удуртуп турган. Ооң салбырынга 24 000 кижи турган.

³ Ол Фарестиң үре-салгалы, бир дугаар айда шериг баштыңнарының даргазы турган.

⁴ Ийиги айда шериг салбырының даргазы – ахохи уктуг Додай. Ооң кол дузалакчызын Миклот дээр. Ол салбырга база 24 000 кижи турган.

⁵ Үшкү айда кол шериг даргазы – Бурганның бараалгакчызы Иодайның оглу Ванея. Ооң салбырынга база 24 000 кижи турган.

⁶ Ванея дээрге алдаржаан үжен шериг баштыңчызының бирээзи, оларны баштаан кижи турган. Ол салбырга ооң бодунуң оглу Аммизавад база турган.

⁷ Дөрткү айда шериг даргазы – Иоавтың дуңмазы Асаил. Оглу Зевадия ооң салгакчызы болган. Ол салбырга 24 000 кижи турган.

⁸ Бешки айда шериг даргазы – израх уктуг Шамхут. Ооң салбырынга 24 000 кижи турган.

⁹ Алдыгы айда шериг даргазы – Текоя чурттуг Иккештиң оглу Гира. Ооң салбырынга база 24 000 кижи турган.

¹⁰ Чедиги айда шериг даргазы – Эфремниң үре-салгалы, Пелон чурттуг Хелец. Ооң салбырынга база 24 000 кижи турган.

¹¹ Сески айда шериг даргазы – Зерахтың үре-салгалы, Хуша чурттуг Сивхай. Ооң салбырынга база 24 000 кижи турган.

¹² Тоску айда шериг даргазы – Вениаминниң үре-салгалы, Анатот чурттуг Авиезер. Ооң салбырынга база 24 000 кижи турган.

¹³ Онгу айда шериг даргазы – Зерахтың үре-салгалы, Нетофа чурттуг Магарай. Ооң салбырынга база 24 000 кижи турган.

¹⁴ Он бирги айда шериг даргазы – Эфремниң үре-салгалы, Пирафон чурттуг Ванея. Ооң салбырынга база 24 000 кижи турган.

¹⁵ Он ийиги айда шериг даргазы – Гофониилдиң үре-салгалы, Нетофа чурттуг Хелдай. Ооң салбырынга база 24 000 кижи турган.

Аймактарның баштыңчылары

¹⁶ Израиль аймактарның баштыңчылары бо-дур: Рувимниң аймааның даргазы – Зихрийниң оглу Элиезер; Симеоннуң – Мааханың оглу Шефатия;

¹⁷ Левийниң – Кемуилдиң оглу Хашавия (а Аароннуң төрел бөлүүнүң – Садок);

¹⁸ Иуданың – Давидтиң төрели Элиуй; Иссахарның – Михаилдиң оглу Омри;

¹⁹ Завулоннуң – Авдийниң оглу Ишмайя; Неффалимниң – Азриилдиң оглу Иеримот;

²⁰ Эфремниң аймааның – Азазияның оглу Осия; Манассияның аймааның чартыының – Федайяның оглу Иоил;

²¹ Галаадта Манассияның аймааның өске чартыының – Захарияның оглу Иддо; Вениаминниң – Авенирниң оглу Иаасиил;

²² Данның – Иерохамның оглу Азариил. Израильчилерниң аймактарын баштаан улус ол-дур.

²³ Давид хаан чизезин кылып тургаш, чээрби хардан куду назылыг улусту санаваан. Чүге дээрге Дээрги-Чаяакчы израильчилерни дээрниң сылдызы дег хөй кылып каарын аазаан болгай.

²⁴ Саруйяның оглу Иоав санаашкынны кылып эгелээш, төндүрбээн. Ол чизе дээш Бурганның килеңи Израильге дүшкен чүве-дир. Ынчангаш оларның санын Давид хаанның чылдар демдеглелиниң номунче кирбээн.

Хаанның өске дүжүметтери

²⁵ Хаанның эртине шыгжамырларын Адиилдиң оглу Азмавет таңныылдап турган. Шөлде, хоорай-суурда болгаш суургада курлавырларны Озияниң оглу Ионафан хайгаарап турган.

²⁶ Шөлде чер болбаазырадып ажылдап турар улус – Хелувтуң оглу Эзрийниң хайгааралының адаанда.

²⁷ Рама чурттуг Шимей виноград шөлдерин, а виноградтан кылган арага шыгжамырларын Шефам чурттуг Завдий хайгаарап турган.

²⁸ Шефела девискээринде олива болгаш фига ыяштарлыг черни – Гедер чурттуг Баал-Ханан; олива үзүнүң курлавырын – Иоас;

²⁹ Шарон девискээринде турар бода малды – Шарон чурттуг Шитрай; шынааларда малды – Адлайның оглу Шафат;

³⁰ тевелерни – измаил уктуг Овил; элчигеннерни – Меронот чурттуг Иехдия;

³¹ шээр малды – агар уктуг Иазиз кадарып турган. Олар шупту Давид хаанның кошкул-хөреңгизиниң удуртукчулары турган.

³² Давидтиң төрел акызы, угаанныг Ионафан бижээчи эки сүмелекчи турган. Хакмон уктуг Иехиил хаанның оолдарын кижизидип турган.

³³ Ахитофел – хаанның сүмелекчизи турган. Архи уктуг Хусий – хаанның өңнүү турган.

³⁴ Ахитофелдиң салгакчылары Ванеяның оглу Иодай биле Авиафар турган. Иоав – хаанның шериг даргазы турган.