1 Чылдар 26 - Ыдыктыг Библия

Бурганның өргээзиниң хаалгачылары

¹ Хаалгачыларның үлелгези бо-дур. Корахтың төрел бөлүүнден: Асафтың үре-салгалы, Корениң оглу Мешелемия.

² Мешелемияның оолдары: дун оглу Захария, ийигизи Иедиаил, үшкүзү Зевадия, дөрткүзү Иатниил,

³ бешкизи Элам, алдыгызы Иегоханан, чедигизи Элиоенай.

⁴ Овед-Эдомнуң оолдары: дун оглу Шемайя, ийигизи Иегозавад, үшкүзү Иоах, дөрткүзү Сахар, бешкизи Нафанаил,

⁵ алдыгызы Аммиил, чедигизи Иссахар, сескизи Пеултай. (Дээрги-Чаяакчы Овед-Эдомга ачы-буянын хайырлап каан болгай.)

⁶ Шемайя деп оглунуң оолдары шупту күштүг-шыырак улус болгаш, төрел бөлүүнде удуртукчулар турган.

⁷ Шемайяның оолдары: Офни, Рефаил, Овид, Элзавад. Оларның төрелдери Элиуй биле Семахия база шыырак улус чораан.

⁸ Олар шупту Овед-Эдомнуң үре-салгалы болган. Оларның боттары-даа, оолдары болгаш ха-дуңмазы-даа шупту ажылга кызымак, шыырак улус болган чүве-дир. Шупту алдан ийи кижи.

⁹ Мешелемияның оолдары болгаш ха-дуңмазы – он сес шыырак кижи болган.

¹⁰ Мерариниң төрел бөлүүнден Хосаның оолдары: Шимри – кол кижи. (Шимри дун оглу эвес-даа болза, ачазы ону кол кижи кылып каан.)

¹¹ Ийигизи Хелкия, үшкүзү Тевалия, дөрткүзү Захария. Хосаның оолдары болгаш ха-дуңмазы шупту он үш кижи турган.

¹² Бо хаалгачылар, боттарының ха-дуңмазы ышкаш, Дээрги-Чаяакчының өргээзинге бараан болур албан-хүлээлгелерин боттарының баштыңнарының аайы-биле алганнар.

¹³ Кайы хаалгаларны кадарарын тодарадыр дээш, олар төрел аймак аайы-биле улуг-бичези деңге төлге даштары октааннар.

¹⁴ Чөөн талакы хаалганың төлгези Шелемияга дүшкен. Ооң оглу – угаанныг сүмелекчи Захария дээш төлге октаарга, аңаа Соңгу хаалга онаашкан.

¹⁵ Мурнуу чүкте хаалганың төлгези Овед-Эдомга дүшкен, а курлавыр бажыңнарының төлгези ооң оолдарынга таварышкан.

¹⁶ Барыын талакы хаалганың база үстүү орукта Шаллехет хаалганың төлгелери Шуппим биле Хосага дүшкен. Таңныылдар душ-дужунда тургулап алган турар чүве-дир.

¹⁷ Чөөн талада алды, соңгу болгаш мурнуу чүктеринде дөрт-дөрт, а курлавыр бажыңнарында ийи-ийи таңныыл левит турган.

¹⁸ Барыын талада Парбар деп черге ийи, а оон үнген орукка дөрт кижи турган.

¹⁹ Корах болгаш Мерариниң үре-салгалдары боор хаалгачыларның үлелгези бо-дур.

Левиттерниң өске албан-хүлээлгелери

²⁰ Оларның ха-дуңмазы левиттер Бурганның өргээзиниң үнелиг эртинелерин база ыдыктыг өргүл-белектерни кадарып турган.

^21-22 Гирсондан укталган Лаеданның оолдары – төрел бөлүүнүң баштыңнары гирсончулар: Иехиил болгаш ооң оолдары Зетам биле Иоил Дээрги-Чаяакчының өргээзинде эртинелерни кадарып турган.

²³ Амрам, Ицгар, Хеврон болгаш Узиилден укталган левиттерге хамаарыштыр:

²⁴ Моисейниң оглу Гирсамдан укталган Шевуил эртинелер шыгжамырларының кол таңныылы турган.

²⁵ Гирсамның дуңмазы Элиезерниң оглу Рехавия, ооң оглу Исайя. Исайяның оглу Иорам, ооң оглу Зихрий. Зихрийниң оглу Шеломит.

²⁶ Шеломит бодунуң ха-дуңмазы-биле кады Давид хаанның, төрел бөлүктер баштыңнарының, муң, чүс шериг даргаларының Дээрги-Чаяакчыга тураскааткан өргүл-белектериниң шыгжамырларын кадарып турган.

²⁷ Чаалап тыпкан олчаларының чамдыызы-биле ол дайынчылар Дээрги-Чаяакчының өргээзин хандырып турган.

²⁸ Өттүр көөр Самуилдиң-даа, Кистиң оглу Саулдуң-даа, Нирниң оглу Авенирниң-даа, Саруйяның оглу Иоавтың-даа – оларның тыпкан бүгү олча-кежии Шеломиттиң болгаш ооң ха-дуңмазының холунга баар турган.

²⁹ Ицгарның төрел бөлүүнден: Хенания болгаш ооң оолдары Бурганның өргээзинден дашкаар ажылдар кылып турган, олар бижээчилер болгаш шииткекчилер турган.

³⁰ Хевроннуң төрел бөлүүнден: Хашавия болгаш ооң ха-дуңмазы – 1700 шыырак улус – Иордан хемниң барыын талазында израиль черни хайгаарап, Дээрги-Чаяакчыга болгаш хаанга бараан болуп турган.

³¹ Хеврончуларның кол кижизи Иерия турган. Давидтиң хааннаашкынының дөртен дугаар чылында хеврончуларның төрел бөлүүн шинчилеп көөрге, Галаадтың Иазер хоорайда кончуг күштүг-шыырак улус бар болган.

³² Давид ынчангаш Иерияны болгаш ооң 2700 шыырак ха-дуңмазын (шуптузу төрел бөлүктер баштыңнары) Бурганның болгаш хаанның бүгү ажыл-херектерин күүседир кылдыр томуйлап, Рувимниң, Гадтың аймактарының база Манассияның аймааның чартыының даргалары кылып каан чүве-дир.