Zebur 83 - Mukaddes Kitap

83‑nji mezmur

1 Aýdymçylar toparynyň ýolbaşçysyna. Gititde. Koranyň nesilleriniň mezmury .

¹ Aýdymçylar toparynyň ýolbaşçysyna. Gititde. Koranyň nesilleriniň mezmury.

² Eý, Hökmürowan Reb! Seniň mesgeniň neneňsi eziz!

³ Rebbiň howlularyny küýsäp, meniň janym ysgyndan düşýär; ýüregim, tenim diri Hudaýa şatlanyp, nagmalar aýdýar.

⁴ Seniň gurbanlyk sypaň ýanynda hatda serçe hem tapýar özüne bir öý, garlawaç hem – öz çagalary üçin höwürtge, eý, Hökmürowan Reb, Patyşam hem-de Hudaýym!

⁵ Bagtlydyr Seniň öýüňde mesgen tutanlar, olar mydama Seni şöhratlandyrarlar. Sela

⁶ Bagtlydyr Senden kuwwat alýanlar, kalbynda Siona eltýän ýoly arzuwlaýanlar!

⁷ Olar Agy-perýat jülgesinden geçende, ol ýer çeşmeler mekanyna öwrülýär, güýzki ýagyş ol ýere bereket berýär.

⁸ Olaryň kuwwaty barha möwjeýär, Sionda Hudaýyň huzurynda häzir bolarlar.

⁹ Ýa Hökmürowan Hudaýymyz Reb, eşit dogamy, diňle meni, eý, Ýakubyň Hudaýy! Sela

¹⁰ Eý, Hudaý hoşamaý seret patyşa – galkanymyza, merhemet et Öz seçip-saýlanyňa.

¹¹ Çünki Seniň howlularyňda geçen ýeke gün başga ýerde geçen müň günden ýagşy. Erbetleriň çadyrlarynda men ýaşanymdan, Hudaýymyň öýüniň bosagasynda duranym ýagşy.

¹² Çünki Hudaýymyz Reb – Günümiz we galkanymyz, Ol merhemet we şöhrat berýär; Ol dogry ýoldan ýöreýänlerden hiç bir ýagşylygyny gaýgyrýan däldir.

¹³ Eý, Hökmürowan Reb! Saňa bil baglaýanlar nähili bagtly!