Zebur 82 - Mukaddes Kitap

82‑nji mezmur

1 Nagma. Asafyň mezmury .

¹ Nagma. Asafyň mezmury.

² Eý, Hudaý, dymma, eý, Hudaý, ümsüm, biperwaý bolma.

³ Seret, duşmanlaryň pitne turuzýar, Seni ýigrenýänler başlaryny galdyrýar.

⁴ Seniň halkyňa garşy erbet niýet edinýär, Seniň goraýanlaryňa garşy dil birikdirýär.

⁵ Diýýärler: «Geliň, ýok edeli, goý, olar millet bolmasyn, mundan beýläk Ysraýylyň ady, goý, agzalmasyn».

⁶ Olar bir çukura tüýkürip, dil birikdirýär hem-de Saňa garşy äht baglaşýar:

⁷ edomlar we ysmaýyllar, mowaplar we hagarlar,

⁸ Gebal, Ammon hem-de Amalek, Pilişt hem-de Suruň ilaty,

⁹ Aşur-da goşuldy, olar Lut ogullaryny goldady. Sela

¹⁰ Sen Midýana hem-de Kişon çaýynda Sisera bilen Ýabyna edenleriňi olaryň başyndan inder.

¹¹ Olar Endorda heläk edildi, olar topragyň dökünine öwrüldi.

¹² Orep we Zeýep ýaly et serdarlaryny, Zebah we Salmunna dek – ähli serkerdesini.

¹³ Olar: «Geliň, Hudaýyň örülerini özümize mülk edineli» diýdiler.

¹⁴ Eý, Hudaýym, tüweleýdäki tozana, ýel öňündäki harpyga öwür olary.

¹⁵ Oduň tokaýy köýdürşi kimin, ýalnyň daglary otlaýşy kimin,

¹⁶ harasadyň bilen kowala Sen olary, apy-tupanyň bilen gorkuz olary.

¹⁷ Utanja gapla olaň ýüzüni, ýa Reb, şonda olar agtarar Seniň adyňy.

¹⁸ Baky ryswa bolup, goý, dowla düşsün, utanç içinde ýok bolup gitsin.

¹⁹ Goý, olar bilsin: Reb – diňe Sensiň, tutuş ýeriň Beýik Hudaýysyň!