Zebur 84 - Mukaddes Kitap

84‑nji mezmur

1 Aýdymçylar toparynyň ýolbaşçysyna. Koranyň nesilleriniň mezmury .

¹ Aýdymçylar toparynyň ýolbaşçysyna. Koranyň nesilleriniň mezmury.

² Ýa Reb, Sen Öz ýurduňa merhemet etdiň, Ýakup halkynyň abadanlygyny ýene gaýtaryp berdiň.

³ Öz halkyňyň etmişlerini geçirdiň, onuň ähli günälerini Sen bagyşladyň. Sela

⁴ Ähli gazabyňy Sen jylawladyň, ýowuz gazabyňy Sen köşeşdirdiň.

⁵ Eý, bizi halas eýleýän Hudaý, bagtyýar günlerimizi ýene-de gaýtar, bize bolan gahar-gazabyňdan el göter.

⁶ Sen gaharlanjakmy bize ebedi? Nesilden-nesle geçirjekmi Öz gaharyňy?

⁷ Halkyňyň Sende şatlanyp bileri ýaly, Sen bizi gaýtadan dikeltjek dälmi?

⁸ Ýa Reb, bize sadyk söýgiňi görkez, Öz halas edişiňi bize peşgeş et.

⁹ Diňlärin Beýik Hudaýyň aýtjaklaryny. Ol halkynyň, sadyklarynyň gaýtadan akmaklyk etmezi ýaly, olara wada berýär parahatlygy.

¹⁰ Onuň şöhratynyň ýurdumyzda mesgen tutary ýaly, Ol Özünden gorkýanlary dogrudan-da, hemişe halas etmäge taýýar!

¹¹ Söýgi bilen wepadarlyk birleşer, dogrulyk parahatlyk bilen biriger.

¹² Wepadarlyk ýerden gögerer, dogrulyk-da asmandan garar.

¹³ Hawa, Reb ýagşy zatlary berer, topragymyz öz hasylyny eçiler.

¹⁴ Dogrulyk Onuň öňünden ýörär, Onuň gadamlaryna ýoly taýynlar.