1 Чылдар 11 - Ыдыктыг Библия

Давидтиң бүгү Израильдиң хааны апарганы

¹ Бүгү израильчилер Хевронда Давидке чыглып келгеш: «Бо-дур, силерниң хан төрелиңер улус-тур бис – дээннер. –

² Шагдан бээр-ле, Саул хаан турар үелерде безин, израильчилерни дайын-чаага баштап турган кижи силер силер. Дээрги-Чаяакчы Бурганыңар силерге: „Сен Мээң израиль чонумну кадарар сен. Израиль чонумнуң чагырыкчызы сен болур сен“ – деп чугаалап турду».

³ Израильдиң бүгү баштыңнары Хевронда хаанга чедип кээрге, Давид олар-биле Дээрги-Чаяакчының мурнунга керээ чарып алган. Олар Давидти Израильдиң хааны болур кылдыр Дээрги-Чаяакчының Самуилди дамчыштыр чугаалаан сөзүн ёзугаар чаап кааннар.

⁴ Давид болгаш бүгү израильчилер Иерусалимче (азы Иевусче) чорупкан. Ол хоорайга тус черниң чурттакчылары иевустар турган.

⁵ Иевустуң чурттакчылары Давидке: «Сен бээр кирбес сен» – дээннер. Ынчалза-даа Давид Сион шивээзин эжелеп алган. Ол болза Давидтиң Хоорайы-дыр.

⁶ Давид мынча дээн: «Кым улусту мурнай иевустарны чылча шаап каарыл, ол кижи шериг баштыңчызы болур». Саруйяның оглу Иоав кымны-даа мурнай Иевусче киргеш, шериг баштыңчызы апарган.

⁷ Давид ол шивээге турумчуп алган, ынчангаш ону Давидтиң Хоорайы деп адаан.

⁸ Давид Милло шивээзинден эгелеп, хоорайны долгандыр быжыг камгалал кылып алган. А хоорайның арткан кезээн Иоав чаарткан.

⁹ Давид улам-на күштүг бооп кел чыткан, Аг-шериглиг Дээрги-Чаяакчы ооң-биле кады болуп турган.

Давидтиң маадырлары

¹⁰ Дээрги-Чаяакчының израиль чонга чугаалаанын ёзугаар Давидти хаан болдуруп, бүгү израильчилер-биле кады ооң хааннаашкынын деткип турган кол дайынчылары бо-дур.

¹¹ Давидтиң дайынчыларының даңзызы бо-дур: хакмон уктуг Яшавам, үжен шериг баштыңчызының аразында кол кижи. Ол 300 дайзынче чыдазын көдүргеш, оларны чаңгыс тулчуушкун үезинде өлүрүп каан.

¹² Ооң соонда ахохи уктуг Додонуң оглу Элеазар турар, ол база үш маадырның аразында.

¹³ Ол Давид-биле кады филистимнерниң тулчуушкунче чыглып турган чери Фас-Дамимге турган. Ол кезек черге арбай тарып каан турган чүве-дир. Израиль шериг филистимнерден дезип эгелээрге,

¹⁴ олар шөлдүң ортузунга артып калгаш, ол кезек черни камгалап ап, филистимнерни чылча шаап кааннар. Ынчалдыр Дээрги-Чаяакчы улуг тиилелгени берген.

¹⁵ Бир катап үжен шериг баштыңчызының аразындан ол үш маадыр хаяда Одоллам куюнга Давидке чедип келген. Ол үеде филистимнерниң турлаа Рефаим шынаазынга турган.

¹⁶ (Давид быжыглалдыг шивээге, а филистимнерниң доскуул чери – Вифлеемге турган).

¹⁷ Давид суг ижиксей бергеш: «Вифлеемниң хаалга аксында кудуктуң суун меңээ кым-бир кижи эккеп берген болза» – дээн.

¹⁸ Ынчан ол үш маадыр филистимнерниң турлаан таварып эрткеш, Вифлеемниң хаалга аксында кудуктуң суун ускаш, Давидке эккеп бергеннер. Ынчалза-даа Давид сугну ижеринден ойталаан, ону Дээрги-Чаяакчыга өргүл кылдыр төпкеш,

¹⁹ мынча дээн: «Чок, мен ону ижип болбас мен, Бурганым! Бо улустуң ханын мен ижип шыдаар деп мен бе? Олар боттарының амы-тынын харамнанмайн чорааш, ону эккелдилер ышкажыл». Ынча дээш, ол сугну ишпейн барган. Шак ындыг чоруктарны ол үш маадыр кылып чораан чүве-дир.

²⁰ Иоавтың акызы Авесса ол үш маадырның даргазы турган. Ол 300 дайзынны бодунуң чыдазы-биле узуткап кааш, демги үш маадыр-биле деңге алдаржый берген.

²¹ Авесса ол үш маадырдан ийи катап сураглыг апаргаш, оларның баштыңчызы болган, ынчалза-даа үш маадырның санынче кирбээн.

²² Иодайның оглу, Кавцеилден келген эрес-дидими-биле сурагжаан Ванея турган. Ол арзылаң дег күштүг ийи моав кижини өлүрүп каан. Оон аңгыда хар чаап турган үеде, оңгарже киргеш, аңаа арзылаң база өлүрген.

²³ Оон ыңай Ванея узуну беш кыры египет кижини база өлүрүп каан. Египет кижиниң холунда чыданың чоону пөс-таавычыларның өзек ыяжы дег турган, ындыг-даа болза, Ванея анаа даянгыыш тудуп алган чеде бергеш, египет кижиниң чыдазын былаап алгаш, ол-ла чыдазы-биле ону өлүрүп каан.

²⁴ Иодайның оглу Ванея ындыг чорук кылган кижи-дир. Ол база демги үш маадыр дег алдаржый берген.

²⁵ Ванея үжен шериг баштыңчызының аразындан сураглыг турган, ынчалза-даа демги үш маадырның санынче кирбээн. Давид ону бодунга чоок дүжүмет кылып алган.

²⁶ Өске эрес-дидим дайынчылар бо-дур: Иоавтың дуңмазы Асаил, вифлеемчи Додонуң оглу Элханан,

²⁷ Гарод чурттуг Шаммот, Пелон чурттуг Хелец,

²⁸ Текоя чурттуг Иккештиң оглу Гира, Анатот чурттуг Авиезер,

²⁹ Хуша чурттуг Сивхай, Ахох чурттуг Илай,

³⁰ Нетофа чурттуг Магарай, Нетофа чурттуг Баананың оглу Хелед,

³¹ Вениаминниң черинде Гива чурттуг Рибайның оглу Иттай, Пирафон чурттуг Ванея,

³² Нахле-Гааш чурттуг Хурай, Арава чурттуг Авиел,

³³ Бахарум чурттуг Азмавет, Шаалбон чурттуг Элияхба,

³⁴ Гизон чурттуг Гашемниң оолдары, Гарар чурттуг Шагениң оглу Ионафан,

³⁵ Гарар чурттуг Сахарның оглу Ахиам, Урнуң оглу Элифал,

³⁶ Махера чурттуг Хефер, Пелон чурттуг Ахия,

³⁷ Кармил чурттуг Хецро, Эзбайның оглу Наарай,

³⁸ Нафанның дуңмазы Иоил, Гагрийниң оглу Мивхар,

³⁹ аммон аймак-сөөктүг Целек, Беерот чурттуг Нахарай (ол Саруйяның оглу Иоавтың ок-чепсек тудукчузу турган),

⁴⁰ итра уктуг Гира биле Гареб,

⁴¹ хет аймак-сөөктүг Урия, Ахлайның оглу Завад,

⁴² Шизаның оглу Адина (ол дээрге Рувимниң аймаанда баштың кижи, ооң-биле кады үжен шериг турган),

⁴³ Мааханың оглу Ханан, Мифан чурттуг Иосафат,

⁴⁴ Аштерот чурттуг Озия, Ароер чурттуг Хотамның оолдары Шама биле Иеиел,

⁴⁵ Шимриниң оглу Иедиаил база ооң Тиц чурттуг дуңмазы Иоха,

⁴⁶ Махавим чурттуг Элиел, Элнаамның оолдары Иеривай биле Иошавия, Моав чурттуг Ифма,

⁴⁷ Мецовая чурттуг Элиел, Овид болгаш Иаасиил.