1 Чылдар 12 - Ыдыктыг Библия

Давидтиң баштайгы талалакчылары

¹ Давид Кистиң оглу Саулдан чаштып турда, Циклагка келген, аңаа дайын чорударынга дузалажыр дээн эрес-дидим дайынчыларның чамдыызы бо-дур.

² Олар – ча-биле чепсегленген, оң, солагай холдары-биле дажап, ча-согун-биле адып билир турган улус – Вениаминниң аймаандан Саулдуң төрелдери чүве-дир:

³ Гива чурттуг Шемааның оолдары Ахиезер (баштыңчы) биле Иоас; Азмаветтиң оолдары Иезиел биле Пелет; Анатот чурттуг Бераха биле Иеху;

⁴ Гаваон чурттуг Ишмайя (ол дээрге үжен шериг баштыңчызының бирээзи база оларның даргазы); Гедера чурттуг Иеремия, Яхазиил, Иоханан база Иегозавад;

⁵ Хариф чурттуг Элузай, Иремот, Веалия, Шемария база Шефатия;

⁶ корах төрел бөлүктен Элкана, Ишияху, Азариил, Иоезер база Иошавам;

⁷ Гедор чурттуг Иерохамның оолдары Иоела биле Зевадия.

⁸ Гадтың аймаандан база Давидтиң ээн кургаг ховуда шивээзинче эрес-дидим, чыда болгаш дозуг-камгалалдыг дайынчылар шилчип келген. Олар арзылаң дег шириин шырайлыг, дагларда те-чуңма дег кашпагай улус.

⁹ Оларның баштыңчызы Эзер, ийи дугаарында Авдий, үшкүзү Элиав,

¹⁰ дөрткүзү Мишманна, бешкизи Иеремия,

¹¹ алдыгызы Аттай, чедигизи Элиел,

¹² сескизи Иоханан, тоскузу Элзавад,

¹³ онгузу Иеремия, он биргизи Махбанай.

¹⁴ Ол гадчылар шериг баштыңчылары бооп турган: эң бичези чүс шериг баштаан, а эң улуу муң шериг баштап турган чүве-дир.

¹⁵ Олар Иордан хемни бир дугаар айда, ол эриин ажыр дажый бергенде, кежип алгаш, шынааның бүгү чурттакчыларын чөөн болгаш барыын чүктерже тарадыр ойладыпканнар.

¹⁶ Давидтиң шивээзинче Вениаминниң болгаш Иуданың аймактарындан чамдык улус чедип кээрге,

¹⁷ Давид оларга уткуштур үнүп келгеш: «Бир эвес силер меңээ дузалажыр дээш келген болзуңарза, сеткил-чүрээм силер-биле тудуш чаңгыс болур. А бир эвес силер, кажан мээң холдарым күчүлээшкинден арыг турда, мени дайзыннарымга садар дээш келген болзуңарза, бистиң өгбелеривистиң Бурганы көргеш, шииткей аан» – дээн.

¹⁸ Ынчан Бурганның Сүлдези үжен шеригниң баштыңчызы Амессайны бүргеп келген, ол мынча дээн: «Амыр-ла, Давид. Бис сээң-биле кады бис, Иессейниң оглу! Сеңээ болгаш сээң талалакчыларыңга чедиишкинни күзеп тур бис, чүге дээрге Бурганың сеңээ дузалажып турар болгай». Давид оларны хүлээп алгаш, бодунуң шериглериниң баштыңчылары кылып каан.

¹⁹ Манассияның аймаандан база чамдык улус Давидтиң талазынче шилчип келген. Ол үеде Давид филистимнер-биле кады Саулга удур дайылдажыр дээш үнүпкен турган чүве-дир. (Херек кырында Давид филистимнерге дузалашпаан, чүге дээрге филистим чагырыкчылар «Ол дээргизи Саулдуң талазынче шилчий бергеш, боттарывыстың бажывысче суг кудар» деп сүмелешкеш, ону чорудупкан.)

²⁰ Кажан Давид Циклагче ээп чанып орда, Манассияның аймаандан дараазында улус ооң талазынче шилчип келген: Аднах, Иозавад, Иедиаил, Михаил, Иегозавад, Элиуй болгаш Цилтай. Олар Манассияның муң шериг баштыңчылары,

²¹ шупту эрес-дидим дайынчылар-дыр. Олар Давидке ооң шериин баштаарынга дузалажып эгелээн, ооң шериг баштыңчылары апарган.

²² Ынчалдыр Давидке хүннүң-не дузалажыр улус кээп-ле турган, түңнелинде ооң шерии Бурганның аг-шерии дег хөй апарган.

Шериглериниң Давидти хаан кылып аары-биле чыылганы

²³ Давид Хевронга турда, Дээрги-Чаяакчының сөзүн ёзугаар, Саулдуң эрге-чагыргазын хүлээдир дээш келген шериглерниң саны бо-дур:

²⁴ Иуданың аймаандан – дайылдажырынга белен, чыдалыг болгаш дозуг-камгалалдыг 6800 кижи.

²⁵ Симеоннуң аймаандан – 7100 эрес-дидим дайынчы.

²⁶ Левийниң аймаандан – 4600 кижи.

²⁷ Аароннуң төрел бөлүүнүң баштыңы Иодай, ооң-биле кады 3700 кижи.

²⁸ Эрес-дидим аныяк Садок база ооң төрел бөлүүнден 22 ноян.

²⁹ Саулдуң төрелдери болур Вениаминниң аймаандан – 3000 кижи. Оларның хөй кезии ол үеге чедир Саулга болгаш ооң салгалдарынга шынчы арткан турган.

³⁰ Эфремниң аймаандан – боттарының төрел бөлүктеринде ат-сураглыг 20 800 эрес-дидим дайынчы.

³¹ Манассияның аймааның чартыындан – 18 000 кижи. Оларны Давидти хаан болдурарынга киришсин дээш, адап тургаш келдирткен.

³² Иссахарның аймаандан – 200 мерген угаанныг баштың кижи келген. Олар дээрге Израиль кажан, чүнү кылза дээре дээрзин билир улус – а баштыңнарның бүгү ха-дуңмалары оларның сөзүн тооп дыңнаар турган.

³³ Завулоннуң аймаандан – дайылдажырынга белен кылдыр бүгү тала-биле чепсегленген 50 000 шериг демнии-биле Давидке чедип келгеннер.

³⁴ Неффалимниң аймаандан – 1000 баштыңчы; олар-биле кады чыдалыг болгаш дозуг-камгалалдыг 37 000 кижи.

³⁵ Данның аймаандан – дайылдажырынга белен 28 600 кижи.

³⁶ Асирниң аймаандан – дайылдажырынга белен 40 000 дайынчы.

³⁷ Иордан хемниң ындыындан – Рувимниң, Гадтың аймактарындан база Манассияның аймааның чартыындан бүрүн чепсегленген 120 000 кижи келген.

³⁸ Ол шериглер шуптузу дайынчы ёзу-биле, Давидти бүгү Израильдиң хааны кылып каар дээш, изиг күзели-биле Хевронга чедип келгеннер. Өске-даа бүгү израильчилер чаңгыс үн-биле Давидти хаан болдуруксап турганнар.

³⁹ Давидтиң чанынга ол дайынчылар үш хүн иштинде дойлап келгеннер, чүге дээрге ха-дуңмалары оларны аъш-чем-биле хандырган чүве-дир.

⁴⁰ Иссахарның, Завулоннуң база Неффалимниң черлеринден безин оларның чоок улузу хөй аъш-чемни: далганны, фига чимизин, үзүмнү, араганы, олива үзүн элчигеннерге, тевелерге, мулдарга, шарыларга чүдүрүп эккелген, бода, шээр малды база сүрүп эккелген, чүге дээрге израиль чон өөрүп-байырлап турган.