1 Чылдар 15 - Ыдыктыг Библия

Ыдыктыг аптараны көдүреринге харыысалгалыг левиттер , бараалгакчылар

¹ Давидтиң Хоорайынга хаан бажыңнар тудуп алган соонда, Бурганның аптаразының турар черин белеткээш, аңаа майгын тип каан.

² Ынчан Давид: «Бурганның аптаразын левиттерден өске кым-даа көдүрүп болбас. Чүге дээрге оларны ыдыктыг аптараны көдүрзүн дээш база Аңаа мөңге шагда бараан болзун дээш, Дээрги-Чаяакчы Боду шилип алган» – дээн.

³ Белеткеп кааны черинче Дээрги-Чаяакчының аптаразын киирер дээш, Давид бүгү израильчилерни Иерусалимче чыып эккелген.

⁴ Ол ышкаш Давид Аароннуң салгалдарын база левиттерни чыып алган:

⁵ Кохаттың үре-салгалындан – 120 кижини оларның баштыңы Уриил-биле;

⁶ Мерариниң үре-салгалындан – 220 кижини оларның баштыңы Асайя-биле;

⁷ Гирсоннуң үре-салгалындан – 130 кижини оларның баштыңы Иоил-биле;

⁸ Элицафанның үре-салгалындан – 200 кижини оларның баштыңы Шемайя-биле;

⁹ Хевроннуң үре-салгалындан – 80 кижини оларның баштыңы Элиел-биле;

¹⁰ Узиилдиң үре-салгалындан – 112 кижини оларның баштыңы Аминадав-биле.

¹¹ Оон ыңай Давид Бурганның бараалгакчылары Садок биле Авиафарны болгаш левиттер Уриил, Асайя, Иоил, Шемайя, Элиел база Аминадавты кыйгыргаш,

¹² оларга: «Силер – левиттерниң төрел бөлүктериниң баштыңнары-дыр силер. Бодуңар болгаш ха-дуңмаңар ыдыктанып-арыглаттынып алгаш, Израильдиң Бурганы Дээрги-Чаяакчының аптаразын мээң белеткеп кааным черже эккелиңер.

¹³ Мооң мурнунда Бурганывыс Дээрги-Чаяакчы ыдыктыг аптараны левиттер силер эвес, өске улустуң көдүргени дээш, бисче халдаан болгай. Ону канчаар кылыр ужурлуг турганын бис Дээрги-Чаяакчыдан айтырып албаан болган бис».

¹⁴ Бурганның бараалгакчылары болгаш левиттер, Израильдиң Бурганы Дээрги-Чаяакчының аптаразын көдүрер дээш, ыдыктанып-арыглаттынып алганнар.

¹⁵ Левиттер Бурганның аптаразын, Моисейниң чагып кааны Дээрги-Чаяакчының сөзүн ёзугаар, узун ыяш кырынга салгаш, эгиннеринге салып алган көдүрүп чорааннар.

Хөгжүмчү левиттер

¹⁶ Давид левиттерниң баштыңнарынга аймааның аразындан ыраажыларын база чадаган, чанзы болгаш кимвалдарга ойнаар хөгжүмчүлерин өөрүшкүнүң ырын ыыткыр ырлаары-биле томуйлап каарын дужааган.

¹⁷ Левиттер Иоилдиң оглу Еманны, ооң төрелдеринден – Берехияның оглу Асафты база мерари төрел бөлүктен – Кушайяның оглу Эфанны шилип алганнар.

¹⁸ Олар-биле кады олардан куду эргелиг: Захарияны, Азиилди, Шемирамотту, Иехиилди, Уннийни, Элиавты, Ванеяны, Маасеяны, Маттафияны, Элифлеуйну, Микнейни база Овед-Эдом биле Иеиел деп хаалгачыларны база томуйлап кааннар.

¹⁹ Еман, Асаф болгаш Эфан хөгжүмчүлер хүлер кимвалдарга ыыткыр ойнаар турган.

²⁰ Захария, Азиил, Шемирамот, Иехиил, Унний, Элиав, Маасея база Ванея – чанзыга аламот деп аян-биле ойнаар.

²¹ А Маттафия, Элифлеуй, Микней, Овед-Эдом, Иеиел болгаш Азазия чадаганга ойнап, шеминит* деп аян-биле ырлаарын баштап турган.

²² Левиттерниң баштыңы Хенания ыры башкызы турган, чүге дээрге ооң мергежилдии кончуг.

²³ Берехия биле Элкана – ыдыктыг аптара чанында хаалгачылар.

²⁴ Бурганның бараалгакчылары Шевания, Иосафат, Нафанаил, Амессай, Захария, Ванея база Элиезер Бурганның аптаразының мурнунга труба этсир ужурлуг. Овед-Эдом биле Иехия – ыдыктыг аптара чанында хаалгачылар.

Ыдыктыг аптараны Иерусалимче эккелгени

²⁵ Давид болгаш Израильдиң баштыңнары база муң шериг баштыңчылары Дээрги-Чаяакчының чагыг-керээзиниң аптаразын Овед-Эдомнуң бажыңындан үндүрер дээш чорупканнар.

²⁶ Дээрги-Чаяакчының аптаразын көдүрген левиттерге Бурган дузалажып каарга, чеди бугажыкты база чеди кошкарны өргүл кылдыр салганнар.

²⁷ Давид, аптара көдүрүп чораан бүгү левиттер, ыраажылар болгаш оларның башкызы Хенания шуптузу ак лён тоннуг чораан. Давид оон аңгыда лён эфод кедип чораан.

²⁸ Ынчалдыр бүгү Израиль Дээрги-Чаяакчының ыдыктыг аптаразын ыыт-шимээнниг, эдиски-трубаларның, кимвалдарның, чадаган-чанзының үделгези-биле киирип эккелген.

²⁹ Дээрги-Чаяакчының ыдыктыг аптаразын Давидтиң Хоорайынче киирип орда, Саулдуң уруу Мелхола соңгадан көрүп турган. Самнап хөглеп чораан Давид хаанны көргеш, Мелхола ону чөгенчиин деп бодаан.