1 Чылдар 16 - Ыдыктыг Библия

¹ Бурганның аптаразын эккелгеш, Давидтиң аңаа белеткеп кааны майгынының ортузунга салып кааш, Бурганга бүрүн өрттедир болгаш эп-найырал өргүлдерин кылганнар.

² Бүрүн өрттедир болгаш эп-найырал өргүлдерин кылып дооскаш, Давид чонну Дээрги-Чаяакчының ады-биле алгап-йөрээп каан.

³ Ооң соонда ол бүгү израильчилерге – эр-даа, херээжен-даа кижи бүрүзүнге бир хлеб, бир борбак эът база бир үзүмнүг боова үлеп берген.

⁴ Ыдыктыг аптараның мурнунга Израильдиң Бурганы Дээрги-Чаяакчыга алдаржыдып, четтиргенин илередип база Ону мактап бараан болур кылдыр Давид дараазында левиттер томуйлап каан:

⁵ Асафты удуртукчузу кылгаш, ооң соонда Захарияны, Иеиелди, Шемирамотту, Иехиилди, Маттафияны, Элиавты, Ванеяны, Овед-Эдомну база Иеиелди. Олар чанзыга болгаш чадаганга ойнаар ужурлуг. А Асаф кимвалдарга ойнаар.

⁶ Ванея биле Яхазиил бараалгакчылар Бурганның чагыг-керээзиниң аптаразының мурнунга доктаамал труба этсир.

Бурганны мактаан ыры

⁷ Ол хүн Давид Асафка болгаш ооң ха-дуңмазынга Дээрги-Чаяакчыны алдаржыдып ырлажыр даалга бир дугаар берип каан турган:

⁸ Дээрги-Чаяакчыга өөрүп четтириңер, Ооң адын адап, мактаңар, өске чоннарга Ооң ажыл-херектерин медээлеңер;

⁹ Ону алгап ырлаңар, Аңаа ырлап бериңер; Ооң кылган бүгү кайгамчык чүүлдерин чугаалап бериңер.

¹⁰ Ооң ыдыктыг ады дээш чоргаараңар; Дээрги-Чаяакчыже чүткүп чоруур улустуң сеткил-сагыжы өөрүп-хөглезин.

¹¹ Күчүлүг Дээрги-Чаяакчыны эдериңер, Ооң-биле үргүлчү кады турар дээш чүткүңер.

^12-13 Дээрги-Чаяакчының чалчазы Израильдиң үре-салгалы, Иаковтуң салгалы, Бурганның шилип алган улузу! Ооң кылган кайгамчык чүүлдерин, Ооң көскү демдектерин, Ооң аксындан үнген шын шииткелдерин сактып чоруңар.

¹⁴ Ол дээрге бистиң Бурганывыс, Дээрги-Чаяакчы-дыр: бүгү чер-делегейде Ооң шын шииткелдери бар.

¹⁵ Ооң берген чагыг-керээзин – чоннуң муңгу салгалынга чедир чагаан сөзүн кезээ мөңгеде сактып чоруңар.

¹⁶ Ол ону Авраам-биле чаргаш, Исаакка Бодунуң даңгыраан берген.

¹⁷ Ол ону Иаковка дүрүм-хоойлу кылдыр доктааткаш, Израильге мөңге чагыг-керээ кылдыр быжыглаан:

¹⁸ «Сеңээ өнчү кылдыр ханаан черни бээр мен».

¹⁹ Өгбелериңер аажок эвээш санныг, көңгүс хөй эвес турда, олар Ханаанга өскээртен келген улус турда,

²⁰ олар бир чондан өске чонче, бир күрүнеден өске аймактың күрүнезинче көжүп чоруп турда,

²¹ Бурган оларны дарлаар арганы кандыг-даа кижиге бербейн, хааннарны олар дээш чемелеп:

²² «Мээң шилип алган улузумга дегбеңер, Мээң медээчилеримге багай чүве кылбаңар!» – деп турган.

²³ Бүгү чер-делегей, Дээрги-Чаяакчыны алгап ырла, хүннүң-не Ооң камгалалын медээлеңер!

²⁴ Шупту чоннарга – Ооң алдарын, бүгү аймактарга – Ооң кылган кайгамчык чүүлдерин чугаалап чедиңер.

²⁵ Дээрги-Чаяакчы өндүр улуг база макталга төлептиг, өске бурганнардан артык коргунчуг болгай.

²⁶ Өске чоннарның бурганнары шуптузу хоозун дүрзүлер-дир, а Дээрги-Чаяакчы дээрлерни чаяаган болгай.

²⁷ Чайынналчак мактал-хүндү – Ооң мурнунда, күчү-күш болгаш өөрүшкү – Ооң турар черинде.

²⁸ Чоннарның аймактары, Дээрги-Чаяакчыны мактаңар, Ооң алдары биле күчү-күжүн мактаңар;

²⁹ Дээрги-Чаяакчының алдарлыг адын алгаңар, өргүлдериңер ап алгаш, Ооң мурнунче кирип келиңер. Дээрги-Чаяакчы Бодунуң ыдыктыг өргээзинге турда, Аңаа мөгейиңер.

³⁰ Бүгү чер-делегей, Ооң мурнунга коргуп сириле! Ол өртемчейни быжыг үндезинде тургузуп каан – тендиш дивес-тир.

³¹ Дээрлер өөрүп-хөглезин, чер-делегей өөрүп-байырлазын. Чоннар аразынга: «Дээрги-Чаяакчы хааннап турар!» дишсиннер.

³² Далай болгаш ону долган бүгү чүве шимээргеп доюлзун, хову-шөлдер болгаш ында амыдыраан бүгү чүве өөрүзүн.

³³ Арга-эзимде ыяштар Дээрги-Чаяакчының мурнунга өөрүп ырлашсын, Ол чер-делегейни шын шиидер дээш кел чыдар болгай.

³⁴ Дээрги-Чаяакчыга өөрүп четтириңер; Ол ачылыг-дыр, Ооң энерели кезээ шагда үстүп төнмес-тир.

³⁵ Мынча деп мөргүңер: «Камгалакчы Бурганывыс, бисти камгалап көр; Сээң ыдыктыг адыңны мактаар кылдыр, Сээң мактал-хүндүң-биле чоргаарланыр кылдыр, өске чоннар аразындан бисти бөлүп чыып, олардан камгалап көр».

³⁶ Израильдиң Бурганынга – Дээрги-Чаяакчыга кажан-даа, кезээ мөңгеде алдар! Ынчан бүгү чон: «Ындыг-ла болзунам!» – деп чугаалааш, Дээрги-Чаяакчыны мактаан.

Бурганга доктаамал бараан болуушкун

^37-38 Давид Дээрги-Чаяакчының чагыг-керээзиниң аптаразының мурнунга доктаамал, хүннүң-не бараан болур кылдыр Асафты болгаш ооң ха-дуңмаларын, Овед-Эдомну болгаш ооң төрел бөлүүнден алдан сес кижини аңаа арттырып каан. Идифуннуң оглу Овед-Эдом база Хоса хаалгачылар турган.

³⁹ А Садок бараалгакчыны болгаш ооң төрелдери – Бурганның бараалгакчыларын Гаваонда бедик черде турар Дээрги-Чаяакчының майгынынга тургузуп каан.

⁴⁰ Олар Дээрги-Чаяакчыга, Ооң Израильге чагаан хоойлузунда бижип каанын ёзугаар, өргүл салыр бедигээшке эртен-кежээ бүрүн өрттедир өргүлдерни доктаамал кылыр ужурлуг.

⁴¹ Оон ыңай энерели кезээ шагда үстүп төнмес Дээрги-Чаяакчыны алдаржыдар кылдыр Еманны, Идифунну база адап шилиттинген өске-даа улусту томуйлап каан.

⁴² Еман биле Идифун трубаларга, кимвалдарга болгаш Бурганны алдаржыдар өске хөгжүм херекселдеринге ыыткыр ойнап турган. А Идифуннуң оолдары хаалга кадарып турган.

Нафанның өттүр билген медеглели

⁴³ Хамык улус бажыңнарынче тарап чана берген, Давид база өг-бүлезин алгап-йөрээп каар дээш чанып келген чүве-дир.