1 Чылдар 23 - Ыдыктыг Библия

Левиттерниң төрел бөлүктери

¹ Давид мага хандыр чурттап, назылап кырааш, оглу Соломонну Израильдиң хааны кылып кааш,

² Израильдиң бүгү баштыңчыларын, Бурганның бараалгакчыларын болгаш левиттерни чыып алган.

³ Үжен хардан өрү назылыг левиттерни санап көөрге, оларның ниити саны 38 000 эр кижи болган.

⁴ Олардан Дээрги-Чаяакчының өргээзинге янзы-бүрү ажылдар чорудары-биле 24 000 кижи томуйлап каан. Удуртукчу болгаш шииткекчилер – 6000 кижи,

⁵ хаалга кадарар 4000 кижи база Дээрги-Чаяакчыга алдар-мактал тудуп, Давидтиң кылганы хөгжүм херекселдеринге ойнаар – 4000 кижи болган.

⁶ Давид оларны Левийниң оолдары – Гирсон, Кохат база Мерариниң аайы-биле үш кол бөлүкке чарып каан чүве-дир.

⁷ Гирсончулар – Лаедан биле Шимей.

⁸ Лаеданның оолдары: кол кижи Иехиил, Зетам база Иоил – үш кижи.

⁹ Шимейниң оолдары: Шеломит, Хазиил база Аран – үш кижи. Олар Лаеданның салгалдарының баштыңнары чүве-дир.

¹⁰ Шимейниң оолдары: Яхат, Зиза, Иеуш болгаш Брия. Олар дөртелээ Шимейниң оолдары-дыр.

¹¹ Яхат кол кижи турган. Зиза – ийи дугаары. А Иеуш биле Брия хөй эвес ажы-төлдүг болгаш, чаңгыс төрел бөлүк кылдыр санаттырар апарган.

¹² Кохаттың оолдары: Амрам, Ицгар, Хеврон база Узиил – дөрт кижи.

¹³ Амрамның оолдары: Аарон биле Моисей. Ааронну (бодун болгаш ооң оолдарын) Дээрги-Чаяакчыга бараан болзун дээш мөңгеде аңгылап каан турган. Олар аажок ыдыктыг херекселдерни кадарар, Дээрги-Чаяакчының мурнунга чаагай чыттыг чүүлдер кыпсыр, Ооң ады-биле чонну алгап-йөрээр ужурлуг турган.

¹⁴ Моисей – Бурганның кижизи турган. Ооң үре-салгалы анаа левиттер деп санаттырар.

¹⁵ Моисейниң оолдары: Гирсам биле Элиезер.

¹⁶ Гирсамның оолдарындан: кол кижи Шевуил.

¹⁷ Элиезерниң оолдарындан: кол кижи Рехавия. Элиезерниң оон өске оолдары турбаан-даа болза, Рехавияның оолдары дыка хөй болган чүве-дир.

¹⁸ Ицгарның оолдарындан: кол кижи Шеломит.

¹⁹ Хевроннуң оолдарындан: кол кижи Иерия, ийи дугаары Амария, үшкүзү Яхазиил, дөрткүзү Иекамам.

²⁰ Узиилдиң оолдары: кол кижи Миха, ийи дугаары Ишшия.

²¹ Мерариниң оолдарындан: Махли биле Муши. Махлиниң оолдарындан: Элеазар биле Кис.

²² Элеазар оолдар чок тургаш, өлүп калган. Ол чүгле кыстарлыг турган. Кыстарын оларның төрелдери – Кистиң оолдары кадай кылдыр ап алган.

²³ Мушиниң оолдарындан: Махли, Эдер база Иремот – үш кижи.

²⁴ Левийниң төрел бөлүк аайы-биле салгалдары ол-дур. Левиттер деп санадып, баштыңнарының аайы-биле аттарын ададып, даңзыже киир бижиткен – чээрби хардан өрү назылыг, Дээрги-Чаяакчының өргээзинде ажыл-албан чорудуп турар улус ол чүве-дир.

²⁵ Давид мынча дээн болгай: «Израильдиң Бурганы, Дээрги-Чаяакчы Бодунуң чонунга амыр-тайбың хайырлап, Иерусалимде мөңгези-биле чурттай берген.

²⁶ Левиттер моон соңгаар Бурганга бараан болуру-биле ыдыктыг майгынны, аңаа хамааржыр эт-херекселди сөөртүп чорбас».

²⁷ Давидтиң сөөлгү чагыы-биле чээрби хардан өрү назылыг левиттерни ынчалдыр санаан чүве-дир.

²⁸ Левиттер Дээрги-Чаяакчының өргээзинде Аароннуң үре-салгалының чорудуп турар албан-ажылынга дузалажыр: өргээниң шөлдерин, шыгжаар өрээлдерин хайгаараар, бүгү ыдыктыг чүүлдерни арыг хевээр кылдыр кадагалаар база өске-даа ажылдарны кылчыр.

²⁹ Олар Дээрги-Чаяакчыга салыр ыдыктыг хлеб дээш, далган-тараа өргүлү кылырда ажыглаар далган дээш, ажыткы чок боовалар дээш, быжырган, үс-биле холбашкан өргүлдер дээш база ол бүгүнүң хемчээли болгаш деңзизи дээш сагыш човаар.

³⁰ Олар эртенниң-не Дээрги-Чаяакчыга четтиргенин илередип, Ону алгап-мактаар ужурлуг. Ол ёзулалды кежээ база катаптаар.

³¹ Амыр-дыш хүнүнде, ай чаазында база байырлалдарда Дээрги-Чаяакчыга бүрүн өрттедир өргүл кылып турар. Олар чурум ёзугаар доктаадып каан саны-биле Дээрги-Чаяакчыга доктаамал бараан болур ужурлуг.

³² Олар Ужуражылга майгынын болгаш ыдыктыг чүүлдерни кадагалап, ха-дуңмазы болур Аароннуң үре-салгалынга дузалажып, Дээрги-Чаяакчының өргээзинге боттарының хүлээлгелерин күүседип турар чүве-дир.